جتني بعثة وخايفة من ردة فعل ام زوجي !

السلام عليكم ، بنات انا قدمت على بعثة الملك وقبلت ولله الحمد وزوجي موافق واهلي موافقين ومؤيدين ، وهو اللي سوا لي اوراقي وسفري ب اخر شهر ٦ ان شاء الله ، المشكلة زوجي ماقال لأمه للحين انه بيروح معي 😔 وهي مرة قوية الله يهديها بس ، مع ان عندها بنت مبتعثة والثانية بالطريق ، بس انا متأكدة انها بتعارض فكرة روحتي وبتتسبب لي بمشاكل ، اقول لزوجي قلها عشان لو رفضت انك تروح معي ، اقدر اغير المحرم واخذ ابوي او احد اخواني ، يقول لا ماراح اقول لين اصدر التذاكر وماعليك هذا قرار خاص فيني ، انا ماودي اروح وهي ماهي راضية وتتعقد اموري ، وبنفس الوقت اذا قلت لها ورفضت وش برايكم ارد عليها ، ادري ان هذا مستقبلي ومحد له شغل فيه والقرار خاص فيني وبزوجي ، بس ام زوجي توصل لمرحلة اذا زعلت تدعي على عيالها وانا مابي هالشي ، ارجوكم دلوني كيف اتصرف ؟ وهل اقولها الحين ولا زي ماقال زوجي ؟؟