نفاسي في بيتي بإذن الله.....اهم التجهيزات بالتفصيل

انابنفاسي هذا ان شاء الله بيكون ببيتي
لان عندي ثلاثه أطفال يدرسون وولادتي بتكون وقت مدارس
اول مره بتكون فترة النفاس كلها ببيتي ان شاء الله ربي يسهلها ويتمم حملي على خير
في بالي فكره أني اشترك مع طباخه كل يوم تجيب لي فطور نفاس لان اهم شيء الفطور
وقت النفاس
وبقدم بشغاله ان شاء الله توصل قبل ولادتي

والله يوفقكم جميعااا🌺


رب اجعلني مقيم الصلاة ومن ذريتي 🌹

وبماان أمي تشتغل راح اطلب منها تجلس عندي على الأقل أسبوع
تونسي


رب اجعلني مقيم الصلاة ومن ذريتي 🌹

يسعد لي أيامكم يا كروشات
السموحة غبت كثير .... وفررحت لمارجعت بالتفاعل وانه في كثير ماشاءالله راح يجربون التجربة هذه

• النفاس بالبيت له ايجابياته وله سلبياته ...وكلن حسب قدرته الجسدية والنفسية وبالاضافة الامكانيات اللي نقدر نجهزها لانفسنا من بدري
• الاعداد والتخطيط المسبق خطوة مهمه مع التأهية النفسية والتشجيع الذاتي...كثير لما اقولهم نفاسي في البيت من صديقاتي اوحتى خواتي امهات من قبلي يخافون من الفكرة وكأنها مغامرة

عاد ما علينا منهم....خلونا بالمهم ويكفي دلع نسوان

انا وحدة احب بيتي ولأني بعد ما ابي اتعب ماما معي....وبابا بعد بضيق عليه راحته لو كثرة الضيوف
اناعايشه بين هلي وجماعتي ومعارفي كلهم قريبين ....زوارنا كثير بالنفاس وحابه انظم حتى وقت الاستقبال مايكون مفتوح بشكل عشوائي ...بخصص ايام الويك اند فقط للزيارة لانه حتى زوجي يبي راحته


خلال الفترة اللي غبتها عنكم كنت اكتب فيها القوائم اللي بجهزها بإذن الله
قبل لا انسى ابي اقول لكم انا الحين بالشهر السابع يعني عندي الوقت شهرين قدام وكل شي على الراحة







بالنسبة للمطبخ : مشكلتي كانت في غسيل الصحون :3_13_12:وهي احد اسباب ضياع الوقت واوقات اخليها تتراكم لانه ما اقدر على كل شي وانا لسى طالبة بالجامعة ...والحمدالله جبت غسالة الصحون من شهرتقريبا ومطبخي يلمع نظافة لانه تنظيف باقي المطبخ ما ياخذ وقت كثير مسح وكنس وتعقيم


قبل يومين حاولت اعيد تنظيم الادراج والادوات اللي بداخل االمطبخ واعيد ترتيب اللي استخدمه دايم اخليه قريب
واللي استخدامه قليل ينحشرداخل ....وقررت اخصص ارفف جديد لسى بجيبها عشان صحون التقديم والاستقبال تكون في مكان لحالها


طبعا...برنامج استغرام كثير ملهم بالافكار بالتنظيمات والترتيب ساعدني كثير ويعطيني حماس بقوه
كذلك نظفت الفريزر وحاولت اتخلص من اشياء واسوي مساحة كافيه عشان قبل الولادة بيكون في مفرزنات راح اطلبها جاهزة ...بالاضافة الى طبخات يعني مو طبخة كاملة ...مثل تتبيلات دجاج ولحوم مقطعه بتكون موزعة باكياس بكميات تكفي لوجبه تخصني وقت النفاس


بنات وقت النفاس ...ممتوع تتحركين كثير وممنوع تجوعين ولازم طوله بال وخصوصا لو عندك اطفال قبل...الاهتمام فيهم غصبن عنك وهما مايعرفون مقدار التعب اللي تعانينه مهما شرحتي فعليك بالصبر


