الحياة أكبر من ان نحصرها في "زوج"💗

ليتنا كلنا نفهم هالشي بس لو الظروف جابرتنا نحصر حياتنا على هالزوج مثل أهل زوجوا بنتهم وخلاص كأنهم خلصوا من همها كل ماجت شاكيه رجعوها...أو زوجه عاطله ماقدامها الا زوجها مصدر مادي..وغيرها من حالات.....

وهل الزواج واهتمامي بزوجي وحاجتي له تلغي علاقتي بهلي وصديقات
كل شي مكمل لبعض وكلها انحتاجها بس خلينا نكون واقعين الزوج غير عن الاهل او الاصدقاء
بعدين كيف اقلل من اهتمامي بزوجي بحجة انو حياتي اكبر من انو احصرها فيها لان عندي اهل وصديقات طيب هالأهل والصديقات عندهم حياتهم الخاصه مع ازواجهم بيعيشونها معهم ولا راح يفرطون بلحظه عشان يشوفوني فيها
أحنا لما نفهم وش معنا الزواج راح نعيش سعيدين مع شركاء حياتنا
بدون فلسفه ولا سرد ديباجات الزوج وجوده غير وحاجته غير محد يقدر يملى مكانه او يعوض عنه

لما تكون الوحدة في بيت اهلها 
تطلب الاب وتطلب الاخوان 
اذا زعل عليها احد او مشغول عنها في بديل 
الاخوان 
اخوي الكبير زعلني والله مارضيه اطلب اغراضي واتمشى مع اخوي الثاني 
اخوي اذا زعلان مني في بديل الاخ الثاني 
الاب والاخوان اعمدة لي 
الام والاخوان موجودين معي بالبيت اذا ماطلعت نجتمع مع بعض 

بس بعد الزواج 
زعلت من زوجي او زعل مني !!!!
وين البديل ؟؟؟
يطلع ويتمشى ولا سال عني وانا محبوسة بالبيت 
ماعندي احد لا امي ولا خواتي 

حاله نفسية صفر غصب عن الزوجة من السجن واهمال الزوج ولا يوجد الا عمود واحد وصارت في ذمة العمود وتركت الاعمدة 

والله ارحم بعض الزوجات وخاصة الي تتزوج بعيد عن اهلها غصب عنها تعتمد على عمود الزوج 



انا للحين عزباء وعندي اهلي الله يطول بعمرهم 


بس اتكلم عن لسان المراة عندنا 

الزواج شي اساسي ولابد منه هذي عارفينها وماختلفنا لكن فيه بعض الحريم حبت زوجها وقدرت تتكيف معه بكل عيوبه حتى لو كانت سابقا تحب الناس والجمعات بس تركت كل شي لخاطر عيونه و فيه العكس انا مثلا زوجي خذته وانا احبه واموت فيه وماشوف بالدنيا الا هووبس بعد كم سنه من الزواج اكتشفت اني ضيعت احلى ايام عمري واعتزلت الناس لمجرد اني تزوجت لاني اول ماتملكت قالي ترى ماحب سالفة بروح لصديقاتي قلت عادي ابشر قال ماحب روحات الاسواق كثير قلت سم طال عمرك قال احب الحرمه اللي اذا قلت لا ما تجادلني قلت ابد كلمتك مسموعه لدرجة اني الغيت شخصيتي تماما صح الحين استرجعتها ومعاد حصرت نفسي فزوجي صرت اعرف تماما ان الزوج ممكن يتزوج عليك ممكن يخونك ممكن يطلقك بكل سهوله يعني الحمدلله صرت عايشه مع زوجي لكن مو عايشه له ولا عشانه وعلى فكره زوجي انسان كويس والحمدلله لكن انا معاد عندي ثقه فالحياة

ذكرتيني بامي وانا صغيره كل ماقلت بقص شعري قالت اذا اعرستي واذا قلت بحط روج قالت اذا اعرستي واذا قلت خلنا نسافر قالت رجلك بيسافربك اذا اعرستي صرت اتمنى العرس من عمري 8 سنين اقول مشاء الله وش هالعرس اللي بيصير مثل صندوق علاء الدين كل شي بيسويه لي :icon31:كانت احلامنا بسيطه مادرينا ان العرس فيه مسؤوليات اكبر من سالفة روج ولا شعر