صباح الخير
أختي تبغى شغالتها تنام عندي ليله عشان أنا ساكنه جنب المطار وأختي في مدينة ثانيه بعيده مره، وطبعاً قلت أبشري من عيوني واستقبلتها أمس جتني بعد المغرب. وأنا عمره مادخل بيتي شغاله.. المهم، أول مادخلت سلمت عليها وبستها وكنت منحرررجه كن الي جايتني ضيفه. وهي علطووول راحت المطبخ تبغى تنظفه وكان مكركب شوي. وأنا قلت لها يافلانه لاتنظفين أجلسي أنتي فيه سوي نظف اليوم مين سوي نظف بكره بعده؟ خلاص أنا كل يوم سوي نظف أنت أجلسي. ضحكت وجلست على الكنب. وقلتلها تبين أندومي هذي ولا هذي (نوعين مختلفين) قالت هذي. قلت طيب وسويت لها عشا حبتين اندومي وقطعت فيها فلفل عشان تعجبها ونظفت المطبخ في الأثناء... وعطيتها وعطيتها الريموت عشان تنبسط وهي جالسه في صالتنا... المهم بعد شوي طلعت ايبادها (عندها ايباد) وقالت مادام هنا فيه نت؟ قلت ايه اصبري ادورلك كلمة السر. ورحت ادووووور ولقيتها وعطيتها قلت اذا ماعرفتي تدخلينها علميني... بس ماشاء الله عليها عرفت. وانا بيتي مافيه الا غرفتين نوم وحمامين ومطبخ وصاله ومقلط مفتوحين على بعض. ومستحيل اخليها تنام في الصاله مسكينه ميب مرتاحه وبتتكشف. وغرفة بنتي سريرها نفرين وبنتي تنام عليه... قمت لبست مخده بلباس جديد وخذت بطانيه توني غاسلتها وحطيتها جنب بنتي في السرير... وقلتلها عادي تنامين معها عشان هذا سرير كبير... وقلت لها ترى المخده نظيفه توني مغيرتها والمفرش... قسم بالله كنت مستحيه مره
بعدين بنتي تنطط عندها وكل شوي تكلمها وهي ماتفهم الا شوي لان بنتي ماتعرف عربي ولا كلمه وهي تعرف انجليزي شوي.... بس بنتي كانت فرحانه بها. دخلت نومت بنتي وهي في الصاله تطقطق على النت. وبعد مانامت بنتي قلتلها خلاص نامت متى مابغيتي ادخلي وهذا حمام بنتي خوذي راحتك وهذا مكان الشاهي والغلايه والشوكولاتات ولا تستحين ترى عادي تاخذين... قالت طيب
وقلت لها انا بطلع شوي عند اخوي قريب يبعد دقيقتين مشي وارجع بعد ساعه قالت طيب
ورحت وجلست ثلاث ساعات :rotaeye: ويوم رجعت لقيت اختي مرسلتلي على الوتس اب تقول يافلانه لاتتميليحين وتعطينها نت :(
ويوم رجعت لقيتها مانامت منسدحه على السرير وتطقطق على الايباد
قلت هي طلبته وعطيتها وضااااق صدررري
وريحة بيتي تغيرت صارت خايسه ريحة شغاله مع انها نظيفه بس فيه ريحه غير
ثم جتني ضيقة صدر ماتتخيلون لدرجة معدتي وجعتني
وخفت كله من اختي يوم قالت لا تعطينها كلمة السر
رحت قطعت النت كلها
وقلتلها استحيت ان النت ينقطع عنها فجأة يافلانه ترى بقطع النت عشان انا دايم اقطعها في الليل وانتي نامي عشان بكره فيه طياره وانتي مايصير تعبان اكذب الله يعفو عني
واكلم زوجي قلت تعال انا قلقانه فيه احد في بيتنا
وزوجي سهران برى عشان عندنا احد في البيت يعني حالة طوارىء
ويوم جا قلت لاتكلمني ولا كللللمه لان الغرفة الي هي نايمه فيها جنبنا ومابيها تسمعك
وجلسنا ساكتين وانا معدتي توجعني من القلق
وسهرت ماقدرت انام الا 2 والمشكلة سهرت العب لعبه لان ماعندي نت قطعته عشانها حتى عالم حواء ماقدر ادخل اقرا فيه اوسع صدري
بنات كيف تتحملون الشغالات في بيوتكم! هي طيبه وكل شي بس صعبه إنسانه غريبه عندكم ضيفه كل يوم
اختي لو تدري اني بسوي هالفلم الهندي كان ماخلتها عندي بس ماقلت لها لاني ادري انها ماعندها تحطه عنده الا انا وودي اخدمها بعيوني
واختي ماتدري اني معقده لهالدرجة بعد اكيد تحسبني عادي بخليها تنام والصبح بتطلع للمطار وبس
والحين صحيت بنتي وودي افطرها
بس محتاره وش أفطر للشغاله مدري وش تحب ووش بسولف معها يووه كم ساعه على بال مايجي وقت المطار
ايه ونسيت اقولكم
انا بنتي تصحى في نص الليل تبي حليب ولازم انسدح معها في السرير الين تنام
يوم صحت وريحة الغرفة تخنق
جبت الحليب والشغالة صحت من صوت بنتي وانا اقولها اسكتي وقلت للشغاله معليش اسف صحيناك :(
قالت لا عادي
وقالت بنتي ماما نامي معي
وانسدحت جنب بنتي من الجهه الثانيه
يعني انا وهي وبنتي على السرير :(
تهي تهي تهي
ليله عجيبه
شوي الين نامت بنتي ثانيه وطلعت
أول مره ادري اني معقده مره وزوجي ناقد علي يقول مره تبالغين
بنات الحين هي نايمه
والي بيوديها المطار ارسلتله قلت لا تتاخر تكفى
ترى هي طيبه ومسكينه ونظيفه بس ولو
نسيت اقولكم وبنتي الصبح كل شوي تقول مامي اور فرند از ستل سليبنق
ماتسميها الا صديقتنا هههه صديقتنا راحت صديقتنا جت وتقولها شوفيني انا كبرت شوفي وتوريها انها صارت طويله الله يكفلها
وبس :( ترى هذي فضفضه
الموضوع مغلق