رومانسيه زوجي..

صباح الخير ..كيفكم ي اخواتي
بحكي لكم الي صار معاي خصوصا اني بفتره نفاس ولله الحمد وصلت ثلاثين يوم ..
من ولدت زوجي يمكن ثلاث او اربع ايام اهتم بعدها طلع منه اخطاء كثير خصوصا يجي ايام يسافر ويتركني يتحجج بأشغاله كان يدور اي طريقه يخرج من البيت ويتركني طاردني من غرفتنا بحجه انه وراه دوام ومايبي ازعاج البيبي اشياء كثير سببت لي نوبه بكاء واكتئاب بعدها رحت لاهلي وخليته بسبب اهماله لي قلت اغير جو وانفس كم يوم عند اهلي وابتعد شوي عنه ماتلاحظون قد ايش كل يوم متكي في البيت وفضاوه ماعنده ولاشغله واستغرب ماعنده اشغال بعدها كنت المح لزوجي اني استاهل مفاجأه وهديه وكمان بخصوص الراتبين وهديه ولاده كان يسفهني اراسله واتس حاولت اعبر عن مشاعري اقول ايش ناقصني من ناحيته برضه ماكأني قلت شي سكت قلت يمكن يفاجئني لارجعت وقت الي رديت كان جدا جاف وبارد حاولت اتقرب منه حسيته اناني يبي مني انا الي اتودد وانا الي اتكلم وانا الي امدح بس هو لا واذا قلت شي قال احمدي ربك غيرك مالقاه ...تحطمت كثير يوم الي قلت انا ناويه اخلص الاربعين وابي نسوي حفله لاهلك ونتجمع وكذا لانهم ماقصروا معاي ببدايه نفاسي قبل اروح لاهلي قال لي خلاص اهلي وزعت عليهم هدأياهم قلت شنو قال حقت الراتبين كل واحد اخذ نصيبه طيب وانا !!!! قال انتي ايه صح هديتك 500 خذيها من الدرج ..اذا اني صارفه من فلوسي عند اهلي اكثر من هالمبلغ عشاني وعشان ولدي للحين ماسدده يديني 500 وبهالطريقه ..تمنيت تكون بأسلوب ثاني احسه جاف ماعنده رومنسيه ماعنده حسن تصرف كل شي عنده احمدي ربك غيرك انضربت ولا ماسافرت ووو ..وربي لو يفاجئني بورده يمكن فرحتها ماتوصف جنب اسلوبه وهديته..
الموهم عاد لاتضحكون علي انا هنا انفجرت قلت اصرح بوجهه لين متى :-) قلت مابي كذا ي فلان انا يوم الي اهديك اسوي كذا قال لا قلت اجل قال حفله وجو وهديه قلت طيب ماستاهل قال مالي حيل انتي فاضيه قلت طيب ذا اسلوب تقول خذيها من الدرج قال والله ماعندي وقت اروح اشتري لك فيها شي ...كل حياته شغل وجوال يعلم الله اني طول حملي اتمنى العمره وقلت بحجز لنا فندق وأفاجأه اغير روتين مليت من جفافه حطمني وقال مانبي موفاضي..وربي عمري ماطلعت معاه طلعه ولاسفريه الا جواله مايسكت طول طريقنا مكالمات ويحسسني انه مشغول واني ثقلت عليه احيان تتكنسل بسبب اشغاله ..طيب لين متى انا انسانه ابي احد يحس فيني يبادلني مشاعري هو موشايف الحياه الا من جهه انها اشغال وانه رجال وماقصر عشانه مكمل بيته ويودينا ويجيبنا موحاس ب الفراغ الي فيني ..واذا تمشكلنا هددني ب الزواج ويقول عني بارده واذا قلت انا موبارده بس انت ماعندك مقدمات ماتعترف فيها ماتحمسني لها الشي يعلم الله انه اناني يبي كل شي سريع وجاهز ويديني ظهره وينام ..كان يتحجج بأنه وراي نوم مافيه وقت ومرات يقول ادري فيك ماينفع ليش اتعب نفسي كله تحطيم ..
ابيكم تتصحوني كيف اغير منه خصوصا باقي كم يوم ع الاربعين واخلص.
امنيه كل وحده منا تكون مكان اهتمام من زوجها لو بكلمه حلوه تكفينا ماطلبت شي كثير منه بس جد ي بنات احيان وربي تمر علي فترات ابكي فيها ع نفسي احس اني تايهه محتاجه لو كلمه تهديني ماتدرون قد ايش عانيت بدايه نفاسي لما طردني من غرفتنا كنت مثل الكلبه لوحدي مع الصغير اكل واشرب واجلس لوحدي تمر علي كآآآبه ودي بإنسان يحس فيني ويلمني مالقيت ..