السلام عليكم و رحمة الله و بركاته
اعشق الاستماع لتجارب الاخرين جدا جدا و احرص اني استفيد منها ....صحيح ما نقدر نطبق كل شي بالضبط بس على الاقل ممكن تستفيدي بشكل عام
من فترة كنت عند عمتي و صادف ان جارتها عندها المهم تكلمت عن اخوات زوجها ما شاء الله و كيف انهم مدبرات و متساعدات مع بعضهم
هم أربع خوات و بيوتهم جنب بعض ... ثنتين منهم أزواجهم أخوان و أزواج الاخوات الاثنين الباقيين قرايب المهم ان ازواجهم كلهم من نفس الجماعة و قرايب
كل وحدة من الاخوات عندها شغالتين و سايق الا وحدة منهم عندها شغالتين و سواقين اثنين
و الاخوات كلهم موظفات الا الكبيرة ربة بيت
اول شي نظامهم في رمضان هو التعاون
يبتدي الشغل من بداية شعبان
كل وحدة من الاخوات تدفع مبلغ محدد يخصص للبهارات و المفرزنات بكل انواعها
بعدها يبتدي مشوار التسوق و هنا يتوزع التسوق للمواد الغذائية على الاربع خوات بالتساوي
***تحضير البهارات المخلوطة و هي طبعا تحتاج وقت لانهم يشترون البهارات مفرقة و ينقوها و يغسلوها و ينشفوها و و و سااااالفة طويلة يخصصون لها شغالتين و معهم الاخت الكبيرة تشرف عليهم و لما تجهز البهارات تتوزع على الجميع بالتساوي
*** تحضير المفرزنات
تتحدد المفرزنات و يشترون المواد اللازمة
يتم الاتفاق على ايام محددة للعمل ...اثنين من الاخوات عندهم اطفال صغار و الباقيين اولادهم كبار معتمدين على انفسهم ...تتجمع الاخوات في يوم في بيت وحدة منهم بحيث ان البنات الكبار يمسكوا الاطفال الصغار و الامهات يتفرغوا للمطبخ و كل وحدة تجيب معها شغالتها و وحدة تخليها بالبيت يصير العدد اربع شغالات و الاخوات اربع العدد ثمان ... و يبتدون الشغل مثلا اليوم فقط الكل يشتغل لف سمبوسة حشوات مختلفة اليوم الي بعده كبة اليوم الي بعده ورق عنب و هكذا لحد ما يخلصوا من المفرزنات الحلو هنا انهم يكونوا مع الشغالات و منتبهين عليهم و على نظافتهم في الشغل و كل وحدة لابسة قفازات و مغطية شعرها .
كل الانواع تتعبا بعلب متساوية الحجم و تتوزع بالتساوي على الكل .
خلال شهر رمضان
الاخوات عددهم اربع ما شاء الله و الشهر اربع اسابيع اذا كل وحدة تمسك اسبوع
مثلا الاسبوع الاول الاخت الكبيرة عليها الطبق الرئيسي بس و يتوزع للكل الاخت الوسطى عليها السلطات و الشوربة بس و تتوزع على الكل الاخت الي بعدها عليها طبقين جانبيين و حلا و يتوزع على الكل و الاخت الاخيرة عليها بس اكل الخدامات و السواقين
كل الخوات خداماتهم ما شاء الله طباخات بس كثير مرتاحات على هذا النظام و الاخوات يشرفوا عليهم
الاسبوع الثاني من الشهر تتبدل الادوار مثلا الي كانت ماسكة الطبق الرئيسي حتمسك السلطات و الشوربة و هكذا
المفرزنات و السحور كل واحد لحاله
في الايام العادية يطبقوا نفس الشي يعني الغدا يصير كل اسبوع على وحدة من الاخوات و يتوزع على الكل و العشا حسب الاتفاق يعني الشغالات في بيت كل اخت بس يجيها الدور تطبخ اسبوع في الشهر
ميزانية المفرزنات و البهارات كل وحدة من الاخوات تحط نفس المبلغ لان الكمية بعدين تتوزع بالتساوي لكن للغدا و الفطور في رمضان لااااا على حسب استهلاك كل عائلة يعني الي عايلتها اكبر حنرسل له اكل اكثر اذا لازم يزيد المبلغ الي حيدفعه للمقاضي و ما شاء الله مرتاحين و مضبطين امورهم على كذا
غير انهم ما شاء الله يحددون جدول تنظيف عميق مرة بالشهر لبيت كل وحدة فيهم تشترك فيه كل الشغالات يعني بنات الخالات الكبار و الخوات يمسكون الاطفال الصغار و الاخت الي جاها الدور لبيتها للتنظيف العميق هي و وحدة من اخواتها يشرفوا على ثمان شغالات ينظفوا البيت تنظيف عميق و كل شهر يمشي الدور لوحدة من الاخوات
اهم شي ان الشغالات عاجبهم التوزيع العادل :)
ما شاء الله تبارك الله عجبني نظامهم كثييير
شاركي في النقاش
سجلي الدخول لإضافة تعليق.
التعليقات
16- ماشاء الله تبارك الله ..
وضعهم ماشي صح لانهم ساكنين جنب بعض وبنفس الديره الله لايغير عليهم ..
يعطيك العافيه - ما شاءالله عليهم ... الله يبارك لهم و يجمعهم على خير
- حلو بس كل وحدة عندها شغالتين يعني ماشية أمورهن والحمد لله
- حسيت شوي مبالغة في الموضوع
- حلو التعاون بس احس فيه مبالغه وتعب ف الموضوع يعني مثلآ ف الأيام العاديه كل وحده تجلس اسبوع كااامل تطبخ غدا وبكميه كبيره
احسه صعب امكن اطلع اتغدا برى او انعزم اجلس افكر ف اكل خواتي>>هههههه
بس امكن امورهم ميسره عشان عندهم شغالات
الله يرزقهم ولا يغير عليهم
مواضيع مشابهة
تابعي تجارب أخرى من هذا القسم.