زوجي ...الى الان مو متقبل الفكرة ...وخايف من المسئولية علي واممممم ومأاارب اخرى للرجال بس ماراح اخليه ويخلى له الجو....ولانه ولدي متعلق فيه بصراحة وابيه بين يوم ويوم يطلع فيه يخلوني انام بدون ازعاج
لازم يتحمل معي التعب...وان شاءالله ماتكون ايام تعب...في تنظيم ديكوراتي الجديدة حتى لو حابب يقضي مثلا يوم من ايام اللي فيها عندي احد بالبيت بيكون مكانه خاص وبعيد ولا رااح ينزعج من شي بإذن الله
انا الشقة حقتي فيها مدخل خاص للمجلس وله حمام ومقلط يعني مافي احد يدخل البيت كله الا عاد اذا صارهلي او اهله اكيد بيتحركون هنا وهناك لكن بشكل عام بحرص انه مافي احد يتعدى المنطقة اللي فيها الاستقبال وبس



عادتنا خصوصا للأهل بعد اقهوة والشاي والتقديمات اللي معها ...نضيفهم على عشاء بسيط اما سفرة كاملة يجلسون فيها او صحون تتوزع فيها من كل الاطعمة الثقيلة والمقالي والمقبلات كطبق شامل يوصلهم وهما جالسين في مكانهم مع العصيرات

طبعا هالشي مو أساسي عند كل الناس وكلن حسب عاداته وطريقه اهله وفترة بقاء الزوارعنده



حاليا اسوي بحث بالنت واستغرام شغل بيت يوفرون لي بوفيه صغنون بميزانيه معقوله بالاضافة الى اطباق امي الله يخليها لي بتزيد السفرة حلاوة واناعلي فقط تنظيم الاطباق والملاعق والمناديل والشموع وحركات الجمالية





نرجع للمطبخ :icon29: عليك تنظيمه ومعرفه كل الادوات الناقصة عشان توفرينها و تخلصي من الاشياء التالفة ورتبي الدروج والارفف وحطي لك تقويم \كالندر التاريخ .....أحب اتابع الايام بالاسابيع والشهور


وعودي نفسك على قومه الصباح :time:تراها بركة بالوقت ومنها تخلصين شغلك قبل مايصحون اولادك لو كان في اطفال...الحامل تفيدها الحركة بس مو الكثيرة طبعا والمجهدة


من خلال ترتيباتي اكتشفت :unsure: انه احتاج مشتريات لعدة التقديم والضيافة

اصلا حلو التجديد ونظرا في ناس راح تكون زيارتهم الاولى لي خصوصا لاني من سكنت هالشقة الجديدة ما استقبلت كثير انشغلت بالدراسة ودخلت فترة الوحام والنوم يعني مو فاضيه للعالم


عشان كذا لا تحسون اني ابالغ بالترتيبات ....انا مشتاقة اني استقبل وابين السنع حق سارونا

ترى لسى ما خلصت كلام عن المطبخ بس بنط لشي جديد:icon30:



كتبت قائمة تجهيزات الام والنونو

مو كثيرة بس بعد لازم نراجعها سوى وذكروني باللي ناقص





next

كلامك سليم ماشاء الله عليك
انا بعد قررت نفاسي الثاني ببيتي
لان مااخذت راحتي ببيت اهلي وزوجي رايح جاي
وعندي اخوات ومرات ينام عندي

واصلي ياحلوه واحنا معاك

تجهيزات الأم /

1- عدد من البجامات القطنية المريحة


انا بالنسبة لي ااحب البس الترنقات السبورتيه عادي موشرط فتحات اماميه لانه البس بودي تحت البجامه وارفع قميصي وارضع ولا يظهر بطني ولا شي اخر

2- سراويل قطنيه اللي هي ليقنز متوفرة باغلب المحلات واحبهالانها ضيقة وتمسك بالجسم وتدفي
اذا كنت ولادة قيصري لا تلبسين ضيق طبعا....تنفع تلبسها وقت التدهن والخلطات تحت البجامات عشان لا تتوسخ بجامتك الاساسية

3- عدد ملابس استقبال بجامات حرير وارواب طويلة قطنيه او حرير ( يفضل الالوان الفاتحة بيج -ازرق -رمادي - وردي- اخضر فاتح و ممكن شي بنفسجي )
وياليت تحرصين يكون كم طويل اكشخ ,

4- كلوتات قطنية من النوع الرخيصة
5- كلوتات اليومية اللي استخدام مرة وحدة تلاقينها في مذركير او الصيدليات وشفتها بعد في سنتر بوينت

