السلام عليكم كروشات ..
اعذروني ما كان عندي نت ؛ الله يبارك فيكم جميعا وييسر عليكم ..
فيه أخد ولد ماقريت كل الردود ؛ بشري ليلولسا ولدت لأني دعيت لك بالاسم ..
قصة ولادتي يارب لك الحمد ولادتي سهلة وجميلة يوم الجمعة عادي قمت وتغديت ومافيني شيء على العشاء حسيت بمغص خفيف و أخذت شور حاااار مرررة ركزته على بطني وظهري وطلعنا نمشي عند مكتبة الملك فهد وكنت أحس بالطلق وأقول أكيد كاذب 😅 وأمشي ولا جات الطلقة أوقف وأمشي وعلى هالحال وبعدها قررنا نرجع البيت وشرينا خبز وحليب ودخلت البيت وأنا تعبانة الطلق كل شوي يتكرر وبرضه أقول كاذب بس الطلق محتمل والشد وتحجر البطن كل شوي يجي وإذا جا انسدح واتنفس وتعشى زوجي والساعة ١١ حسيت بشوي راحة وأكلت سانوتش جبنة وكاسة حليب وجاني مغص شديييد وخلاص انقطع نفسي وزوجي قام خلاص يالله المستشفى ودخلت الحمام الله يكرمكم وفرغت وزوجي عند الباب خايف أصكره 😂 المهم زوجي أخذ الأوراق والشنطة وعطاني عباتي وأخذ ولدي وطلعنا نسيت ألبس شرابي وقفازاتي من شدة الوجع ومشينا بأسرع ماعندنا عالمستشفى شوي حسيت ببلل وخفت والطلق كل ماله يزيد وصرخت أقول لزوجي أنا أنزف وأحس بدفع وأقوله بسرعة بولد في السيارة واتعصر مررة وفتحت الشباك آخذ نفسي لأن خلاص أحس بكتمة مرررة وزوجي خلاص مو عارف وش يسوي ويزيد السرعة وقطعنا إشارة ووصلنا المستشفى الحمد الله وعلى باب الطواري جاب السكيورتي عربة وأول ماجلست فيها وأنا أكلم السكيورتي وأقوله الله بيرحمني برحمته وهو يقولي إيوة والسستر تدف وهو يفتح لي الأصنصير وأنا أقوله الله بيسهل علي ويقول إيوة إلى الآن أحس إني فصلت ذاك الوقت أكيد السيكورتي يقول الحمد الله ع النعم 🙈 ودخلت غرفة الولادة وأقول للسستر مويا تتزل وأحس بدفع وعلى السرير بملابسي وعباتي رفعوها بس وتنزل السستر البنطلون وتقيس تسعة سانتي مفتوح ويدقون ع دكتورتي وتسدحني على جنب وتقفل رجولي ماتبيني أولد لين تجي الدكتورة وأنا أحس بولدي يدفع وأقولها خلاص مو قادرة انتظر وهي تصكر رجولي ماتبيني أولد قلت لها عطيني أوكسجين وعطتني بس ماسوى لي شيء أبد الألم موجود وبعدين بديت أدف ورفعت رجلي القابلة وشافت الراس طالع ووسعت لي ودفيت وطلع نص الراس بس فجأة جتني فهاوة ووقفت دفع وجلست أناظر للسستر والقابلة وهم يصرخون علي دفي دفي ورفغت جسمي ودفيت وطلع الراس وانزلق الجسم والحمد الله طلع ولدي يبكي وبعدها قالت لي السستر خلاص قومي لسرير الولادة وفصخت عباتي ورميتها على السرير وقمت على سرير الولادة وشوي وجات الدكتورة وطلعت المشيمة وخاطت وعطتني بنج بس مع ذلك حسيت بكل غرزة والحمد الله نقلوني غرفة ثانية ودخلت الحمام وغيرت ملابسي والحمد الله ..
طلعت من البيت ١٢ وولدت ١٢ و ٣٨ دقيقة ولادتي سهلة والحمد الله ..
وسميت ولدي يوسف زي سماسم ..
واعذروني على الانقطاع ولدي الكبير الله يصلحه متعبني مرررة من الغيرة ومايخليني أمسك الجوال ..
تجمع التباشـ 7 ـير لاحلى مواليد ( نوفمــ11ــبر و ديسمـــــ12ـــــــبر)
متابعة النقاش، صفحة 402