زوجي عجزت افهمه

زوجك متسلط
ويشعر بالنقص في رجولته
لهذا يحاول يثبتها واضح من تكراره كلمة (انتي تبين تمشيني على كيفك )
مايقول كذا اللي يحس بالنقص في نفسه وان الآخرين يستهينون فيه ويبون يمشونه على كيفهم
غير انه يحاول يعزلك عن العالم ويستفرد فيك
هذا خلل رئيسي عند الشخصية المتسلطة
اقرأي عنها وتشوفين صفات زوجك كلللها تنطبق عليه
يحاول يقلل من ثقة الضحية بنفسها بكثرة الانتقاد والتقليل من شأنها واشعارها بالنقص وانها غير أهل للقيام بأي عمل
وانه غبيه وانها ماتعرف شئ وانها دايم تخرب وماتعرف تصلح وانها دايم غلطانه ووووو
الين يتمكن من تحطيم ثقتك بنفسك وانتزاع تقديرك لذاتك
ثم بعدها يحاول يعزلك عن الناس وتحديد علاقاتك وانه ما يتم شئ بحياتك دون علمه
غير الشك اللي هي الأساس بهذي الشخصية
و زوجك لما ما يوافق تروحين مكان متواعده مع حد فيه الا لما يشوفهم لأنه يشك فيك
واضحه زي عين الشمس
يخاف انك تكذبين ومواعده احد ثاني فيبي يتأكد من صدق كلامك
عموماً الكثير من صفاته تنطبق على غالب الرجال السعوديين ولا يخلو سعودي من صفه وحده على الأقل
لو اقلها انه ما يعتذر ويحط الغلط دائماً وابداً على الزوجه

يبي لك تلحقين ع نفسك وتضعين له حدود معينه ما تسمحين له يتجاوزها معك
يعني ما تسلمينه حياتك وعلاقاتك يتحكم فيها زي ما يبي
ومن ناحية انه يفهم كلامك غلط ويحاسبك بعدين شكله نفسيه الله يعينك
لكن اصبري على هالنقطه وتجاهليه
واذا هدأ قولي انت تحلل الأمور تحليل غلط وتحملها على الجانب السئ وعندك سوء الظن مقدم على حُسن الظن
والرسول يقول ان بعض الظن اثم انا ما باقعد طول عمري ابرر لك كلامي وتصرفاتي من اليوم ورايح تبي تعتب تبي تلوم على اي شئ قلته بكيفك ما راح تلقى مني اي تبرير لأني اتكلم بعفوية وانت تحملها غلط

سامحيني طولت عليك بس والله طبيعة زوجك تضايق مره
الله يعينك يارب ويسخره لك
لكن مثل ما قلت لك
لا تصدقينه في انتقاداته لك وتخسرين ثقتك
ولا تسلمينه كل شئ بحياتك يتحكم فيه
حطي خطوط وحدود يحترمها حتى تكملين معاه حياة
وفهميه هالشئ زين
موفقه

كلامك جدااااا ممتاز يا أخت نضال فعلا هو زي ماقلتي  

حسبي الله على الرجال غربلونا وياكثر مشاكلهم
عزي على جنس حواء مالكم الا الصبر العوض بالجنه

اول شي اعتقد كلمة اغلب السعوديين هذي مال امها الداعي لو ماقلتيها يكون اطيب
الزين والشين بكل مكان بالسعوديين وبغير السعوديين وعيب عليك هالكلام اذا كنت سعوديه
واذا مانتي سعوديه فمالك خص بهم وخليهم بحالهم وبرضو عيب
ثانيا : علي اي اساس قلتي يشك فيكي
مبسوطه انك دخلتي الشك بقلبها
ياختي انا وحده من الناس لو اموووت ماينزلني زوجي بالسوق لحالي
او بالحديقه بجمعة اهلي الا لما يشوف واحد منهم
لانه بصراحه يحبني ويغار علي مررره فوق ماتتصورين
وعمري مافكرت انه يشك فيني بالعكس يقول اخاف احد يتعرض لك ساعتها ماسامح نفسي
لان بمدينتا صارت قضايا كثيره الله يكفينا الشر حريم وسحر وبلاوي زرقا
الشاهد :يمكن زوجها يغار عليها
يوم انك تليقفين وتقولين يشك ابفهم ليه
على اي اساس؟؟؟؟
والله بعض هالعضوات زيك لو تسكت يكون افضل
لانه جالسه تفتي من راسها وردوها تخرب بيوت
الحين الحرمه تعبانه نفسيتها وانتي تزودينها ؟؟ تدخلين الشك بقلبها؟؟؟ وش مصلحتك
لاتطلقت وانحرمت من بنتها؟؟
وياليته صح كله تخمين بتخمين