6- جوارب قطنيه _ 2 شبشب - شنطة للمستشفى لملابسي وعدتي


7- Sitz Bath وهو اللي يستخدم فوق التواليت عشان الغسولات من تحت والتنقع للمنطقة الحساسة

[]
8- من الصيدلية :
ديتول - مرهم افالون للمنطقة والغسول بعد نفس الماركة - فازلين كبير- كريم جلوسيد الاحمر- فوط صحية حجم كبير جدا - فوط للصدر - لبادات يوميه للسرير عشان ما يتسرب شي على السرير مع الحركة - قطن دوائر - اعواد قطن - شاش - مسحات طبيه

اممم لسى في كريمات بسوي بحث عنها عشان التفتيح للجسم وبشوف تنفع للمرضع او لا

9- من العطار (الحواج ) :
ربع كيلو من كلا من: يانسون حب - حلوة حب - مر - لبان الذكر - حبه البركة- قرفة مطحونه - كمون حب - كمون مطحون - قرفة ناعم - قرفة اعواد- محلب - عنزروت - مرميه

ونصف كيلو من / قشر القهوة كمشروب يومي هام - سكر نبات
كيلو رشاد اللي هو الحبة الحمراء مره مفيد في تنظيف الارحام وله طريقة مع التمر واكلات شعبية

الزيوت للعناية بعد اسبوعين من النفاس / زيت اللوز الحلو والمر - زيت جوز الهند - زيت السمسم


10- من السوق ( مسك أبيض نص توله لي وللبيبي _ دهن عود - عطر خفيف من عطور زهورالريف بريحه باردة مو قوية )
بالاضافة الى علبتين ثلاثة حمام مغربي - ليفة مغربي جديدة - مقشر كاب- فرشاة الاستحمام هذه الفرشاة اللي ماعرفت فائدتها الا مؤخرا انها تزيل السيولايت من الجسم اذا داومنا بتدليك الجسم فيها عند كل شاور بزيت جونسن - صابون بابايا كمية - شفرات حلاقة و حلاوة )

احتاج كذلك علب وبرطمنات عشان ادوات العطار ارتبها فيها واكتب عليها باخذها مفاس واحد حلو واحطها في مكان مرتب سهل الوصول لها وبعيد عن طفلي الاول



تجهيزات النونو :
1- من السوق : ملابس داخلية قطنيه ابيض - قبعات - بربتوزات كاملة - امهدة او اغطيه للنونو ابيض - كيس للنونو كشخة ولون فاتح - جوارب - صناديق لتنظيم ادواته - 2 منشفة استحمام

2- من الصيدلية : 2 رضاعة زجاج صغير لليانسون والتمر - 2 رضاعة زجاج كبيرة - حلمات - فرشاة تنظيف الرضاعة - ستاند تجفيف الرضعات- حليب - عدة الشاور من : شامبو وجل استحمام وكريم وزيت وبودرة - اسفنجة الشاور- مناديل مرطبة لتنظيف - قطن طبيعي يجي زي الرول افضل شي - كريم الاسد )

3- عندي سرير للنونو لونه بيج بس يحتاج مفرش جديد وافكر اصبغه بلون بني عشان يتماشى مع لون دولاب طفلي الاول في الغرفة

4- بجيب ستاند طاولة تغيير للبيبي افضل وانا واقفه انظفه والبسه وقت النفاس طالما لحالي شفته بايكيا وسعره حلو

5- جهزت له ادراج للملابس وهي عبارة عن الشوفنيرةحقت غرفة نومي ...قلت استفيد منها بدل كثرة المشتريات وحطينها في غرفة ولدي الاول

زي كذا وبيكون نومي في غرفة معاهم طيلة فترة النفاس عشان ازاعجنا وريحة الخلطات ما تكون عند زوجي ...باقي اجيب سرير ابو نفر لي وبعدها يكون لطفلي الاول بغرفته ثابت على طول

6- مفرش سرير

بس هذه التجهيزات لي وللنونو
وقت الاستقبال بيكون في المجلس بحط لي اريكه زايدة عندي مريحة وعليها مخدة والنونو عندي سرير خفيف اللي يتركب وينرفع قوف الستاند ناعم ....


ان شاءالله ما نسيت شي