تجـمع للحوامل الرابطات (ربط عنق الرحم) الثلاثون

م برنسيس :
تسلمين ياقلبي على كلامج الحلو اللي مايصدر إلا من برنسيس مثلج .. ابشرج اليوم انا قاعده والكشره ترس الوجه وأشوف الدنيا بمبي بمبي :biggrinlo
ومبروك ياقلبي انك وصلتي للأسبوع 34 وان شاء الله توصلين لل 39 ( مابي أقول 40 لا تذبحيني خخخخخ) انا ياعمري الحين امشي في الأسبوع 30 عقب كم يوم ادخل 31 :twirl:
هانت ما بقى شي .. بس انا لازم أجهز كل شي لاني الحين مثل القنبله الموقوته احتمال انفجر قصدي أولد بأي لحظه ولازم أكون جاهزه :humm:
اليوم بأخذ كم غرض أساسي من مذركير لانه جنب بيتي ومايتعب وأختي بتروح بيبي شوب .. والسرير لين ولدت اختي بتروح تأخذه وباقي أخذ طقم ترامس وتوابعها وعلب تقديم الحلى والفطاير وترتيب الورد وهذا شغل اختي هي ماشاء الله عليها منسقة وذويقه وبتروح بكره تدور .. عطيتها راحه اليوم خخخخ صج نذله :024: كيفها تروح تعبانه ولا غيره صار لهم 3 أسابيع مستانسين وتمشي وبراد ومطر وتسوق وأنا ليل نهار أعييييط من الضيق الحين لازم يكرفون ويخلصون شغلي:biggrinlo

نور الدنيا :
توني منتبهه على سؤالج عن الفطريات والبكتيريا ... طبعاً ياقلبي في فرق بينهم .. واعتقد أن البكتيريا اشد من الفطريات وأنها المسبب الرئيسي لفتح كيس الجنين والبكتيريا يكون علاجها بمضاد حيوي عبر الفم او الوريد يعني ماينفع معها المضاد الموضعي .. أما الفطريات فهي أخف من البكتيريا لكن مش معناه أنها ماتسبب الإجهاض بالعكس هي أيضاً تسبب انفجار كيس الجنين اذا تم إهمالها وعدم علاجها لفتره طويله وعلاجها يكون أكثر شي موضعي تحاميل مهبليه او كريمات ( ممكن مضادات عبر الفم لكنها قليله )
وترا ما تقدري تفريق بينهم لأنهم نفس الأعراض ( إفرازات وحكه وحرقه ) لكن في فرق بسيط تقدري تعرفي منه انه فطريات او بكتريا وهذا عن طريق الإفرازات .. اذا كانت لزجه ( مثل المخاط ) ومش شفافه يعني لونها ابيض على بيج وما فيها ريحه فهي فطريات أما اذا سائله ولها ريحه مثل ريحة السمك مثلاً ولها لون اصفر او اخضر فهذي بكتيريا بدون كلام
ادري لوّعت جبدج من الوصف بس لازم اجاوبك خخخخخ

آخر كلام قبل لا اطلع ( جننتوني كل ماجيت اطلع ألقى سؤال واقعد اجاوب خخخ ) اذا انتي شفتي عندك إفرازات وشكيتي فيها ومسببه لك قلق سووي مثلي انا اذا شفتها أخذ من نفسي كورس تحاميل جينو بيڤاريل لمدة ٣ أيام و دهان كانستين خارجي مرتين في اليوم لمدة أسبوع وبإذن الله مايضر وهذا على كلام دكتوره لي وترا اذا استعملتي الكانستين بتحسي مثل الماي ينزل منك لا تخافي هذا الالتهاب يطلع

هههههههه. ماعندي مشكلة بس يوم صعدوني لطبيب التخدير خارات قواي😩

بنتظر :
انتي شفتي دكتور التخدير خارت القوى عيل لين حطّو لج الكانيولا ( إبرة المغذي ) ولبّسوج لبس العمليات واسحبوج مثل الخروف في العيد وشفتي غرفة العمليات البااااارده والكل مغطي وجهه والكشافات فوق راسج واسدحوج على السرير البارد وحطّو لج تخطيط القلب وجهاز الضغط ومدّوا ايدج على اللوح ورفعوا رجلك ودكتور التخدير عند راسج كأنه عزرائيل ويقولج سمّي بسم الله ومع السلامه وتبتدين تحسين بالظلام والدنيا تدوووور والاصوات تبتدئ تختفي بالتدريج شبتسووين ( خخخخخخخخخخخ نذله ابي اخرعج زياده )
لا والله جد لا تخافي ولا شي كلها ربع ساعه بس .. والعمليات والبنج انا صارت عااادي عندي لاني مجربتها وايد في عمليات الأنابيب .. توكلي على الله وإذا انتي تخافي حيل طلبي يعطونك أبره تخليك مسطله قبل لا تدخلي العمليه تخليك مثل الهبله اللي ماتدري شالسالفه انا هذي كانوا يعطوني إياها في عملياتي الأولى اللي كنت أخاف فيها وعطوني إياها في لندن لما عملولي منظار المعده :)