بنات انصحوني

السلام عليكم 




بنات بكتب لكم قصتي ومابي هجوم او نصائح مو بمحلها 
واتمنى قبل تردون تفهمون الموضوع زين 
وانا بكتب لكم القصه بالتفصيل 




انا ببدايةة العشرين لكن مو صغيره مره 
المهم قبل سنتين تقريبا اخوي كان متنوم بالمستشفى بسبب حادث تنوم حول اسبوعين ( الله يحفظه ويخليه لنا ) 
ووقتها كانو كل اهلنا وجماعتنا يزورونه وبعضهم عرفتهم بذيك الايام 
يعني ماكنت ادري ان فلانه عندها عيال 
ولا ادري ان فلان ولد فلان 
يعني اعرف الحريم بس ماعرف عيالهم ابدااً 




بيوم رحنا نزور اخوي المغرب وقال بيجون عيال فلان ، هم ماشاء الله 6 وجو 4 وقتها كنت احسب ان فلانه بس معها 4 المتزوجين وحسبتهم هم اللي بيجون لان ما ادري ان عندها 2 اصغر ومو متزوجين




يوم تأخرو اخوي قال لي يلا قومي ساعديني ابي اتمشى بالممرات ، ( لانه يدوخ ولازم مساعده ) 
واحنا نمشي شاف لوحه قدام الاصانصير مكتوب عليها ادعيه للمريض وبجنبها كرسيين وجلس ع واحد وقال اقري علي وصار اللي يدخل او يطلع من الاصانصير يشوفنا 
وحطيت يدي ع راسه وجلست اقرأ وشوي جو 4 شافونا طبعاً حسيت انهم هم اللي بيزورون اخوي بس انا ماعرف اشكالهم ابدااااً ولا بحياتي شفتهم حتى يوم انا صغيره ما اطلع لهم بالاستراحات ابدااً 
وقفوا شافو اخوي وعرفوه ومشو للغرفه ، 
اخوي مايشوف البعيد لازم نظاره ووقتها مب لابسها 
القسم مافيه احد الا اخوي وكم شخص بس بغرف بعيده ، والمناوبات كانو ممرضات لذلك اخذت راحتي وماكنت مغطيه عيوني يعني بس نقاب ، 
وقال اخوي يلا ومشينا مرينا ع غرفته ماشفنا احد قال اجل مب هم 
ومشيناا مشينا ووصلنا عند باب وفتحته انا اخوي مايقدر دفيته ومسكت اخوي الا اشوفهم يطالعون ، ومشيت لما صرنا قريب منهم ، وبعدين قالو اهليييين فلان ، وهو وقف 
( انا انحرجت ومشيت مشيت وتعديت الباب الثاني وصرت وراه بس ماقدر ارجع لأهلي ) 
سلم عليهم وقال يلا تفضلو الغرفه
قالو خذ اختك قال لا عادي تعالو ، قصدو انو انا بلحقهم مب حلوه يتركهم وهم مايدلون الغرفه 
لما صارو بعيد انا ع طول مشيت وراهم وغطيت عيوني
ويوم بيدخلون الغرفه انا احسبهم كلهم دخلو طلع فيه واحد يتباطأ ولف ناظرني نظره سريعه وصد 




( من بعدها انا صرت اسأل مين هم وش اسمائهم وووالخ وعرفت عنهم كل شيء تقريباً ) 
تعلقت بواحد فيهم من كثر مايمدحه ابوي 
وهالواحد مره اخوي كان مسافر لوحده وقابله بديرتنا ومره اهتم بأخوي اهتمام جميل 
هو اكبر مني ب 10 سنوات واخوي اصغر مني بسنتين 
يعني فرق السن بينهم 
لكن هو اخلاقه جميله جدا ومحترم وساكن بنفس مدينتنا ومو متزوج 




المهم بالعيد ولد خالي يبي يجينا هو ومرته 
الشاب اللي اتكلم عنه اخو البنت ، ف قالهم خلاص انا بوصلكم 
بس ولد خالي لما دق ع امي قاله بنجيك بس ماقال من بيجي معه يعني ماكنا ندري 




