تقدم لي خاطب .. شوركم بليز

السلام عليكم خواتي ..
انا عمري 22 سنة
تقدم لي من اسبوعين امام مسجد .. طالب ويتدرب اللحين في المحكمة ..
اظن هو خريج المعهد العالي للقضاء ( ملازم قضائي ) بس للحين تدريب يعني اخر كورس من الدراسة ..


بصراااحة مترددة مره مره .. مدري خوف ولا ايش !
والنعم في المطاوعة والله احبهم .. بس كنت دايم اتخيل واحد بنظام شباب هاليومين .. مو مياعة زايدة .. بس يعني ..
وبعد ما عنده وظيفة رسمية ! واحنا صراحة حالتنا المادية ممتازة ..
ما ودي اخذ اقل مني وانا ماعندي قناعة كافية ..

غير كذا احنا بننقل لبيتنا الجديد في حي ثاني ..
متحسفة اني اذا رضيت به بجلس في حينا هذا !
لا تقولون اني سطحية ومدري ايش تكفون .. بس من زمان ننتظر نقلة البيت الجدبد والحي راقي ..
بعدين يجيني واحد من وابقى طول عمري هنا !!!

بعدين انا ياقي لي سنة اخيرة في الجامعة .. وهم عادي عندهم اكمل ..
بس صدق انا ابد ما اقدر اجمع بين ثنين ..
ارجع من الجامعة هلكانة من الطريق وابي ارتاح ..
فشلون بصير ارجع و وراي مسؤلية !!


امه تنتظر رد امي عشان تجي تشوف ثم هو يجي لشوفة الشرعية ..
لان بس خواته اللي شافوني في مناسبة ما ...

ما انسى ميزة .. هو واخوتنة وكل خواتة طالبات شريعة ماشاء الله .. وانا ما ودي ادخل ع عائلة فري جدا ... فهذي ميزة كبيرة فيهم انهم ماتزمين .. شوركم بليييييييييز:(

42 تعليق 8,510 مشاهدة

شاركي في النقاش

سجلي الدخول لإضافة تعليق.

التعليقات

38
  1. @rahty_gnty

    وعليكم السلام

    ياغاليه في هذا الزمان اغلب الاسر تزوج بناتها وهم في سنك واقل

    لانه نادر يلاقوا شاب ملتزم او فيه صفات خير

    لاحظي الله يهدي كل ضال اغلبهم سفريات

    دخان وبلاوي اللهم سلم سلم

    مادام الرجل مافيه خلاف ليش متردده !!!

    لاتخلين حياتكم المادية عائق ونقلكم من بيتكم كذلك

    وماتغني الدنيا عن الاخرة

    تأخذين رجل تأمنين جانبه أو رجل تأمنين مادته ورفاهيته وتعيشين بخوف وقلق معاه

    والاختيار بيكون من تأمنين جانبه

    من حافظ على الصلاة في وقتها يعتبر في زمننا هذا لقطه

    اعرف اسر كثير بناتهم اصغر منك ويدرسون الان وزوجوا بناتهم

    وحياتهم لاقوة الا بالله سعادة وتوفيق
    كلامي لك حتى لايكون مستقبلك مرهون بالمستوى المادي لكم وبالمنزل الجديد
    واستخيري والله يختار لك الخيرة في امرك
  2. @knfh

    والل حبيبتي اهم شي القانعه والرضى وصراحه اشوفه ماينرد ماشاء الله منصب واخلاق وعلم مواصفاته زينه واذا خايفه انه يكون متشدد اسألوه عنه وخلكم صريحين من البدايه قولو لهم عن لبسك عباتك وخلي اهله يجون وشوفيهم يمكن تقتنعي فيهم وترضين ترا القناعات تتغير والتفكير يتغير مع كل كل فتره يعني انا مثلا كنت مقتنعه بشي الحين تغير راي يعني الي اقصده يمكن اذا رديتيه بعد كم سنه تتحسفي وتقولي ليتني مارديته وتندمي فنصيحه لك خلي اهله يجون وخلي يشوفك واقنعي نفسك وصلي استخاره وادعي ربي يكتب لك اذا فيه خير ويصرفه عنك اذا فيه شر ولاتنسوني من دعواتكم لي بالزوج الصالح واتملك قبل رمضان يارب
  3. حبيبتي تقدرين بكل بساطه تشرطين انه مايتم الزواج الا بعد ماتخلصين دراستك هذا اولا يعني مجرد ملكه عشان تعرفين راسك من رجلينك في هالسنه بتعرفين اذا هو اشتغل او لا ويكون بينكم مكالمات وتفهمين فكره واسلوبه وكل شي وتعاشرين اهله من زيارات وروحات وجيات حسيتي براحه كملي معاااه ماحسيتي براحه او انك استعجلتي خلاص اتركيه واذا مره مره متردده بقوة اتركيه افضل

تابعي تجارب أخرى من هذا القسم.