:2thmup:مساء الخير على الحلوين
بالنسبه لأكشن ولادتي ما كتبته لانه الحمد لله ماكان فيه أكشن مثل كل مره لأني ولدت قيصري لأول مرة لكن مدام طلبتوا التفاصيل بكتبها لكم :talker:
انا الحمد لله والده قبل كذا 4 مرات وكلهم طبيعي
في حملي الخامس جاني سكر الحمل من الشهر الرابع وطبعا كنت مرعوبه منه وخايفه من الأبر لان الدكتور قرر أخذ انسولين
وقعدت يومين أبكي خوف من الأبر
وبديت استخدمها واخويه ياقلبي عنده سكر من الصغر طمني وقال ما تخوف وفيه اماكن في الجسم سبحان الله ماتحسين بشك الابره فيها وعلمني عليها وفعلا بديت اخذ الابر ولا احس في ألمها سبحان الله
المهم معروف مع سكر الحمل ان البيبي ماشاء الله وزنه يكون زايد
وفي الاسبوع الثالث من التاسع وصل وزن النونو عندي ثلاثه وربع طبعا خفت من الولادة الطبيعيه لأني بالعادة أجيبهم واوزانهم أثنين ونص ومع ذاك اتعب والخياطه تكون طويله
والدكتور هالمره قال احتمال ما نخليك تكملين التاسع ونعطيك طلق صناعي
طبعا أنا مرعوبه من دخلت الثامن من الولادة وكيف الحين مع الطلق الصناعي وناس يفيد معهم وناس لا يتعذبون وبعدها عمليه
المهم طلبت عملية
والدكتور اعطاني موعد بنفس يوم العمليه الساعه ثمان ونص الصباح
طبعا استخرت ثلاث مرات وكنت حاسه اني مرتاحه نفسياً وحتى توقعت ما أنام ذيك الليله من القلق لكن الحمد لله نمت وزوجي هو اللي كان قلقان
طبعا قبل انام جهزت اغراضي واغراض النونو كامله وسويت شور محترم ونظفت جسمي كامل
ونمت وقمت الفجر صليت واستخرت بخصوص البنج النصفي لاني كنت ناويه اطلبه
ورحت على موعدي وطلعت قسم الولاده واخذو التحاليل اللازمه وقعدت انتظر دوري بالعمليه وطرل الوقت اسبح واستغفر
وطبعا في خلال ذا الوقت كنت اسمع واحده تصيح بقوووه والممرضات يقولون لها خذي نفس
وكنت ادعي لها من كل قلبي ربي ييسر ولادتها واحيانا احط يديني على اذوني عشان ما اسمعها لاني خفت مره ورحمتها :icon8:
المهم قعدت انتظر لين الساعه وحده وفي خلال هالفتره نمت نوم عميق ماحسيت بنفسي
وجو وخذوني على قسم العمليات وحطوني عالسرير الخاص بالعمليات وساعتها تذكرت البنج النصفي بس سبحان الله سكتت ما طلبته
وشوي وجابو كمام البنج وتشهدت وحطوه على وجهي وفي لحظه دخل الدكتور يقول كيفك يامدام؟ طبعا عشان يتأكد اني تبنجت وعلى طول ما حسيت بشي
بعدها مدري بكم بالضبط من الوقت صحيت على صوت الممرضه تصحيني واسمع حواليني ناس في غرفة الافاقه طبعا هي غرفه كبيره حاطين كل اللي جايين من العمليات فيها تقريبا 6 اسره رجال وحريم بس بينا ستاير
المهم صحيت على صوت شايب جنبي يصيح عليهم يقول موتو رجلي رجلي ماعاد تتحرك ويدعي عليهم والسسترات يهدونه ويقولون له يا بابا مافي موت هذا عشان البنج النصفي ما تحس فيها
وهو مصر ان رجله ماتت ويلعن ويسب فيهم
مسكين كبير في السن وشكل عنده زهايمر طول الوقت يصيح فيهم ويقول من اللي جابني هنا
وشوي ويفتح علي الستاره وانا جنبه ويقعد يصيح فيني يقول شقشقونا وكسرونا ورمونا هنا
والممرضه تجي كل شوي تقفل الستاره بينا وتقول له عيب يا بابا ايش هذا هنا في حرمه هههههههه
وانا صراحه فيني ضحك والعمليه احس فيها الم مو رايقة له ههههههه
وناديت الممرضه قلت عطيني مسكن وجت اعطتني ابرتين والحمد لله خف الألم
وقعدت يمكن ساعه لين طلعوني غرفتي
طبعا بذا الساعه اشغلني الشايب وهو يخاصم ويصيح عليهم ان رجله ماتت ويفتح علي الستاره
المهم طلعت غرفتي كنت طالبه خاصه عشان اخذ راحتي
طبعا صار الوقت العصر وجاء زوجي وسألته وش جبت ولد والا بنت؟
قال باقي ما أدري ما سمحو لي أدخل
وراح الحضانه يشوف
ورجع يبشرني انه ولد الحمد لله جاني بعد بنوتاتي الاربع
وطبعا وحده من خواتي ووحده من زميلاتي كانو على اتصال معي عشان ابشرهم ايش جبت وعلمتهم انه ولد
وعلى طول نشرو الخبر وحده ناشرته بالعايله ووحده في قروب زميلاتي
وافتح الجوال كله تبريكات فرحانين اني جبت ولد
المهم ساعتها وسوس لي الشيطان ليكون الحضانه غلطانين مو ولد فشله عاد الناس كلهم درو
وارجع ادق على زوجي قلت تأكد ليكون غلطانين
حتى هو شككته ورجع يتأكد يقول الدكتور بنفسه قال ولد
وفي الليل طلبت يجيبونه
وبرضو كنت شاكه
قلت افتح الحفاظه اشوف عشان اتطمن :2thmup:
والحمد لله تطمنت خخخخخخخخخ
وبس
❤تباشيــ 3 ــر ❤مواليد الأهله ( رمضان ❤ والعيــد) يوليو و اغسطس
متابعة النقاش، صفحة 169