كيفكم يا امهات ..
اسمعوني .. انا كنت دايما وقت ما ارضع بنوتتي الجوال في يدي اتسلى .. الى حد ما لاحظت انه البنت صارت بس تناظر الجوال و مممره يلفت انتباهها حتى وهي تبكي واشيل الجوال تسكت وتجلس تناظره باهتمام وتتابعه!
الطفل ذكي حتى لو كان مره صغير وعمره بالاشهر تحسينه يبداء يهتم فالي حوله ويبغى يكتشفه بالفطرة سبحان الله... خصوصا الشي اللي يشوفك تهتمي فيه يحس باهتمامك ويهتم فيه..!
المهم؛؛انا فكرت انه رح تكبر على ان الجوال شي مهم و اهم شي وكل الوقت في يدنا استغفر الله كأننا نعبده .. واحنا نعرف اضرار اﻻلكترونيات على اﻻطفال مافينا احد يجهلها ..
قلت لا ما ابغى اربيها ع كذا .. انا ابغى اربيها على الشيئ الصح ابغاها تتعلق بكتاب الله مصدر السعادة ..وقررت كل ما اجي ارضعها امسك المصحف واقراء بكذا تكبر متعلقة بكتاب الله وكمان انا استفيد من وقت الرضاعة بدل الطقطقة فالجوال..وعشان التزم بذالشي خصصت مصحف دايم يكون قريب من مكان ما ارضعها ..
ايش رايكم فالفكرة؟ وايش رايكم جميعنا نطبقها منها ننشئ جيل متعلق بكتاب الله و فائدة لنا لان كل حرف نقراه بأجره بأذن الله.
وبالمناسبة اذكركم بمقولة احد السلف : علم ابنك القران والقران سيعلمه كل شيئ.
اسال الله ان يعلق قلبي و قلوبكم وقلوب ابنائنا بحبه وحب كتابه الكريم ويجعلنا من عباده المتقين الصادقين والصﻻة والسﻻم على نبينا محمد ♡