شايله هم المستقبل ساعدوني

السلام عليكم بنآت

ان شاء الله تكونون بخير وصحه وسلامه


بس بقول لكم عن موضوع مخوفني ومو قادره انام زين بسببه بس شايله هم جبال فوق رآسي يمكن تشوفونه مبالغه بس والله مقلقني اني مو متهنيه بشي بس ذابحني التفكير

انا باقي لي ترم واتخرج ان شاء الله وخايفه ما اتوظف واقعد بالبيت :( ابي يكون لي مصدر دخل غير زوجي واحس اني مستقله احس مجرد ماقعدت بدون عمل بيضيع كرتي وبصير مجرد قطعه أثاث زياده بالبيت :( وهالموضوع مررررره تاعبني


زوجي ماراح يقصر ان شاء الله بسس ماراح اعيش بترف زي ما انا متمنيه واعيش بناتي بمستوى يتمنونه



تكفون في احد زييي أحس اني مكبرتها بس ماني قادره اتخيل اني بكون ولا شي بدون شغله :(


ساعدوني

اذا في وحده كانت تفكر زيي وقعدت بدون وظيفه كيف حالها الان؟

واذا تخففون عني يجزاكم الجنه


والله ان راسي يعورني من كثر التفكير ب اني اقعد بالبيت باقي عمري واذا عن الدورات والاشياء ذي انا ابي مصدر دخل ارفه نفسي فيه لكذا شايله هم خصوصا العالم اللي عندي غالبيتهم الان عايشين بمستويات اعلى



لحد يهزيء لان مثل ماهو مهم عندي الموضوع عند غيري مايهم ومقدره :44: لكن غصب عني افكر فيه لاني انظر لاحتياجاتي انا وخواتي وكيف اننا نشوف اللي حولنا يسافرون وعايشين حياتهم واحنا ماوصلناهم واخاف بناتي يعيشون بنفس المستوى اللي عشناه خصوصا هالايام صعبه

وبنفس الوقت ابي استقل عن زوجي


الموضوع مخربط عذرا

11 تعليق 5,499 مشاهدة

شاركي في النقاش

سجلي الدخول لإضافة تعليق.

التعليقات

11
  1. @saaad_sol_mon

    لاتفكرين في المستقبل بتنفتح لك ابواب ان شاءالله الحين انتي ركزي في دراستك وتخرجي وبعدها سوي لنفسك سيرة ذاتيه وابدي ابحثي عن عمل
    اقبلي اي عمل ولو بسيط ومع الوقت والاحتكاك بتصيرين اكثر خبره وبتلقين فرص احسن واحسن
    احمدي ربك الحين الوظايف احسن من قبل عشر سنوات ماكان فيه وظايف ابد
    الحين المدارس الخاصه صارت رواتبهم زينه وبعد تقدرين تشتغلين ولو كاشيره بشكل مؤقت الين تلاقين فرصه احسن
    بس نصيحه لاتفكرين في الناس او انك تصيرين مثلهم لان طريقة التفكير هذي مرهقه وماتنتهي ابدا ولكن فكري انك تبنين نفسك وتكونين خبرات في الحياة وتصيرين اكثر حكمه وايضا الاستقلاليه زي ماقلتي مهمه جدا
    بس انتي لا تربكين نفسك الدنيا نمشيها خطوه خطوه والخطوة الي انتي فيها الحين الدراسه وبعد التخرج ابدي خططي
  2. @secret_softness

    حبيبتي رزقك مكتوب عند رب العالمين وبتاخذينه قبل أن يأتيك الأجل

    نصيحتي لك حبيبتي في التجاااااره

    وابدي على خفيف بعدين توسعي

    فرج الله همك وغمك
  3. @kly_ofaaa_12

    انا كنت زيك والله وافكر لكن الحمدلله تخرجت واللحين لي 4 سنوات وعااادي المهم عندي الشهاده والوظيفه جايه بأذن الله لاتفكري بالمستقبل لو كل وحده بتفكر وتلقى حل كان كلنا فكرنا بس تجيبي لنفسك الصداع والقلق والله لو ربي رايد لك تتوظفي بتتوظفي ع طول انتي بس هدي ع نفسك وقولي ان شاء الله اتوظف والشهاده بتكون موجوده مصيرها في يوم من الايام راح تخدمك
  4. @aryg_99_1

    ياعمري لازم تعرفي شغله انو ربي بيكتب لك الرزق ونصيبك بالوظيفه متى ماكانت ،والتفكير الي تفكري فيه تفكير طبيعي لكل وحده باقي لها ترم وتتخرج ،انتي ماعليك الا تشدين حيلك تجيبين معدل يرفعك بحيث يكون لك الاحقيه في شغل ما عن غيرك ،وصلي ركعتين قبل لاتنامين كل يوم واستغفري واستغفري واستغفري ،لاتفكرين ببعدين كل يوم وجايب لك رزقه معاه ~

تابعي تجارب أخرى من هذا القسم.