تنظيمك لشهر رمضان للمطبخ والبيت

مساء الخير /
أنا هذا ثاني رمضان في بيتي .. أول رمضان لي يوم تزوجت ما بين أهل زوجي وأهلي ما أفطرت في بيتي نهائي وثاني رمضان في بيتي وثالث رمضان كنت نفاس عند أمي ورمضان السنه هذي بإذن الله في بيتي .. ما فيه إلا أنا وزوجي وبنتي صغيره .. طبعاً راح يصير فيه أيام نفطر في بيت عمي أبو زوجي .. لأنه ساكنين بنفس البلد .. وأكيد راح أسافر لأهلي كم يوم كمان ..
فيه أشياء أجهزها قبل رمضان بإسبوع يمكن مثلاً ( أحمس حليب وسميد وجوز هند وأحط كل واحد بعلبه بالفريزر - أجهّز الكشنه وأحطها بأكياس بالفريزر طبعاً بدون ملح وبهارات - ألف سمبوسه كميه وأحطها بالفريزر - أقطع الباميه وأكيسها وأحطها بالفريزر ونفس الشئ الزهره - كمان لبن حامض بأكياس بالفريزر عشان الشوربه - أجهّز حشوة دجاج مفروم وكمان حشوة لحم مفروم وأقسمهم بأكياس بالفريزر - أطحن كمية سكر وأحطها بعلبه كذلك البسكوت أطحن كميه وأحطها بعلبه - الشيره أجهزها وأحطها بعلبة بالثلاجة تحت - اللحم أقسم أكياس للشوربه وأكياس للإيدامات - الثوم أقشره كله وأحطه بعلبه بالثلاجة ) تقريباً هذي التجهيزات اللي أسويها .
طبعاً قبل كل هذا أكون نظفت البيت تنظيف عميق ورتبته ..
الأطباق الأساسيه ع السفره ( شوربه أسوي كميه تكفينا يوم أو ثلاث أيام - صينية خضار - لقيمات - سمبوسة جبنة ) الأشياء هذي لازم كل يوم وكمان حلا بارد إما جلي أو كاسترد أو أسوي بدالهم حلا قهوه ..
وممكن كل يوم أضيف صنف مرات رز أبيض وإيدام ومرات صينية توست وأحياناً محشي .. بس طبعاً بكميات قليله على قدنا ..
من الليل أجهز العصيرات وأحطها بعلبة مويه نوڤا الكبيره لتر ونص أسوي فيمتو وتاتج وأقفلهم بالتلاجه وكمان أجهز صينية أحط فيها الأكواب والملاعق والفناجيل وتلاجة القهوه والتمر والسفره كمان أطبقها وأحطها مع الصينيه .. أصحى ثاني يوم أعجن اللقيمات وأركب قدر الشوربه وأقلي الخضار وإذا فيه صنف ثاني أبغا أسويه أبدأ فيه كمان .. بعد العصر بوقت أطلع كيس كشنه للخضار وأجهزها وأقلي السمبوسه واللقيمات وأسوي القهوه وأفرش السفره بالمقلط وأحط فيها الصينيه وقبل آذان المغرب بشوي أقلط الصحون ع السفره .. إحنا نظامنا الأكل كله نحطه ع السفره يأذن ونفطر وبعدها نصلي ونخلي السفره للي يبغى يرجع يآكل بعد الصلاه بس الغالب ما يرجعوا ع الأكل يطلبوا قهوه وحلا ..
عندي وقت كثير فاضي .. الحمدلله أقرأ قرآن براحه وأصلي وعباداتي لها النصيب الأكبر من وقتي ..
وبس سلامتكم

مرحباً حلوات .. الله يبلغناه وياكم وأهلنا ومن نحب وحنا ف صحة وعافية لا فاقدين ولا مفقودين يارب .. ياحبي لسيرته حتى وأستغرب صراحة من اللي يقول النظافة ف كل وقت ماهو شرط ف رمضان وهيك !! أكييييييييييد لكن لازم نتحمس أكثررر عن قبل عشان نحس باللذة ف استقباله وف نفس الوقت حماس للعبادة فيه ،، أنا هذا بإذن الله ثاني رمضان ف بيتي السنة اللي فاتت كنت تووووي متزوجة وكان الحمد لله أروع ما يمكن ع إني كنت متخوفة من المسئولية فيه لكن الحمد لله ،، معودتنا الوالدة الله يحفظها ع آخر شعبان هيك ننفض البيت نفض من وإلى خاصة المطبخ ونشري مواعين جديدة وهيك ونحس وحنا نستعد بشعووور حلو مهما تعبت ماكنت أحس بالتعب سبحان الله وبعدها أغراض المطبخ وتوزيع اللحم .. بالنسبة لنا مانفرزن كل شي بيومه .. حتى ف بيتي لوحدي كنت أبدأ العصر وبحكم أنو بس أنا وزوجي بس فما أتعب وأنوع ف الأطباق وحتى ف تقديمها مرررره أتقنن ف ذا الشي ما أحب اقدم ف صحون بلاستيك وأرميها ابدددد لأن العين لها دور ..

وبالنسبة لتنظيم الوقت فما أنام الفجر إلا وكل شي يلمععع ولما أصحى الظهر أطلع اللحمات وأجلس فترة هيك قراءة قرآن واستغفار بعدها أنام للعصر من بعد الصلاة أبدأ ف تجهيزاتي واول شي اقفل الغرفه اللي نفطر فيها عن ريحة الطبخ وهيك واعجن اللي يحتاج عجينه الحلا اكون مصلحته من الليل وبحكم ان زوجي يفضل البسبوسه والكنافه وهيك حلويات عن البارده فغالبا اصلح هذي الحلويات وانوع بين فتره وثانيه حلا جديد الشوربه والمكرونه والسمبوسه هي الاساس عندي لكل فطور ومعها فطاير او صينيه بالفرن او من ابداعات التوست وسلطااات القلي اخليه اخر شي بعدها ادخل الغرفه واحط السفره فيها انا من عشاق فن التقديم والابداع ما احب الطريقه التقليديه ، احط سفره وعندي كذا شكل والبسها بنايلون الشفاااافه واحط مناديل السفره عندي كذا شكل ولون وادخل فواحه واقفل الغرفه وامر ع الحمامات وغسل ع السريع واشغل فواحتها الخاصه وبعدها ابدا اقدم ولما نفطرونخلص ابدا انفض البيت كله واروح اتحمم وابخر واصلي ولنا يرجع زوجي اكون مجهزه القهوه والشاهي والذي منه والسحور من ٣

صباح الخير
هذا ثاني رمضان في بيتي و أول رمضان لي بعد زواجي كنت نفاس في بيت أهلي
يوجد في البيت انا و زوجي و ابني بس بيت أهل زوجي قريب منا فيه أيام يفطرو معانا و العكس كمان بيت أهلي
أول شيء اجهزو لرمضان أواني جديدة و أنا ليوم طالعة عشان اشتريهم
زوجي يحب الأكل الطازج ما أحط شي من قبل بالفريزر ماعدا اللحم و الدجاج يومين من قبل أقطعهم و أحطهم بأكياس بالفريزر
كل يوم لازم يكون في شوربة سمبوسة و طبق ثاني يختلف كل يوم و سلطة و حلو و العصير يكون بالثلاجة
الحمد لله رغم التعب لي فيه بس حلاوته لا توصف
أما العبادات بعد كل صلاة أقرأ قرآن و أشوف برامج دينية
اللهم بلغنا رمضان لا فاقدين و لا مفقودينن

اللهم بلغنا رمضان لا فاقدين و لا مفقودين