بنتي جاها التهاب باللثة والم بالاسنان والعلاجات مافادت معها ولقينا هذا الحل الرائع !!

السلام عليكم ورحمة الله وبركاته

بنتي البكر عمرها 19 سنة ربي يحفظها
من يومين تتألم من اسنانها وألتهبت لثتها ووالله ماذاقت طعم النوم بالراحة
ومن شدة الالم وصل الامر للبكاء اقسم بالله ماخلينا شي من العلاجات الا واستخدمناه لها
من بنادول ومضاد وبروفين وقرنفل وماء دافي وملح واشياء ثانية وبالاخير وديناها لطبيبة الاسنان
واعطتها علاجات وخفت بالبداية وبعدين رجع الالم من جديد واكثر وأشد من أول حتى وصل الالم
لاذنها واستخدمت موية دافية وملح تتمضمض فيها ومافي فايدة
وبالاخير جتني هالفكرة رحت على طول وجبت مرة وحطيتها في فنجال وصبيت عليها شوي موية
تقريبا ربع الفنجال ودخلتها المايكرويف شوي لحد ماتذوب المرة ودفيتها شوي وحركتها وغمست
فيها منديل يعني تقريبا نص المنديل من منقوع المرة وخليت بنتي تحط المنديل على مكان الالم
وتعض عليه ووالله ما اكذب عليكم ثوااااني ورااااااااااااااح الالم وخف بس بنتي نزفت اللثة معها
اثناء العض ع المنديل وبعدها رمته ونااااااااامت بنتي وارتاحت من الالم ولله الحمد ..

واليوم خف الالتهاب لكن رجع الالم بس اخف من اول وصارت كلما تحس بالالم تحط منديل جديد وتغمس فيه مرة
وتمرره على اسنانها واللثة والحمدلله انه يخف في وقتها ..

جربوا الطريقة وان شاءالله بتفيدكم مثل مافادت بنتي ..

ملاحظة :

منقوع المرة ضروري يكون مركز مو خفيف يعني تكثرون المرة وتقللون الموية وتكون دافية
انتبهوا تستخدمونها وهي باردة لانها ماراح تسوي شي هذا انا علمتكم والله على ما اقول شهيييد

ادعوا لي بالشفاء انا وولدي وابوي وزوجي وكل مرضى المسلمين عاجلا غير آجلا