نصائح قبل السفر لاستراليا او اي دوله ثانيه
نصائح قبل السفر وخلاله الى استراليا او اي دوله ثانيه
اليوم حبيت اقول نصايح عن قبل السفر لاستراليا وخلال الوصول
وهذا موضوعي الاول معكم ،
رغم اني شفت بعض النصايح ، لكن الحق قبل مااسافر كان ودي اشوف تجارب اللي سافرو وكدا
فقلت اشارككم بتجربتي ونصائح مهمه
اول شي قبل السفر الى استراليا ،
1- نصيحه جهزي اغراض السفر قبل وقته اقل اقل شي شهر ، انا خليته اخر اسبوعين قبل السفر وانبلشت وراحت علي اشياء كثير ، ومنها حجز الفندق اللي بتقعدون فيه اول شهر ،
2- وفيه اشياء ابنصح انو الوحده تشتريها من بلدها بكميات ، للي اقتصاديين مثلي ويحبون يوفرون
، اما اللي يحبون يشترون من برا فمايحتاج ياخذون الا على قدهم
3- اول شي المكياج والمناكير ، هاذي ياطويله العمر خذي لك احلى الماركات من بلدك وباحلى الاسعار
4- الملابس ، نفس الشي خذي لك احلى الملابس من بلدك وبسعر حلو نفس قصه المكياج ، لكن انصح تكثرين بناطيل الجينز وغيره والجاكيتات الرسميه والكشخه لانها تقريبا تكون اغلى في استراليا بكثير ، اما بقيه القطع فتلقين اسعار حلوه
5- الجزم الله يكرمكم ، هنا انصح وبقووووه تاخذين على الاقل جزمتين وادفعي فيها اللي تدفعين لانو حتمشين مشي
فتتكسر رجولك لو ماخذيتي لك جزمه زينه
وبعد خذي بوت المطر ، دايم هنا امطار خير وبركه
6- العطوووور ،خذي كثير معك
7- العبايه ، عاد كل وحده يختلف مودها في العبايه لكن في النهايه نشترك بالاسكارفات ، الوشاحات ،
كثري منها وخذي القطع التحتيه اللي تمسك الحجاب مايطيح ، ولانك بتحتاجيها كثير مره خذي لك اقل شي خمس قطع وشاحات
اما العبايات خذي لك تقريبا من ثنتين الى ثلاث بالشكل اللي تبينه
8- نجي لاغراض المطبخ والاكل
هنا بملبورن كله بقايل عربيه فتلاقين كل شي من الالف الى الياء يعني لا تشيلين هم
بس بعض البنات يحبون ياخذو البن والتمر معهم لانو يكون اجود في السعوديه
واذا خذيتي اكل لازم تكتبين ببطاقه النزول من الطائره انو معاك اكل ،، لانهم يفتشون الشنط
لكن الشي اللي يقهر ترامس القهوه هاذي خذي لك منها من السعوديه
هنا شكل بايخ وجوده خايسه وغلا على قل السنع يستغلون الوضع
،،،
9- وااااقي الشمس ، هنا شمس غيرررر تحرق بشكل فظيع خذي لك واقي شمس مهم مراا ولو عندك اطفال احسبي حسابهم بعد
10 - خذي اجهزتك الالكترونيه من ايباد وجوالات ولاب توب وفلاشات ، وانا صراحتن خذيت معي طابعه وسكنر اثنين في واحد ، فكت ازمه مررره من اول يوم وانا شغل طباعه اوراق وتصوير ، عشان التسجيل والتقديم وكدا
11- لو كان في متسع في الشناط ، خذي لك شويه دفاتر واقلام والوان ، تحتاجينها في البدايه
12- خذي توصيله معك تفك ازمه
13- في النهايه تاكدي من وزن الشنط ، وقيسيها موب توصلين المطار ويبدا شغل التنقيل والتخفيف والوزن الزائد
هذا قبل السفر
اما وقت السفر
1- لو معك طفل صغير خذي عربيته الدف الكبيره معك المطار مايحتاج تودينها شحن مع العفش لانهم يخلونها معك وماياخذونها الا عند باب الطايره ويسلمونها لك عند باب الطايره اول ماتوصلين حتى لو كانت رحلتكم اكثر من محطه ينزلونها لك عن باب الطايره وياخذونها منك عنده
2- اتوقع لكل طفل ثلاث تغييرات كافيه وكوت واحد خفيف مو ثقيل للبرد لو برد الجو عليه
خذي لعبه على حسب عمر طفلك ومايحتاج تاخذين لحاف هم في الطايره يعطونك لحاف يفك ازمه
3- خذي لك انتي مخده الرقبه اللي تجي على شكل نصف دايره ياهي بتريح راسك بدونها تتعذبين
وخذي لك تغييره كامله ، عباره عن بجامه وقطع داخليه وعبايه ثانيه ماتعرفين وش من حوادث تصير ،
اهم شي البسي لبس مرريح والبسي عبايتك الطويله اريح لك
4- الحجاب في الطايره لو فرضا بدلتي حجابك لاسكارف اولثمه او برقع مهما كان المهم خذي خامه كويسه ولطيفه على البشره ، لانك بتعرقين بتتحكحكين بتطفشين وكدا ، وتاكدي انك مثبتته زين وبشكل مريح عشان ماتبلشين كل شوي طايح ومحتاج تعديل ،
5- لو تبين خذي لك قصه مشوقه تقرينها ، خذي شي تتسلين به في الطايره، كنت اشوف بنات يتسلون على اظافرهم ويبردونها ومناكير وكدا وفيه اللي يحب يقرا واللي على جهازه
يعني لا تترددين تاخذين لك شي تبينه هو صح فيه شاشه فيها افلام وبرامج واللعاب ، بس احيانا تطفشين منها خاصه الرحله طويله مابتقعدين عليه طول الوقت
6- اما الاكل ، خذي لك قبل ماتطلعين الطايره كيس فيه خفايف ومويه وعصير ، ولو معك اطفال خذي لهم هم كمان اشياء ، اهم شي لا تاخذين لهم اشياء ممكن تحوسكم مثل الشوكلاته وحلاوى مصاص هاذي تعدم ملابسهم
ولو رحلتكم وقفت ترانزيت خلي كيسك بالطايره لا تنزلين اكل معك
7- اول ماتوصلون استراليا ، الاجراءات مره بسيطه وسهله وسريعه ،ويعطوكم في الطايره بطاقه النزول ،، تعبونها او اذا وصلتو المطار بتلاقون نسخ باللغه العربيه اذا تحبين يعني لا تخافي تضيعون او شي حتى لو لغتكم صفررر انجلش ، تمشون زي السلام عليكم
حتى لما تطلعين برا المطار يوصلونك للتاكسي ويركبونك يعني لا تخافي من الحوسه ابدن في المطار
،
واذا وصلتو مدينتكم ، لا تترددين في الترويح عن نفسك وتمشو وانتبهو لا تضيعون اهم شي هههههه
وتعرفي على بنات لا يطقك الهوم السك
هذا اللي عندي واذا احد عنده نصائح زياده او تعقيب على اللي قلته يقووله
وخلونا نفيد ونستفيد
واي سؤال انا حاضره