وصفتي المجربة عشان الوش ينور
السلام عليكم ورحمة الله وبركاته
ازيكم يا بنات عاملين ايه
ان شاء الله تكونوا بخير وصحة
انا هقولكم دلوقتي على وصفة حلوة اوي للبشرة
قعدت افكر في حاجة تكون طبيعية وتفيد البشرة وتفتحها وتخليها نضرة ومنورة
يلا هاتي ورقة وقلم واكتبي معايا
1 بطاطس صغيرة
2 كبيرة معلقة شوفان مطحون
كوباية لبن متوسطة
2 معلقة كبيرة لبن بودرة
عصير ليمونة كبيرة
1 معلقة كبيرة جلسرين سايل
الطريقة
بتسلقي البطاطس الاول وبعدين تقطعيها مكعبات
وبعديت تحطي اللبن على النار وتنزلي فيه البطاطس والشوفان واللبن البودرة وتسبيهم على النار لحد ما ياخد غلوة بسيطة على النار
وهتسيبي الخلطة دي تبرد
اول ما تبرد هتحطيها في القطاعة الكهربا وعليها الجلسرين وعصير الليمونة
وتضربي كويس اوي لحد ما ياخد القوام الكريمي
حطي الخلطة دي بقى في علبة وهتلاقي الكمية تكفيكي فترة فهتسبيها في التلاجة تستخدمي منها زي ما انتي عايزة
انا بقى قبل ما انام بشطف وشي كويس بماية دافية ولازم تكون طبعا البشرة نظيفة ومفيهاش ميكب
وباخد شوية فايدي واغسل وشي كويس بيهم كاني بغسله بالغسول وافضلي دلكي وشك كويس بيها
وبعدين اشطفي وشك كويس بالمية الدافية
ونشفي وشك بفوطة ناشفة وبطريفة الطبطبة ودي مهمة جدا عشان تحافظي على بشرتك ومتسببيش تجاعيد للبشرة
هتحسي اصلا بعدها بشرتك نورتك وبقت جميلة اوي
حاولي تستمري عليها مرتين في اليوم الصبح وقبل ما تنامي
وهتشوفي الفرق بنفسك
لما توصلي للنتيجة اللي انتي عايزاها ممكن تستمري عليها مرة واحدة في اليوم قبل ما تنامي
وعلى فكرة احلى حاجة انك تعملي اي حاجة لبشرتك بالليل قبل ما تنامي لان مسامات البشرة بتكون مفتوحة فتبستفيدي اكتر من الحاجة اللي انتي بتعمليها لبشرتك
يلا جربوها بقى ومتنسوش تدعولي