هل الانسان اذا بيسوي الخير يحتاج يستاذن؟؟
هي مثل اختك الصغيره وماهي مقصره معكم
لو هي اختك الصغير ايش بتسوين؟؟
اذا سوي معها نفس الشي
واذا كان على سلفاتك,,,فكل احد مسؤول عن تصرفاته
يعني اذا سلفتي ما ترحم الشغاله ولا ما تتصدق اقول وانا زيها
كل شاه معلقه من كراعها وكل نفس مسؤوله عن افعالها
والطيب ما يجي الا من اهل الطيب
ليس يقولون فلانه بنت رجال لانها صاحبة فزعات
الا اوقفي معها واوقفي استغلال الجميع لها,,,اولا كلمي زوجك وقولي له اختك زواجها قرب ولازم ترتاح وانتم الاخوان اتفقوا على هذا وخلها تجي منك
ثم امسكي البنيه وعلميها ايش تسوي وكيف تجهز
يمكن هي بنت بيت ما تعرف طلعات ولا خرجات
وخاصه اذا ما عندها اخوات اكبر منها وامها دقه قديمه
ترى من يفعل الخير لا يعدم جوازيه لا يضيع العرف بين الناس
واي شي تسوين فهو عشان زوجك وعيالك لانها عمتهم ولاجل طباعها الكريمه معكم
لو اكتب لك عن لؤم اخوات الزوج ومكائدهم لكان يوقف شعر راسك
وعلى فكره فيه بنت عمي الله يوفقها ويعطيها على قد نيتها,,,هاذي الا قالوا انسانه ملتزمه
دين وخلق وادب ولا تتاخر عن اي احد باي خدمه تقدر عليها
وفوق هذا وقت فراغها تشتغل كاداريه بدون راتب فقط تطوعا منها في مركز تحفيظ القران
المهم قبل كم سنه بنتها خطبها شاب محترم ومن عائله كريمه بكن مش من عائلتنا يعني ما نعرفهم ولا يمتون لنا باي صله
وكان يتيم الاب
عنده فقط اخ واخت
وامهم ضعيفه مسكينه ومن جنسيه اسيويه ومالها باي احد فقط حياتها لهالعيال
المهم واشوف اخت الخاطب اسنانها مره مشوهه
وتستحي وكانها بنت عمرها 12 سنه مع انها وصلت ال30
كان واضح بان الاسره منعزله وعلاقاتهم محدوده
المهم بعد فتره تزوجوا وما شفتهم الا بعد فتره,,,,الا اخت العريس متغير شكلها...لبسها وطريقة كلامها
كلمت بنت عمي :
فلانه لو تكلمين اخت فلان ترى اسنانها ممكن بسهوله تصليحها بس يمكن غالي شويه
قالت لي ما عليش انا كلمتها واخوها اصلا سوى لها مواعيد وهي بدات العلاج وبس يخلصون تنظيف وحشوات وبيحطون لها تقويم
تصوري مش عمة عيالها,,,,عمة احفادها
وفعلا البنيه صلحت اسنانها واصبح واضح بانها صارت اكثر ثقه بنفسها وكثير صرت اشوفها في اي حفله لاسرتنا
ترى مش عيب تساعدين اخوك المسلم ولا تنتظرين اجرا ولا شكورا
ومش الدين فقط قفازات وخمار,,لا لكن عمل الخير ومساعدة الاخرين مهما كان شي تافه وصغير
معليش اطول عليك واثقل عليكم
زمان ايام الشباب واحد من جماعتي متزوج وحده غير سعوديه,,من جنسيه عربيه
وهي مالها اهل ولا اقارب هنا
المهم ولدت واسمع جدتي تقول الله يعينها غريبة اهل وما احد عندها
واقوم ثاني يوم واخذ كم كيس لحم واطبخ لها مرقه من الللي يحبها قلبك
واسوي ايدام ورز ,,,يعني كميه تكفي 3-4 ايام واخذها لها
رحمت ضعفها وغربتها
قلت لها انا ما اقدر اقوم بك لانه تعرفين عيالي وجامعه ولكن حطي الاكل في الثلاجه اقومي بنفسك
مضت السنين وتوظفت والله بارك في اولادي ورزقني من واسع فضله
بعد ما كنت ابيع ذهبي عشان اصرف على اولادي ,,,الحمدلله يارب على ما انعمت به
قابلتها في مناسبه وصار الحكي على النفاس وطبيخ النفاس
والا اتفاجا بذيك المره تقول والله يا مرق اكلته من يدك وانا نفاس,,,ما بعمري اكلته
الله يحرم ايديك على النار ويبارك في اولادك
يعلم الله بانه جاني الاكل وانا كبدي بتطيح من الجوع والثلاجه مليانه لحم ودجاج ما فيني حيل اقوم اطيخ ونفسي رفضت اكل المطاعم
شوفي الحياه كيف تعلمك
يعني هي مش محتاجه اكل ولا محتاجه ماديا لكن محتاجه مساعده
ممكن عمل الخير تفرج على مسلم بكلمه طيبه
ولا تسعى له بخدمه بسيطه ما تكلفك شي
والله في عون العبد مادام العبد في عون اخوه
معليش سامحينا للاطاله
اخت زوجي
متابعة النقاش، صفحة 3