شاركي في النقاش

سجلي الدخول لإضافة تعليق.

التعليقات

22

  1. @amooon_8

    ممتاز جداً
    ماشاءالله عليك ربي يحميك ويسعدك ويفتح عليك كل أبوابه

    انا تابعت موضوعك عن الفساتين بس كنت منتظره تكملينه
    وموضوعك هذا أهم موضوع في القسم وتستاهلين عليه أقوى تقييم
    ربنا يبارك فيك وفي مالك وامورك ويستر عليك ويسهل امرك

  2. @amooon_8

    وبسمع ان صفحة تجارية على الفيس بوك كمان ممكن تنجح مشروعك خاصة اذا عملتي إعلان مدفوع

  4. @bnooot_mshaghb

    صاحبة الموضوع
    شكككرا لكم كثير .. ردودكم تووونس
    بالنسبة للفيس بوك .. ماحبيته ولا لي فيه بس اذا انتي عندك خبره فيه شي حلوة تنشري منتجاتك باكثر من موقع مولازم تقتصري على موقع واحد ..



    دقايق وراجعه بتكملة الموضوع

  5. @bnooot_mshaghb

    صاحبة الموضوع


    نصائح وافكار

    1 ) اهم شيء النشاط.. ثم النشاط.. ثم النشاط

    لاتملين اذا جلستي شهر او شهرين ومتابعينك ماوصلو المية.. اضيفي.. وتفاعلي مع الناس.. علقي على تغريداتهم وصورهم.. ارسلي لهم اعلانات عن حسابك.. يعني كوني نشيييطه وبهمه عاليه


    2) التصوير::
    لاحظت اغلب الناس يجذبهم التصوير الاحترافي ..الاغراض الكيوت.. الخلفيات الحلوة وكذا يعني التصوير المتعوب عليه
    موشرط تكون كاميرتك كانون او نيكون..او تكوني محترفه تصوير
    كاميرا الجالكسي والايفون ممتازة.. حاولي تاخذي لقطه واضحه وبزاوية حلوة للبضاعه.. حطيها بمكان حلو وبزاية حلوة ببيتك.. يكون الديكور اللي حولها حلو.. نزلي صور للبضاعه وهي مغلفه.. اكتبي تحتها (( بالعافيه على زبايني))
    اذا تبيعي اغراض صغيره تقدري تسوي استوديو تصوير صغيير ..ومن اغراض جدا بسيطه

    وحده كانت تنزل صوور قمممه لا اضاءة لازوايا .. كل شي حلو.. ويون نزلت استوديو التصوير حقها انصدمت.. تخيلو خذت كرتون وقصته.. حطه فوقه قصدير يعكس الاضاءه.. وموجه كشاف للقصدير .. فقط؟؟ اغراض بسيطه لكن نتيجه ولا اروع

    .. تابعي حسابات مصورين محترفين.. عشان تتعلمين الزوايا الحلوة لاخذ الصور..
    سوي تاثيرا بسيطه وراقيه بالفوتشوب ..بس لاتزحمين الصورة خليها بسيطه وناعمه تكون اقرب للقلب
    لازم تتعبين وتجتهدين عشان تطورين نفسك.. احيانا من جمال الصورة ودك تشترين منها

    هالصورة لوحده تبيع اغراض ومن ضمنها اكواب
    شوفي طريقة تصويرها للكوب..






    جمال الصورة واهتمامها بالتفاصيل ترغبك تشترين منها

    3) كوني محبوبة..
    تفاعلي مع الناس.. علقي على صورهم بادب.. امزحي بحدود.. اشكريهم .. الناس مافتحت حساباتها الا لانهم يبون يتفاعلون معهم.. بيفرحون كثير لمايشوفون رد .. ومزيد من التواصل بيخلق ثقه بينكم.. ولوحبت تطلب منتج انتي توفرينه.. صدقيني بتكونين ان شاء الله خيارها الاول بما انك دائما متفاعله مع صفحتها ومع تغريداتها..

    هالتفاعل سويه لما تفضين وتجلسين تطقطقين على جهازك..
    بنفس الوقت لما تجيك الزبونة على الواتس لاتصيرين مررة ميانه معها وطق حنك.. حاولي تكوني رسمية ولكن بذوق وادب وبدون ماتحس انك جلفه.. حطي فيسات ظريفة.. ناديها ب اختي.. عزيزتي.. ياعسل ....الخ


    4)افضل وسيلة تواصل

    اغلب الناس تفضل تتواصل معك مباشرة .. يعني مو ايميلات تنتظر متى تردين.. او على الخاص
    اشوف افضل شي واتساب.. اذا ماكنتي جريئة بالمكالمات مثلي.. خليه واتساب.. ولاتردين على الارقام الغريبة..
    اذا انتي فعلا حابة تكسبي.. تحملي الزبونات الغير الجادات.. تحملي ناس تتصل ..

