** تباشير مواليد يناير + فبراير 2014 **

أوركيد لعيونك كتبت تجربتي كااملة اول ماطلعوا الضيوف


بالبداية كل مواعيدي بالكشف ع البطن يقولون حلو الراس تحت بس مانزل للحوض




المهم
تتذكرون المشيمة متكلسة وكان عندي موعد تصوير يوم السبت الساعة9




اللي حصل انه من يوم الاثنين اللي قبل الموعد صارت تجيني طلوق فترة الصباح كل ربع او ثلث ساعة بعدين تختفي
وعلى هالحال لحد يوم الجمعة
حسيت الطلوق مو سهلة وصارت قوية لدرجة تصحيني من النوم ولا اقدر اتحرك لما تجي
بس برضو بين الوحدة والثانية ربع ساعة
وشفت كدرة بسيييطة بملابسي بس مااهتميت




ع الظهر تباعدت شوي
بس اذا جت حللت جيتها




العصر رتبت ملابس عيالي وطلعت لمحل قريب للبيت شريت لهم شنط كبار كانت لهم شنطة مشتركة خليتها للنونو
وتذكرنا اننا ماشرينا للنونو سرير
برضو قريب من بيتي محل اطفال شريت سلة موسى وجتني طلقتين بالمحل




بس كنت اكابر واقول مثل الايام اللي راحت اصلا عادي بيروح




استمرت للمغرب بينهم ربع ساعة او ثلث بس قووووية




بعد صلاة العشاء كان زوجي بيطلع للشباب
قلت له ودني لاهلي اتسلى وخل جوالك حولك




اول مانزلت عند اهلي عصرتني ذيك الطلقة اللي مااتلعب ابد
واروح لدورة المياه واحصل السدادة نزلت وانتم بالكرامة




لحد هنا وانا اقول بدرري يابنت الحلال
واطلع ابمزح مع حدى خواتي الا طلقة ثانية بنفس القوة




هنا خفت
واتصلت على زوجي وقال بدري وماادري ايش
انا قلت له بشيك واشوف اخاف احتاج المستشفى وانت بعيد..




دخلت الطوارئ الساعة 9وثلث
وسوو تخطيط الا الطلق يوصل ل115
ولما فحصت لقته فاتح4.5 بغيت انط من الفرحة<<تذكرت مها سعودي
عمري مارحت للمستشفى الا يكون 2 او1




دخلوني تنويم
ووقعنا على ابرة الظهر لاني فعلا تعبت من الطلوق اللي تهد ظهري وهي متباعدة..




اللي صار دخلت غرفة الولادة من هنا ورااااحت كل الطلوق تخيلوا!!
وصار يجي طلق يادوب يوصل ل19




ولحد الساعة 11ونص وانا على هالحال




جت الدكتورة المناوبة وسوت لي تحريض
قالت قومي امشي الراس مررة مرتفع








والحمدلله رجعت تشتغل الطلوق
وانا صرت امتر هالغرفة 
وقولهم ابي ابرة الظهر الطلق البارد يهد الحيل
وهم راافضين يقولون لحد ماتنتظم الطلوق




ع الساعة 2 جت تفحص
قالت 6_7
ويجيبون طبيب التخدير
انا وقتها قلت بنفسي وش بقي خلاص وصلنا 7 مابقى شي بس صاروا هم ادرى








طبيب التخدير قال بعطيك الابرة ماراح تسكن 100% بتحسين بشي بسيط علشان تساعدين وقت الولادة
وقال لو استمر معك الالم بعطيك اياها مرة ثانية وجلس زوجي يخاصمه انه خير تعيده على كيف امك هي
ههههههههه
عاد زوجي مستشر على الفلوس اللي اخذوا منا




المهم
اخذت الابرة 
وجلس مفعولها علشان يشتغل تقريبا 10_15د




وصرت مااحس بالطلوق نهائيا
بس اشوفها بالجهاز وتقولي الممرضة خذي نفس
اللي صار ان بنوتي الله يصلحها طقتها نووومة
وبردت الطلوق وهذي ثاني مرة تبرد
بس الحلو تااركيني براحتي لاعطوني طلق صناعي والا هولوا الموضوع
قالوا لاتخافين بيرجع بس بنصحي البيبي
وجابو جهاز كأنه هزاز المساج ويدورنه على بطني ويهزون البنت
غير انها الله يصلحها مايله لجهة اليمين
فكل شوي يحاولون يعدلونها وترجع مؤخرتها لليمين..
ورجع الطلق بس بقوة اقل بكثير
وقالت اذا حسيتي بالدفع بلغيني
وانا مااحس بشي نهائي




قلت لها نادي الدكتورة تشوف كم فاتح
قالت ان البيبي مرررة رفيع فلازم ينزل علشان تولدين
وانتي شوفي رجوله بالقفص الصدري..




