السلام عليكم المواقف كثيرة ولكن ابقول لكم عن آخر موقف يوم العيد كنا طالعين وقام اخوي اخذ كم كيس لحم بيوزعه للعمال على طريقنا المهم وزع كل الاكياس وبقى كيس واحد كان فيه عامل وقام اخوي اعطاه وشوي لف بالسيارة الا فيه واحد من العمال جاي يركض من بعيد يبي لحم وتعثر وطاح وقام مره ثانيه واخوي ماانتبه له وربي يابنات كان موقف مره محزن وربي لا شعوريا ناديت اخوي وقلتله فيه واحد يجري يبي لحم قام قالي خلص قلتله الله يوفقك لاتتركه اعطه لو فلوس اي شي تكفى . قام اخوي رجع بالسيارة وكان واقف الرجال ينظر لنا بيأس وقلة حيله ، ونزل اخوي وكلمه وعطاه المقسوم واخذ رقم جواله وقاله بعدين اجيب لك لحم . والذي لااله الا هو ياني حزنت وتنكدت على جريته ولمن طاح وربي شي محزن الله يرحم حالنا وحالهم وحال جميع المسلمين . يارب رحمتك ياهي الحاجة شينه . اللهم لك الحمد والشكر ، اللهم لك الحمد حتى ترضى ولك الحمد بعد الرضى اللهم ادم علينا النعم . اللهم اني اعوذ بك من الفقر وقلة الحيلة وكثرة الفتن .
أكثر موقف ماراح أنساه لما ماتت امي وكلنا حولها بالعنايه إحساس غريب ورهبه هذاك اليوم كلنا حوله واخواني وخواتي يقرون قرآن واللي ماسك يدها واللي ماسك برجلها وانا مرميه بالأرض وبس أراقب جهاز القلب والضغط وكان ينزل شوي شوي الين صار صفر وصرخت صرخه قوويه وفجاءه رجع نبضها ارتفع شوي وفرحت قلت امي ماماتت بس على طول رجع انخفض وتوقف قلبها وجاء الدكتور كان يقول لي ابوي انو خلاص الله يرحمها وابوي يقول لا شوف صدرها يتحرك بس كان يتحرك من جهاز التنفس جو بيطلعوني وانا ماابي ابوي قال خلوها وضميتها وبكيت وشميتها وسبحان ألله لما رجعنا شفناها بالمغسله كانت امي قبل سنه بجمالها بصحتها ببياضها لأنها كانت بالعنايه لمده سنه وتبهذلت وتغير شكلها الله يرحمها يارب ويرحم اموات المسلمين
اصعب موقف لما كنت صغيره وحده من اقاربي تبلت علي ان رميت المكسرات بالارض وطبعا ماكنت انا المهن انكرت قلت مو انا كان عمري تقريبا 8 سنوات..ويوم شافتني قلت مو انا قامت اخذت الجزمه تكرمون وضربتني فيها ضرب قدام كل الاقارب وقدام الاطفال يالله موقف مانساه لو كنت لوحدي معها يمكن نسيته بس الله يهديها الحين ماشيل،بقلبي عليها شي وعادي احبها