شوفوا هالموقف أثر فيني😢

صباح الخير خواتي ببدا بسالفتي بدون مقدمات 
سلمكم الله رحت يوم الثلاثاء أراجع في وظيفه من الحين اعلمكم تراني ماانقبلت
وابيكم تدعون لي ان الله يرزقني بوظيفه تشغلني خاصة اني طالعه من تجربة طلاق والحمدلله
يوم رحت اراجع وداني ابوي الصباح الله يطول بعمره
وطفى جوالي اخ يالقهر كنت سهرانه عليه الله يسامحني وطلعت مستعجله مااخذت احتياطي
والمكان كان زحمه ومبنى كبير وانتظر بالدور الثاني وكل شوي اقول هاه يابنت انزلي لأبوك علميه ان احتمال تأخرين عشان ان بغى يجلس في كوفي او زي كذا 
وكل ماجيت انزل اشوف رقمي قرب لأن ثلاث مقابلات كنها وظيفه وزير
بالنهاية طلعت اول ماطلعت من عند البوابه شفت ابوي جالس يمين البوابه على رصيف جالس بظل جدار المبنى الوقت قريب لأذان الظهر هو ماكان ماخذ راحته بالجلسه عشان الارض لا ..مثل الجلسه بين السجدتين بس رافع جسمه عن الارض ماعرف اشرح المهم يوم شافني بيقوم ياالله قااااام والله ياالله رفع نفسه 
حزنت مره قلت بنفسي ابوي كبر وتذكرت موقف وانا بالابتدائي ياخذني كل يوم من المدرسه يوقف قريب من باب المدرسه واول مااطلع يشيل شنطتي عني والله يااخواتي مانسيت وقفة ابوي ويوم ياخذ الشنطه يشيلها واسولف عليه وحنا ماشين لسياره اااه يابنات السنين تمر بسرعه الله يجزى ابوي كل خير على كل شي سواه لي
تدرون يابنات انا اثر فيني موضوع الاخت الي امها تضربها وابوها يضربها انا ماعمر اهلي مدوا يدهم علي وابوي صديقي والله اذكر وحده من البنات طرحت علي سؤال من اعز صديقاتي على طول جاء في بالي ابوي نضحك نسولف افضفض له ماحد يفهمني كثره انا وهو متفاهمين كثييييير بعكس باقي افراد اسرتي
والحين هو كمل مشوار طيبته وحنيته مع طفلتي
احيانا تجيه بنتي تبكي تبي تتابع طيور الجنه بغرفته وهو وقت نومته يقول اتركيها يستمتع كثير بشوفتها لوعلى حساب راحته ودايم يردد هذي إبنيتي
تصدقون اذا طلعت معه مكان مثلا مجمع وتعشينا بالمجمع او تقهوينا في مكان تكون احلا من طلعتي مع خواتي وصديقاتي واذا رحت معه لمشوار اختباراتي وغيره انزل وانا مبسوطه واحيانا اضحك بالجامعه من سوالفنا ماعمري رحت معه انا او اي احد من اهلي لمكان ونكد علينا او زعلنا حتى لوماكان من الاول راضي عن الطلعه
اخر اختباراتي صيفي كان موديني نسولف بكل شي افضفض له حتى عن مشاعري بعد الطلاق نسولف بكل شي دايم عنده استعداد يسمع دايم واجابته حلوه ومقنعه وجبنا طاري السفر لتركيا قلت له وانا اضحك امي تبيك توديها تركيا عشان فيه مسلسل واحد تركي يقول لحبيبته عندما تبتسمين تصبح اسطنبول اجمل >>اناقريتها بالانستقرام هالجمله وابوي ميت ضحك قال اجل بودي امك لصلاله اقرب وبقولها هناك عندما تبتسمين تصبح صلاله اجمل
وننفجر ضحك وطول الوقت بإختباري اضحك اتذكر ابوي وهويقولها
سامحوني طولت عليكم كنت بس بكتب الموقف وكملت سوالف
الله يطووووول بعمر ابوي وبعمر امي ووالديكم اجمعين والي متوفين والديها الله يغفرلهم ويرحمهم 
الله يجعلنا من البارين في والدينا