خلتني وتغطيت وصرت اخذ غفوات
لحد ماصارت الساعة فوق5
جت كشفت توقعتها تقول 10
قالت يعني 8 بس البيبي مرررة مرتفع وقالتها بخيبة امل




جااني احباااط
طيب شسوي
قالت عادي اصبري لحد ماينزل




وكل هالفترة لافكوا موية ولا عطوني صناعي صبرووا علي لاخر لحظة
على اني طفشت وتمنيت يعطوني صناعي..




ع الساعة 6صرت احس بدف بس بسيط
قلت للقابلة
وشافت قالت نزل شي بسيط لسى بدري
واجلس ادعي خلاص مليييت
وابرة الظهر بدت تصفر يعني بينتهي المحلول
قالت لاتخافين بنحط جديد
قلت بنفسي والله صادقين يوم ماعطوني اياها الا على 7سم عارفين لي..




ع الساعة 7 بديت احس بدفع حقيقي
وبسرعة يتصلون ع الدكتورة عائشة
وانا اقولهم اي دكتورة بس بنتي لايجيها شي
قالوا لاتخافين متابعينها بالجهاز




هناااا المأساة اللي كنت خايفة منها
ماعرفت ادفع مع ابرة الظهر
مرة ادفع صح
ومرة ع الفاضي
واخذت وقت على بال ماشرفت حبيبتي
وحطوها على صدري
بعدين نظفوها ولبسوها وجابوها مرة ثانية
وحطوها عند صدري يبونها تمص
قلت ماتبي وخروا بس
وودها الحضانة




والحمدلله
حتى يبلغ الحمد منتهاه
وجت الساعة 9 موعدي والدكتورة تخيطني ياارب لك الحمد




مانسيتكم يااحلا تجمع
دعيت لكم
اسأل الله لكم تيسيرا وتسهيلا 
ولاتنسون الدعاااء وحسن الظن برب العباد
وربي كريم رحيم..

اوركيدا
انا دخلت على عائشة وساجيلا
كلهم مرررة مو راعين رجة
بالعكس عائشة صبرت علي بالدف وكانت قمة الهدوء
بصراحة حمدت ربي لاني استخرت ع المستشفى وع الدكتورة وربي ماخيب رجاي كانت دكتورة تجربتي معها الحمدلله ناجحة والفضل لله اولا واخرا

شيخة
ماسويت شي
من رب العالمين الحمدلله
شميت حلتيتة وشربتها وشربت كمون وحليب بعسل
بس كلهم ماحموا الطلق كلها من الواحد الاحد

مشكوورات اللي باركولي
الله يسعدكم يارب ويسهل عليكم..
خوالي ذكرتيني بنفسيتي بالاسبوع الاخير
توكلي على الله
ولدي رحت فاتح1سم وقاسي 
وهالمرة رحت فاتح4_5 ولين
وولادة ولدي اسهل وطلوقه على انها صناعي اهون وكانت برضو اسرع
توكلي على الله وادعي كثير وربي مايخيب من رجاه

فاتن
هذي رابع ولاده مو بكرية😓

اللهم لك الحمد على التساهيل ياعرووب .. تصدقين تمنيت ان الوطني فيه ابرة الظهررر .. كان ماشاورت احد ... وانا ادري ان التيسير من الله .. بس الطلوق تذبح .. وهالمره معاهده نفسي اني ماخليهم يقربوني الا لما ادف .. ماابي فتح الماء ولا شي ... ياااارب تفرجها .. النفسية صفر .. والدمعة قريبة ... استغفر الله بس .. حتى عيالي ماابي صوتهم اقول لرجلي بالله تسكتهم .. مالي خلق ازعاج ... يارب هونها ..