زوجي غير اسمه ، وابتلشت ب دق الحريم :/

السلام عليكم

ابدخل بالموضوع علطول اول مانخطبت من زوجي كرهت اسمه لكن الكل يمدح اخلاقه وملتزم ومايعيبه شي ،
اللي حولي قالو اذا تزوجتيه اقنعيه يغير اسمه،
بصراحة هو اسمه مو حلو وقديم جدا من الاسماء القديمه اللي معناها عقاب من الله ،
المهم وانا بصراحة دامه اخلاق ورجل ماينعاب وش يضمن لي يجيني افضل منه ؟
تقريبا هالكلام قبل 7سنوات
والحمدلله تزوجته
من تزوجته كنت اقول له واشاوره انه يغير اسمه ، طبعا اكتشفت انه هو كاره اسمه
ويبغى احد يشجعه ويخليه يعزم ويغير الاسم
بعد 5سنوات من الزواج غير اسمه الى افضل الاسماء عبدالله
طبعا قبل مايغير اسمه راح وشاور ابوه علشان ماياخذ بخاطره عليه
الاب وافق وقال معك حق انا غلطت اني سميتك بهالاسم وزين الاسماء اللي انت اخترته
،،،،
انا ما اقرب لزوجي ابدا ولابيننا قرابه ابدا علشان اوضح لكم ،

بعد تغييير الاسم تعالو شوفو الناس كيف تتكلم معي !،

اللي تقول لي دامك غيرتي اسمه متى بتسوين له حفلة العقيقة!؟؟؟؟؟؟
بالله هذي وش ارد عليها !؟

زوجة عمه تقول لي والله ماراح اناديه الا ب اسمه القديم ؟
وبالاساس هي ماعمرها شافته ولا عندنا نظام سلام الا للمحارم !؟
يعني كيف تناديه وهي ماتشوفه ولاعمرها كلمته ولاتعرف شكله بعد وهي مو عجوز يعني شابه !!!!

الكل صار يتريق ويقول كيف اقنعتيه وماقصر سوا اللي تبينه !؟

اهله احترمهم كلهم الا وحدة من اخواته ماحترمها لانها ماتحترمني !؟
قالت لو تموتين مانادية الا ب اسمه القديم وتروح لبنتها الصغيره عمرها 3ونص وتقول لها هذا اسمه كذا (طبعا الاسم القديم)
،،


،،،،

انا اللي بعرف كيف ارد ع هالنوعيه من الناس !؟؟؟؟؟؟
مااحب اجرح احد ، لكن ليش مايراعون مشاعري !؟؟؟؟

عندي بنت عمرها 4ونص والحمدلله حفظت اسم ابوها الجديد
لكن اللي حولها يرددون اسمه القديم وانا مابيها تذكر القديم لأن هذا اسمه الرسمي
ومظطره احفظها الاسم علشان الروضة

ابغى ارد ع هالحريم وتريقتهم بس مو عارفة كيف😢

89 تعليق 15,970 مشاهدة

شاركي في النقاش

سجلي الدخول لإضافة تعليق.

التعليقات

86
  1. @anamyyn

    ماعليك منهم ولا تشيلي هم ...طز بالناس اهم شي انتي وزوجك وبنتك مقتنعين بالاسم وبعدين من وراء خشومهم بيتعودون وينطقون الاسم الاسم الجديد وبتمر السنين وبتشوفين
  2. @hi_hawa

    اووووف من الحريم ولقافتهم 

    قولي لهم

    لو عاجبك خلاص ريحي راسك وناديه بأسمه القديم عشان صحتك حبيبتي اخاف عليك تتمرضين من اسمه الجديد واضحكي بأستهزااااااء 

    وخليكي واثقه من نفسك وماعليك منهم 
  3. @hms_232

    مصيرهم يتقبلون الامر وينسون القديم
    الله يعينك عقليات مدري وش تبي
    اعرف كثيرات حولي غيروا اساميهم وبالبداية الناس تعلق وناس ماينادون غير بالقديم بس مع الوقت كل الاسامي القديمه نسيوها الناس وماينادون اصحابها الا بالاسم الجديد
  4. @aml_alkhrg

    صاحبة الموضوع
    اناميين
    ماعليك منهم ولا تشيلي هم ...طز بالناس اهم شي انتي وزوجك وبنتك مقتنعين بالاسم وبعدين من وراء خشومهم بيتعودون وينطقون الاسم الاسم الجديد وبتمر السنين وبتشوفين
    نسيت اقول شي
    هو غير اسمه بعد 5سنوات من الزواج لأنه كان يدرس بالجامعه
    وقال اذا تخرجت اغيره علشان ارتاح من الاحوال ولاتشغلني ب وقت الجامعه ،
    تقريبا مغير اسمه من 8شهور
  5. @danyh_16

    بالطقااااااااق الي يطقهم اسم عبدالله رووووووووووووووووووووووعه ومبروك عليه

    ومن ناحية الحرررريم اسمعي من هنا وطلعي من هنا لاتخلين احد ياثر عليك الاسم وثبته زوووجك

    وايش عليك هاذي حياتك وحياااته

    قريبتي زوووجها كان اسمه صنت وراااح بعد كم سنه وغيرره محمد واذا احد ناداه صنت بالغلط يزعل

    فصارووا ينادووونه محمد

    زوووجك مو اول واحد ولااخر واحد يغيرر اسمه ماعليك منهم يااااااعسل

    وبالتووفيق لكم

تابعي تجارب أخرى من هذا القسم.