29سنة انتظر الزوج الصالح وصابرة وماسكه نفسي من الفتن والصبر مل مني الى الله المشتكى

ذقت الهم والوجع والمر والتجريح والنظرات والهمز واللمز
قريباتي اللي قدي والي اصغر بكثير تزوجن وعيلن وانا اتفرج والعنوسة باقي
وش ذنبي ان شكلي عادية وش ذنبي ان لوني حنطيه وملامحي عاديه وشعري مو ناعم
مجتمع ماهمه الا المظاهر وبس
والله كل اللي حولي يمدحون بحشمتي ديني واخلاقي
بس كل الناس الحين ماهمها الا الجمال
بنات لبس عاري وعبايات ضيقه واخلاق ونفسيه شينه ولاسناعه ولاطبخ ولانفخ ومشوا ولاحظت انهن كلهن حلوات هذا زودهم علي انا وخواتي وبعض صديقاتي
جونا ناس وكلهم ينحاااشون
ناس زيون وعاديين وناس انا حلى منهم بمراحل وكلهم ماعجبتهن جتني شوفات ناس يهبلون من الجمال والبياض اتمنى بس الارض تنشق وتبلعني من الفشيله منهم حتي عيونهم مايطالعوني من كثر ماانا مو عاجبتهم
وش جابكم وانتوا دارين اني عاديه جايين عشان الاخلاق ويوم شافوني حتى الاخلاق ماهمتهم
كلهم حريم
جانا ولد قبل سنة كنت متوقعه رافضني عشان معدلي الجامعي مايأهل للماجستير ولا اكمال الدراسه عشان ماتوظفت لانه كان مثقف وموظف وظيفه اكاديميه كويسه ماجا في بالي ابدا انه رفضني عشان يبي اجمل لانه وقتها كان يقول بس ابي جامعيه
واكتشفت بعد سنة من الخطيبه قبل يومين انه قال ابي احلا منها
حسيييت بجرح وبكيت وللحين مجروحه كل الحريم اللي جو يشوفوني وماعجبتهم كًوم وهذا كوم ثاني
كنت مصدقه نفسي اي رجال يشوف اي حرمه حتى لو جمالها عادي بينهبل عليها
ولنه كان ععععادي وانا افتح منه بمراحل واجمل اشباه ولاعحبته من بعجب اجل
سنه كامله وانا كلما رن جوال ابوي اقول شكله رجع يكلم ابوي عشاني
اهلوس وافكر وعايشه المقلب وهو قد تزوج
كل اسبوع نطلع زيارات للاقارب وكل بناتهم اللي كبري اللي عندها 2و3 مشغولين بعيالهم وانا ابلع العبره
لحد يقول طنشي احساس بالنقص بالحاجه شي غصب عليك حزن وزفره جواتك ماتقدرين تتجنبينها
وتدارينها المضحك المبكي ان اذا سمعت اخواني اواهلي جايبين طاري رجال من اقاربنا او بعيد اقول في نفسي يمكن يخطبني ويكون هونصيبي واتمنى واحبك دراما بالاخير عقب فتره اسمع انه خطب وبيتزوج
اكثر شي يجرحني لااعصب ابوي وقال يالعجزه
ولا امي لاقالت مو ربي موفقك ولامسمح امورك حتى لو علي اتفه شي
ليه يتشفون فيني ومن امك وابوك عزوتك
قريباتنا لادخلت لاجلست الاعب اطفالهم امهاتهن يقولن لااله الا الله توه يتذكرون ذكر الله يوم خذيت عيال بناتهم العبهن
عيال خالاتي قدامي يذكرون لهم بنات اقاربنا من هنا ومن هنا ومافيهن زود وانتي تسمعين من جنب الدريشه وتبلعين الغصه
حرمه قد قالت بخطبك لولدي فلان ايام الصباوالحين اقوى سحبه وكل ماشافت بنوته حلوه قالت بخطبها لولدي فلان قدامي
المتاخره عن الزواج مسكينه ان صبغتي ان رحتي عروس ان رحتي لناس وفزعتي معهم قالوا اي عشان يخطبونها لولدهم ولو هالشي صحيح كان كل من زوج عياله سحبت عليه وبدلت بوجهن ثاني لكن مانقول الا
حسبي على من آذاني
اصعب شي يمر عليك تحسين بحاجة كلمه حلوه حنان ضنا تلمينه لحضنك بيت انتي أميرته
تجيك الفتن من كل صوب الرجال يأذونك بالواتس اب بالتويتر بكل مكان وانتي تصدين عنهم رغم انك بأقصى حاجات العاطفه والزواج وأحد يسمعك وتسمعينه

وكل هذا فطره وحاجه طبيعيه في كل بني آدم
اللهم الهمنا الصبر والثباااااات
واغننا وعفنا بحلالك عن حرامك
واقضي حوائجنا
ربنا لاتزغ قلوبنا
ربي إني مسني الضر وأنت أرحم الراحمين