لقاء الأحبة *3*

زمان كان عندي هواية جمع أقلام الرصاص الدايبين و اللي فيهم آخر نفس بس،،،
و هلأ عندي هواية تجميع الأدعية، و بدور على الأدعية الغريبة و اللي بحسها بتفش القلب، بجمعها و بكتبها،،،

زهورة حلوة آخر هواية
بالنسبة للأقلام رفيئتي بالجامعه كانت هيك ومازالت عندها أقلام من أيام المدرسة

السلام عليكم ورحمة الله..

الله يسعد هاللمة اللي بتجلي الهم عن القلب..

والله فتحتو نفسي وأنا كتير مضغوطة وقلبي منفوخ من قصص هالأخبار وهم السفر ما باقيلي غير بكرة ..لأني مسافرة يوم الخميس العصر إذا ربنا راد..

إدعولي .. وما بنساكم إن شاء الله بدعيلكم بسفري.. معي شي 18-20 ساعة بالبر.. بدعي تأفلس!!

إنشالله أميرة بتروحي وبترجعي بالسلامة
ماتنسيني من دعواتك
الله يهونها عليك

و طالما نفسنا انفتحت على الهوايات،،،
من هواياتي كمان كان،،،
تجميع معلومات من الجرايد عن موضوع معين و لصقه في دفتر خاص،،، مثلا مقالة عن التفاح كنت أقصها، و بعدها تيجي مقالة تانية عن التفاح فيها زيادة معلومات عن الأولى بقصها و هيك لحد ما يكتمل الموضوع،،،
المهم الجرايد صاروا شبابيك من القص و كان أبوي يحكيلي ما عندك شغل غير هذا، و بعدها اهملت الهواية هاي لأنه صاروا ينزلوا مقالات تحكي عكس الموضوع ، إذا حكوا عن فائدة معينه لفاكهة و خضرة، تاني يوم ينزلوا عكس اللي نزلوه،،،
في كمان عندي هواية تجميع الكلمات المتقاطعة الصعبة و حلها، لما أشوف وحدة سهلة ما بحلها لأنها مش بحاجة لتفكير، و كمان الكلمات اللي فيها عن المطربين و أسماء الأغاني ما بحلها،،،