من قصص الأولين

موضوع الأخت بنت سليمان أعجبني ,وكم هي ممتعه قصص ونصائح الأولين .فنقلت هذه القصه لعلها تعجبكم .

السلام عليكم ورحمة الله وبركاته
رايٍ سديد ومنها نستفيد
وهاذي سالفه لا قالوا ماعندك سالفه
كان فيه رجاّل توّه معرس وفقران ما عنده قرش .. قال لمرته : يامره بأروح أسج في الأرض أدوّر رزق الله قالت : الله يوفقك
مشى الرجال ومعه ثلاث من الإبل ويوم هو طالع من ديرتهم ألا ومنادي ينادي من يشتري النصيحة من يشتري النصيحة ( كانت النصايح تباع بالأول ما هو مثل هالحين ترمى بالزبالة )
قال بأشتري النصيحة من ذا يمكن تنفعني
قال بكم نصيحتك ؟ قال المناجي الحكيم : عندي ثلاث نصايح بثلاث من الإبل .
قال : هات نصيحتك الأوله ؟
قال الحكيم : إذا سافرت لا تخاوي اللي عيونه زرق وسنونه فرق
قال : الثانية ؟
قال : إذا بغيت تمرح ( تنام ) لا تمرح بوسط وادي
قال : الثالثة ؟
قال : أجلّ عمل الليل لين تبدي الشمس
قال وهذي الثلاث نياق
ومشى أخونا بالله ما معه شي .. وأظلم عليه الليل وهو بالطريق ألاّ وذاك الرجال اللي متلطم قال بأخاويك قال : تم
مشوا شويّ وقال خوينا خلنا نمرح تحت هالشجرة قال خويّه تم
المهم نزلوا وفك خويه اللطمة ألا وعيونه زرق وسنونه متفرقات عن بعضها
تذكر خوينا النصيحة وإستشك في قلبه وما نام طول الليل
قبل يطلع الصبح فتح خوينا عبنه ألا وأبو عيون زرق فوقه بحصاة كبيرة يبي يذبحه وعلى طول يزرق خوينا من تحته ويلتف من حوله ويخنقه وقال وش تبي
قال أبي أذبجك وآخذ قروشك قال خوينا ألاّ أنا اللي بأذبحك وآخذ قروشك
المهم توسل له وفكه خوينا بعد ما خذ كل اللي معه
قال في نفسه هذي النصيحة الأوله وطاحت بحسابها
كمل طريقه ألاّ وهاك الوادي اللي كله ناس ودكاكين ذهب وأقمشة وأنعام نزل تفرج لين أظلم عليه الليل ونام بأحد الفنادق اللي بالوادي ( خيمة طبعاً وخمس نجوم بعد ) يوم إنتصف الليل ألا وفي قلبه صوت الحكيم ( لا تمرح بوسط وادي ) ويفز ويطلع وينام على شنق الوادي وما هي ألاّ لحظات والسيل الكبير يجتاح الوادي ويقشّ كل من فيه بدكاكينهم وحلالهم
جلس خمسة أيام على جرف الوادي لين إنتهى الما ونزل وأخذ الذهب اللي ثبت في بطن الوادي من الدكاكين
وقال هذي النصيحة الثانية طاحت بحسابها
أقام الرجال بالقرية اللي جمب الوادي سنين ودنين وسوى دكاكين وإشتغل لين جمّ? مال وحلال وأنعام وخير وفير
المهم قال هاذا يسدني أبي أرجع لأهلي بعد الخمسطعشر سنه غربه
رجع ووصل بيتهم بالليل دخل مع الباب ( ما فيه بييبان مشرّع ) لقى مرته راقدة وجمبها ذاك الرجال المنسدح
قال في نفسه ( إعقب مرتي تخوني في غيابي أفا يالعلم )سل سكين يبي يذبحهم ودقّ بقلبه صوت الحكيم : أجّل عمل الليل لين تبدي الشمس
قعد برّا لين جا الصبح دخل البيت لقى مرته تسوي القهوة والرجال المنسدح جمبها رحبت برجالها : يا مرحبا يا أوب فلان هلا والله ، يا فلان قم سلّم على أبوك .. طلع ولده جا عقب ما راح
قال وهذي الثالثة
وإنتهت السالفه عساها أعجبتكم

20 تعليق 15,352 مشاهدة

شاركي في النقاش

سجلي الدخول لإضافة تعليق.

التعليقات

18
  1. الله الله رهيييييييبه القصه
    وسردت بطريقه حلووووة حسيت كأن اشوف مقطع فيديو لفيلم مو قصه مكتوبة
    سلمتي حقوقه عجبتني القصه ♡♡♡
  2. @kl_alkhyr

    لا اله الا الله
    يسعد قلبك حقيقتنااا الساطعة
    قصص اول تااااخذني لذكرياااات عن والدي رحمة الله
    كان اذا جاء العصر وصلى وعين من الله خييير
    طلب القهووووة والتمر وجلسنااا حوله وقام يقول لنااا قصص يسردهاا لنا وكانااا في احداثهااا
    رااح وراحت سواليفة
  3. صاحبة الموضوع
    بنتـ سليمان
    قصة حلوة وفيها حكم يازين قصص الأولين مشكورة أختي الحقيقة الساطعة
    الله يرحم والدك ويغفر له ,ترك لكم الذكريات الجميله ,نور المتصفح بوجودك أختي كل الخير.


    هلا يازهره النرجس ,العفو يالغاليه وبارك الله فيك على المرور.


    أهم شيء أنها أعجبتك يالغاليه ,الله يعطيك العافيه.


    فعلا ياحلو قصصهم وحكمهم,العفو أختي الفاضله بنت سليمان.

تابعي تجارب أخرى من هذا القسم.