شاركي في النقاش

سجلي الدخول لإضافة تعليق.

التعليقات

57
  1. @ashtkt_layam_raht



    اول شيء الحمدلله على سلامتك انتي الام انتي الاهم والاطفال يتعوضون ان شاء الله لان الام هي الاهم في هذا الوضع والحمدلله ولدتي طبيعي هذا الشي بحد ذاته ايجابي تخيلي انك عمليه وفيك جرح الحين والتهابات راح يكون الوضع اسوأ

    شعورك طبيعي انك تحسين نفسك تعلقتي فيه لكن بأذن الله الواحد الاحد فتره وبتعدي يعني بعد فتره ان شاء الله بتحسين الموضوع اسهل من الحين

    وبالنسبه للملابس والتجهيزات لاتخلين اي قطعه عندك كلها تصدقي فيها وديها اقرب مبرة احسان لاتقولين انا تكلفت فيها بخبيها اذا ولدت مره ثانيه الله بيرزقك ان شاء الله وتشترين احلى منها صدقيني اذا تصدقتي فيها بينكتب لك اجر كبيررر وماتدرين يمكن هالصدقه تكون سبب عوض ربي عليك او سعادتك بأمور ثانيه


    الشيطان لايوسوس لك ويقول انتي السبب هالشيء رب العالمين كاتبه لك وكل ماوسوس لك قولي اللهم لك الحمد على كل حال اللهم هذا الطفل رزق منك انتي الذي اعطيتنياه وانت الذي اخذته فلك الحمد على كل حال لانك قدرت لي الشيء اللي فيه خير لي

    صدقيني لو مافيه خير لك كان الحين حي ..خلي ثقتك بالله كبيره ان هالشيء خيررره تخيلي هالطفل عاش وصار مريض من مستشفى الى مستشفى وكل يوم تتعذبين وانتي تشوفينه تعبان وماتقدرين تسوين له شي

    بعدين ليه ماتنظرين للموضوع من ناحية الشفاعه يمكن ربي يحبك ويبي هالطفل يكون شفيع لك انتي و ابوه يوم القيامه
    ياحظك يمكن هالطفل بيدخلك الجنه وينتظرك عن بابها ان شاء الله وش احلى من هالحظ


    طيب انتي ماشاء الله تحملين وتنجبين اطفال.. غيرك ماتحمل ابدا ولاتنجب حتى الدورة ماتجيها وناس سرطانات بالارحام ويستأصلونها وناس تتعالج سنين طويله عشان بس تتعدل هرموناتها او هرمونات زوجها ويسافرون ويتكلفون وبالاخير مافيه حمل


    لاتجلسين وحدك ابدا خليك مع اهلك طول اليوم خلي انسيك القران حتى لو كنتي نفاس البسي قفازات واقري ايات الرحمن .. الاستغفار لاتتركينه ابدا استغفري طول الوقت) .. ادعي كثيرر اللهم عوضني انت خير من يعوض اللهم اني راضيه بقضائك وقدرك اللهم ارزقني رزقا يريح قلبي ياكريم


    كم اسبوع وتطلعين من الاربعين روحي السوق ادري كلامي ماله داعي بس بقوله روحي السوق اشتري اشياء جديده عطور جديده ملابس بتتجدد نفسيتك وبأذن الله ماتجي السنه الجايه الا وانتي حامل اذا ربي احيانا واذا ظروفك تسمح لك روحي عمره واذا ماتقدرين بوقت ثاني ان شاء الله




    ما اقولك لاتبكين ابد ابكي ومحد بيلومك بالشي ذا بس حاولي تقرين كلامي اكثر من مره


    كلامي كثير بس كل اللي اقدر اقوله اسأل الله العظيم رحمن الدنيا والاخره ان يرزقك من حيث لاتحتسبين

تابعي تجارب أخرى من هذا القسم.