بس انا كنت حاسه انه بيجي معه 
واهتميت جدااً بنظافة المجلس وبالتقديمات 
والقهوه والشاي ، واهتميت بترتيب سفرة العشاء ، اشتغلت شغل مكثف وماحسيت بتعب كنت مبسوطه ومهتمه 
وجانا معهم مثل ماتوقعت وجلس عندنا وقت طويل وهو ثاني مره يدخل بيتنا بس هالمره طووووووول جلس 5 ساعات تقريباا 




ومن بعدهاا انا بدت معي الاحلام ، احلم فيه كل مانمت ، وتعلقت فيه واذا جاء طاريه يفز قلبي ، واحس اني ابيه ، 




وقبل كم يوم مر علينا ولما وصل تحت قال لاخوي انا تحت بطلع اسلم ع ابوك 
وقتها كنت تو مرتبه المجلس ومبخرته وما ادري انو احد بيجي 
بس كذا روتين يومي ، 
و جانا وسلم جلس نص ساعه وبسرعه جهزت القهوه وكان فيه حلاء وتمر وطلعتها ، واهتميت برضو بالشكل ، 
وبعدين تقهوا وطلع واخذ اخوي معه 
وجلس يسأل اخوي عن اهل امي من وين وكذا 
لانه يعرف اهل ابوي لانو هو من جماعة ابوي اصلاً 
وقعد يمدح ببيتنا ويقول ماشاء الله نظيف وحلو ومن هالكلام 




( انا انبسطت من هالكلام جداً ، ) 
تشوفونه عادي صح ،!! 
بس انا يابنات متعلقه فيه والله ليل نهار ادعي انو يصير من نصيبي مره مره ابيه 
ماني مراهقه والله ، لو مراهقه اهتميت باحد ثاني مو فيه ، 
كل ماجاء طاريه احس بسعاده ويفز قلبي 




قدددد ما اقدر اتناساه بس ماعرف ليه كل مادعيت ادعي انه يكون نصيبي ، 




انا مابيه بالحرام ابيه بالحلال 
الغلط ابدااً ما ابيه والحمد لله الله يعصمنا عن الحرام 




هل هالشيء غلط ؟ 
وش اسوي انصحوني بشيء يكون لمصلحتي 




ترا نا افكر فيه ليل نهار ولا واقفه ع الاطلال 
لا لا ، بس مرات بدون ما افكر فيه قبل النوم احلم فيه ، واذا جاء طاريه يفز قلبي ( والله توني اعرف معنى يفز قلبي ، اول مره اعيش هالشعور ، ) 




( اللهم اغنني بحلالك عن حرامك وبفضلك عمن سواك ) 

ماكتبته لكم الا لاني اشوفكم مثل اخوات واتمنى تحترموني مثل ما احترم كل وحده فيكم 

19 تعليق 2,460 مشاهدة

شاركي في النقاش

سجلي الدخول لإضافة تعليق.

التعليقات

18
  1. يارب ان كان لك فيه خيره ان الله يجعله من نصيبك
    انصحك ماتهتمين بالموضوع كثير
    حاولي تنشغلين بشي ثاني
    ان جاء حياه الله
    ماجاء الله يرزقك باللي لك فيه الصلاح
  2. @hrm_nkyb

    ههههههههههههههههههههههههههه
    حب من اول نظرة
    بس يارب اذا كان فيه خير لك يجي اذا شر يبعده عنك
    بعدين زياراته كثيره يمكن ناوي يخطب
    اهم شي تبشرينا بخطبتك سوا هو ولا غيره
  3. @ahla_mlak_4

    ههههههههههههههههههه اعرف دا الشعور ..مرررررة حلو ويخوف بنفس الوقت

    ربي يجعله من نصيبك ..وربي يعجلك بكل خير ان شاء الله

تابعي تجارب أخرى من هذا القسم.