للسعوديات فقط احكولنا كيف اجوائكم ومناسباتكم

اهلين حبيبتي منوره وكلنا أبناء ادم وحواء مافي فرق انتي إيش جنسيتك وأنا بتكلم عن عاداتنا إحنا من أهل نجد إذا الرجال بتزوج عندنا يساعدونه عيال عمه واخوانه وجماعته في المهر وكل شئ يعني كل واحد يعطيه اللي يقدر عليه والحريم نفس الشي يساعدونه أما الوحدة إذا ولدت عندنا ما يقصرون عندها بالإكل بالحلا بالمعجنات بالهدايا أو بمبالغ ماليه اللي يقدرو عليه مافيه تشرط وإذاماعندها شغاله ما نطلع الالماننظف البيت من غسل الأواني والكنس ونغسل لها الملابس ونكويهامانخليهاتحتاج لاحد هاذا طبعنا والله يسر امورنا أسف على الاطاله

انا من القصيم وعايشه بالرياض
وتقريباً العادات في الرياض والقصيم وحدة او متقاربه كثير عند اهل نجد
الزواج تقليدي تختارها الام واخوات العريس بعدين يشوفها الزوج شوفه شرعيه واذا عجبته يتم الزواج وفي فترة الملكة يتعرف عليها ويزورها ويكلمها
الزواج يبدأ تسع او عشر بالليل وينتهي ٣ او الى الفجر ويكون فيه تقديم للاسف مبالغ فيه جداً جداً جداً
بشكل عام زواجاتنا مكلفه ويكون فيه مطربه وحالياً اغلب الزواجات مطرب ويحطون عند الحريم شاشات نشوف المطرب والشباب اللي يرقصون عنده والحريم طبعاً يرقصون على غناء هالمطرب عن طريق السماعات
وقرايب العروسه غالباً يهدونها ذهب حسب قدرتهم ( غالباً طقم ) والولد مساعدة مالية واحياناً فلوس وذهب
في الولاده لازم القرايب المقربين نزور الوالدة بالمستشفى ونهديها ورد وشوكلاته
بعدها الزيارة الثانية بالبيت ونهديها وقتها فلوس مغلفه بشكل مرتب اقلها ٢٠٠ ريال وانت طالعه حسب القدرة والقرابه والوالدة تحدد متى يناسبها وقت الزيارة يعني تخلي اهل زوجها كلهم يجون دفعه وحده وغالباً هالزيارة مكلفه مالياً جداً لازم التقديم على سنقة عشره وتجيب خادمات يصبون القهوه والحلا والعشاء بوفيه مفتوح
وتحدد وقت لزيارة اهل ابوها ووقت لزيارة اهل امها مثلاً وكل زيارة بعد مكلفه بس غالباً اقل من اهل الزوج
واحياناً تحدد يوم تنادي فيه الجميع وتخلي التكاليف مرره وحده طبعاً التكاليف بتعوضها بالهدايا هههههه
في العيد بما ان عائلتنا كبيرة ماشاء الله فعيد الفطر يكون بقصر افراح كبير ويكون تقريباً نسخه من التقديم والعشا للزواجات بس الفرق انه الصباح وان فيه اطفال غالباً يكون لهم فعاليات خاصه والتكاليف تكون من صندوق العائلة اللي يدعمه تجار العيله وحتى الافراد المتوسطي الحاله
بعد الظهر نتفرق والكل يروح يرتاح شوي بعدها نعايد اهلنا اللي ما عايدناهم ويكون فيه اجتماعات مصغره بالليل ولازم كل وحده متزوجه تكون مسويه هدايا للاطفال توزعهم عليهم
النساء ولله الحمد في مجتمعي ٩٩٪ منهم متعلمات وموظفات وماخذين حقوقهم كامله ولله الحمد

شكرا لك على ذوووقك ارفع لك القبعه
هذا دليل على نيتك وطيبتك انتي
اترك بقيت الكلام لاخواتي

ترا حتى حنا نشوف حياتكم حلوة وانكم مبسوطين وان فيه اشياء نتمناه عندنا مانلقاها
واشكرك جدا الي سالتي ومااخذتي مايحصل في البرامج او المسلسلات لانها ماتمثلنا ابدا