و الله محتارة انا في اي اسبوع الدكتورة تحسب لي شي و زوجي يقول لا غلطانة

دحين يا بنات خلوني اعطيكم التواريخ بالتفصيل و انتو قولولي كيف

انا دورتي تجي كل تلاتة و عشرين يوم منتظمة على هادا الشي من سنين

الدكتورة قالتلي تبويضك يصير في النص يعني اقسم 23 على 2

نجي للتواريخ

اخر دورة جاتني يوم 1 شهر 3 ميلادي
زواجي كان يوم 14 شهر 3 ميلادي
دورتي التانية كان لازم تجي يوم 23 شهر 3 ميلادي بس ماجات و بعد كم يوم حللت و طلعت حامل


دحين رحت لدكتورتين و حسبولي حملي من اول اسبوع في اخر دورة يعني على حسابهم انا اليوم في الاسبوع 12 و 4 ايام

زوجي مو مقتنع ابدا اليوم زرتو و سألني في اسبوع صرت و قلتلو 12 و شوية و يقوللي هادا معناتو انك حامل من قبل ما نتزوج و كلامهم غلط زواجنا دوبو كمل عشرة اسابيع الدكتورة غلط

حاولت اقنع فيه انو هادي حسابات دكاترة عالمية و هما ادرى بس مافي فايدة قلتلو خلاص انت حر احسب براحتك و انا امشي على حساب الدكتورة و حسابي ما عليا منك

بس بصراحة لخبطني و شككني و الله

الدكتورتين قالولي انو هادا البيبي احتمال يكون حق ليلة الدخلة لأني دخلت على التبويض على طول
و لأنو في يوم 20 نزل عليا شوية دم وردي و اختفى و قالولي احتمال حمل و هادا الدم عشان البويضة انغرست في الرحم و فعلا بعد كم يوم حللت و طلعت حامل




اختصار الكلام انا متلخبطة و ماني عارفة كيف احسب لنفسي

لا و السونار يقول اني 13 اسبوع و 4 ايام بس اللي اعرفوا حسب ما قريت بكذا موقع ان حساب الدورة ادق


هادي الحسابات انحسبت امس لما راجعت عند الدكتورة حقتي

7 تعليق 3,876 مشاهدة

شاركي في النقاش

سجلي الدخول لإضافة تعليق.

التعليقات

7
  1. @hrm_hsn

    كلام الدكتورات صح وبرضو كلام زوجك صح،،،الدكتوره تحسب من اول يوم في الدوره الشهريه هذا اول اسبوع يعني قبل زواجك وصح بيكون 12 اسبوع،،،وزوجك حسابه من يوم التبويض بالضبط يعني بعد الزواج وحيكون فرق اسبوعين يعني 10 اسابيع صح زي مااقال،، الله يتمم لك ويسهل عليك،
  2. @anayoyo

    اولا الف مبروك الزواج وربي يتمم حملك على خير
    معروف ان الحمل ينحسب من اول يوم في اخر دورة شهرية فاذا كان اول يوم في اخر دورة لك يوم 1 شهر 3 يبدأ الحساب من ده اليوم على الرغم انه التبويض والجماع يحصل بعد ده التاريخ بتقريبا 14 يوم لكن اللي يصير انو مو كل وحدة تعرف بالضبط متى حصل التبويض او بالاصح التلقيح وعلى هذا الاساس الاضمن اننا بنكون عارفين متى جات الدورة ويبدأ الحساب على اساسها
    واذا على زوجك لاتحسبي قدامه بالاسابيع احسبيها بالشهور وخلاص قولي انك حامل بشهرين مو لازم تجلسي تفصلي الاسابيع قدامه لساه عريس ومايعرف بالاشياء هذي

تابعي تجارب أخرى من هذا القسم.