    مع اني موضحه ان التواصل واتساب فقط ولا ارد على المكالمات.. الا ان لازم مايمر اسبوع الا ورقم داق..طبعا اتجاهل الارقام الغريبة.. بس الحمدلله فقط مرة بالاسبوع يعني مو ذاك الازعاج

    والافضل تخصصي رقم خاص ومتى ماحبيتي ترتاحي.. فقط اتركي للزبائن رسالة انك بتقفلين جهازك لمدة يوم .. بكذا ارتحتي وبنفس الوقت خليتي وسيلى تواصل ممتازة بينك وبين الزبائن

    اول مابدات كنت بتويتر وكانو الزبائن يتواصلون معي على الخاص ..جلست تقريبا 3 شهور وانا ارد على استفسارات فقط بدون طلبات جاده وكنت كل يومين او 3 اتلقى رسالة .. حسيت بياس وكنت ادور مشروع ثاني..
    لين مرة خطرت على بالي احط واتس..
    والله باليوم كانت توصلني اكثر من4 ارقام تستفسر.. صحيح بعضهم مو جادات لكن هذا يتيح لك تقنعين بعضهم.. والحمدلله خلال شهرين تقريبا استقبلت 4 طلبات فساتين ..


    5) اصنعي لك اسمك الخاص

    اعطي متجرك اسم واحد استخدميه بجميع حساباتك.. واعتمديه ولاتغيرينه.. وسوي لك شعار خاص .. واذا تطورتي اكثر واكثر تعاملي مع مطبعه يسوون لك اكياس واطبعي عليها شعارك.. اهتمي بالتغليف وقدمي المنتج للزبونة وكانه هديه.. حتى لوكان عادي زي مكياج مثلا.. او سعره مرتفع شوي.. لما يوصلها وهو بشكل مرتب ماراح تتحسف انها شرته.. خليكي ذوق في عرض بضاعتك.. في اسلوبك .. في تقديم المنتجات


    6) احبي منتجاتك..بيحبونها الناس

    اعطي فكرة انك تتاجرين لانك طموحه.. لانك تحبين هالمجال.. لانك حابة تستقلي بدخلك الخاص..
    خلي الناس تاخذ عنك فكرة انك مو مجرد تاجرة تبي تربح وتتكسب.. لا كوني مبدعه ومهتمه بتطوير نفسك
    اشوف كثير تاجرات بانستغرام رغم ان منتجاتهم عاديه لكن ودك تشترين منها لانك تحسين انها فعلا تبيع شي تحبه هي.. لاتقولين طاحت البضاعه بكبدي.. !!
    لا استمري وحاولي وتفنني في تقديمها وعرضها..

    في تاجرات يبيعون ماركات مكياج والف تاجرة تبيع نفس الاغراض ..
    بس ليش بعضهم زباينهم اكثر .. اكيد نتفق ان السبب الرئيسي هو توفيق من الله.. ولكن للتجارة فنون واسرار

    بعضهم تحط ماركة المكياج.. وتحط معاه صور كيف تسوين ظل.. او تعطي نصائح تجميلية بحسابها..تطلع الزبائن على اسرار ماركات المكياج وايش اللي يناسب البشرات وكذا.. موبس تسرد بضاعتها .. تخلي متابعينها اذا ماقدرو يشترون يستفيدون ..

    في تاجره رااااائعه اتابعها بشغف رغم اني مافكرت قبل اشتري اشياء زي اللي تبيعها بس من متابعتي لها عشقت منتجاتها ونويت اطلب كمية منها واتمنى انها توصل للسعويده
    هي كويتيه اسم حسابها جلاموريس


    هي طبعا تسوي صوابين باشكال خياليه وهي تصنعها بنفسها وبمكونات مفيده..
    هي ماتسوي الصابون وتصورة وعرضته فقط.. لا تصور ممراحل صناعه الصابون.. تشاركنا افكارها لصوابين جديده.. اذا شرت اشياء خاصة بالصوابين صورتها.. واحيانا تعطي وصفاتها للصوابين..

    هذا غير اسلوبها العسل والراقي والمتواضع
    لانها تحب عملها.. وتشارك الاخرين تفاصيل جميلة من تجارتها خلت الناس تحب تشتري منها


    وهذا قطره من بحر في عالم التجارة.. وما اقول اني خلاص عرفت كل شي.. ولكن هذا ما اتعلمه واستشفه من متابعتي للتاجرات وممارستي لهذه المهنة الجميلة

    وهنا اهم النقاط اللي لازم تتوفر فيك
    1)الطموح وعدم الياس.. والفشل ثم التغلب على نقاط الفشل واالاستمرار اكبر نجاح
    2) الابداع في اختيار مشروعك.. والابداع في ابتكار اساليب التسويق وعرض المنتجات
    3) ان تكون المنتجات على مستوى عالي من الجوده وتكون فعلا تستحق المبلغ اللي يدفعه الزبون
    3) حبك وعشقك لمشروعك ..يخلي الناس تحبه
    4) والاهم ان تكوني على قدر من الاخلاق والتعامل الراقي تذكري المقولة المشهورة في عالم التجارة
    (( اذا كسبتي زبون واحد راح يكسبك زبون اخر... واذا خسرتي زبون راح يخسرك عشرة زباين))


    وامنيتي منكم هو فقط.. دعوة في ظهر الغيب ان يرزقني الله.. وافتح بوتيك على ارض الواقع
    شكرا لكم..

تابعي تجارب أخرى من هذا القسم.