عموما صاحبة المشكله اجلسي مع زوجك بجلسه رومانسيه هاديه وطلعي اللي بقلبك
ووضحي له كل شي
وحطي حدود لتصرفاته
وان مانفع حاولي تثقلين عليه شووي وتقرصين اذونته الين مايتعدل

يا بريق الشمال أسأل الله ان ينير بصرك وبصيرتك أو يريح المنتدى من أمثالك
أولاً زوجك يغار عليك لهذا السبب ينزل معك
لكن هل باقي صفاته مثل ما قالت أخت لمى راشد ؟!!
لو كانت هذي مشكلتها الوحيده بأقول اي يغار عليك يا لمى
لكن وصفت الشخصية المريضه بالتسلط
وعقبت على كلامي وقالت صحيح كله نفس الوصف
وتجين يا برق مدري رعد وتقولين ليييييش تدخلين الشك ؟!!
مدري من وين تفكرين صراحه ولو حبيتي تنتقدين ردي انتقدي بأدب أو ترى ما عندي أي مشكله أعلمك أنتي وأمثالك الإحترام
أعوذ بالله وش هالعُقد عند بعض العضوات

ومن ناحية السعوديين ليه ياقلبي ثارت فيك حميّة الجاهليه
أولاً انا لست سعوديه انا عربيه من جزيرة العرب ومن قلب الجزيرة
وما انسب نفسي لعايله هذا من ناحية
من ناحية أخرى مدري وش محسسكم يا اهل الحمية انتم من كلمة سعودييين ههههه
نعم أغلب السعوديين عُقد نفسيه ، قوتهم على النساء ، عاداتهم جاهليه ومعتقداتهم عن المرأة كلها خطأ بحكم البيئه والتربيه والمجتمع اللي أعطاه السوط ليجلد المرأة ويكتم انفاسها لو اشتكت
لدرجة يزني منهم الزناة ويقول مرتي مقصره
او هي السبب
معروفه نظرة السعوديين للمرأة عموماً
يعني بالعربي لا تغطين السماء بموخل
وبعدين لو كنت غير (سعودية ) مع تحفظي على اسم الجنسيه الغريب اللي ألغى أصولي العريقة وأجدادي ولا فخر انما للتوضيح ونسبني لعائلة قد تكون عائلتي أكثر عراقه وعمق في الجزيرة العربيه
ارجع اقول لو كنت غير (سعودية) يصير مالي حق انتقد ؟! في اي مذهب او شريعه هالكلام ؟! صراحه الو مره اسمعه منك
ومن بعض الناس اللي باقي ما انقرضوا من عصور الجاهلية
لأن ما اخبر فيه لحم مسموم وممنوع من النقد غير الأنبياء
لكن سعودي او يهودي كلكم معرضين للنقد وجائز شرعاً وعُرفاً
يعني خلي عنك الهياط الفاضي يا سعوديه انتي
عموماً ما بدخل معك في تفاصيل خارج الموضوع
ولكن أتمنى اذا كان عندك تعقيب على رد معين لي أو لغيري
تحترمين الرأي الآخر
اذا اختلف مع رأيك ما يمنع توضحين هالشئ لكن في حدود الأدب والاحترام
احنا هنا كلنا كبار وناضجات وبالغات يعني مافيه داعي نمسك أحد نربيه من جديد
لهذا احترمي الآخرين حتى تلقين احترام
عيب والله


وأنتي أخت لمى أتمنى تعملين نصيحتي الأولى وانتبهي يحكم سيطرته عليك وعلى تفكيرك وحياتك وعلاقاتك لأن بعدين مراح يستغني عن الحكم والسيطرة لو سلمتيه اياها
لأن عنده خلل بشخصيته
ولو تحاولين توصلين لإستشارة نفسيه بخصوص هالنوع من الشخصيات وطريقة التعامل معهم يكون أفضل
الله يعينك وييسر أمرك