القصــه الرابـــعه لجــدتـي :
تقول جــدتـي كان عنـدها بنت عمــرها 5سنـــوات وولــد عمره سنتين
تقول في يــوم من الايــام جتـني حــرمه تعرفها جدتــي جيران يعني
تقول جلسـنا نسولـف ونشـرب لبـن تونـي حاضته في السعـن ــ يعنـي قـربه مصنــوعه من الجلد
المهم وهـم جالسين جـت البنت بنت جدتــي وجلست تـلعب عندهـم
تقول جـدتي بنتي بيضـــاء مره وجميـله سبحان الله
تقول صارت الحرمـه تناظرها وهي تلعـب وتقــول يوووه يانـوره
هالبنـت جايـه منك انتــي!
تقول وانا اضحـك منها حسبـتها تمــزح .....
والحرمه كل شوي تقــول يازين بنتــك يانــوره ياليــت البــنت هـذي كبيــــره
والله مايخذها غـــير ولــدي
المهــم مشـت الحـرمه. المغـــــرب
وذاك اليـــوم جدي مـــو موجـود في الديــره مســافـر ياخذ بالشهـــور يـدور رزقــه واذا جاء معــه شـي يكفيــهم
فتـره يـرجــع عشان زوجتـه وعيــاله وهكذا شهر عندهم
ويـرجع يسـافر .... وهم يجلسـون لحـالهم
بـعد مالحرمه راحـت تقول جدتي عشيـت اطفالي ونمـت
ذاك الزمان بعد المغرب وهــم نايمين ..
تقول صحيـت الفجـر الا واسمـع صـوت بنتـي تـون صوتـها يخوووف
تقول واجـي اركض واقـرب من بنتـي الا والحــراره الي مولــعه
تقول بنتي ترجـف وحرارتها من قوتها تكـوي في اليـد تقول واجيب
مـويـه واحط عليـها وماكـأنـي اسـوي شــي ابـدا
المهـم تقول جـربت كل شي عشان تنـزل حرارتـها
ومافيـه فـايـده
آخــر شـي اخذت بنتـي في حضـني وجلسـت ابكـي وابـوسهـا
واضمهــا تقول عـرفت انها بتمـوت لانهـا تحتــضـر
ماطلـعت شمـس ذاك اليــوم الا وهــــي ميــته
آآآآه ياحـزن جـدتـي اذا ذكرت هالبنت سبحان الله تدمع عيـونها وتجلس فتـره وهـي ساكتــه
تقول شلـت بنتــي وطلعــت الجبــل الجــبل مو كبيـر مره لا يعــني صغيــر
تقول واطـــلع واحط بنتــي عليـــه والفها بقطعـة قمـاش
وبروح اعلــم جارتي تجـي تغسلها معي
عشان الريجيل يادفنونها
تقول وانـا نازلــه الا واشوف ولدي الصغير يتمشى
عنـد الخيـمه ويقول ساره ساره ينادي على اختـه تقــووول بكييييييت
واطالع في الجبــل يـم بنتــي واشوف الغنـم تـركب على بنـتي وتاكـل
القماش الـي عليها
وانـا مثل المربوطه ماسويـت شـي
شافتها جارتها وجتـها وعلمتها جـدتــي بالسـالفه وراحت الجاره وعلمت حريـم الديره
وغسلنها ودفــنوها
اللـه يرحمهـا
تقـول جدتـي صرت ماحـب جارتي هذي كلـه من عيـنها طوول ماهي تنــاظـر في بنتي وماتذكـر الله
♥★♥
قصـــص جــدتـــــي قبـــل 70 سنـــــــــه .....!!!
متابعة النقاش، صفحة 9