اللي ام زوجها واخته او اهله دايم يمدحون الحريم قدام زوجها

عادي ولا يحرك فيك ساكن
وانت جربي تتكلمي مع ابو زوجك وامدحي في حريم بسن ام زوجك

شوفي اذا ما بطلت

كانت تمدح وعادي عندي اضحك واؤيدهم والا ما تستاهل مدح اقول عاديه ويمكن عند الله احسن مني ومنهم
حتى ف التلفزيون شوف ذي وذي تهبل وعادي لاني ثقتي ما تهتز ابدا
وكان مدحو قبل اتزوجه مو الان

أحس الأم إذا اعجبت بحرمه تحب عيالها يشوفونها أو توصفها لهم موب قصدها زواج

أنا تمدح قدامي وأنا عااادي. لأني عارفه إنه موب قصدها ، بس أقول لها أحيانًا حرام وصف المرأة عند الرجال

عادي أحيانا امدح حرمه عنده أقول إنها جميله بس بدون تفاصيل


يا أختي الرجال الله فطرهم يحبون جمال المرأة مثل ما احنا نحب الرجال اللي عنده فلوس ولما نسمع عن غني نعجب فيه هل يعني هذا إنا نهين أزواجنا !

ياما كانوا يسوونها وبصراحه كنت انقهر لكن اسكت لان ادري وش غايتهم من هالمدح والوصف


لحد ماجا اليوم اللي وصفوا فيه زوجة اخوه اللي خطبوها


مدحوا فيها لدرجة الرجال انخطف عقله معها ويسألني بعد حفل الخطوبه كيف شكلها هي نفس ماوصفوها ولا لا


ومن قهري سكت ولا رديت عليه


لكن الحمدالله ربي فضحهم مره ورى الثانيه


اولها لما كان اخوه يبي يحجز الفندق ليلة زواجه اعطاه كرت العايله وهنا كانت الطامة طلعت اكبر من زوجي


وهم قايلين له اصغر من مرتك هههههه على اساس كل ماصغرت الوحده بالعمر صارت افضل !!


بعدها طلعنا معاهم وشافها بالعبايه وانصدم انها مو طويله وجسمها عادي


واهله كانوا واصفين له انها طويله وجسم وخصر وارداف


وربي حتى عيال عايلتهم مدحوهم وان خلفتها اكيد حتكون مثلهم ( وانا وقتها كنت متأخره بالحمل وادور علاج )


المهم ان من بعدها زوجي ماعاد يصدق وصف اهله وكل مامدحوا وحده ذكرهم بزوجة اخوه والصواريخ اللي قالوها عنها


والحين لهم فتره طويله ماعاد كرروا هالحركه لدرجة نسيت متى اخر مره مدحوا وحده قدامنا

اذا مدحت وحدة من خواته وكانت مي حلوة قولي ايهو احسن انتي والا هي اكيد ماراح تسب حالها وحتى لو قالت هي قولي بالعكس انتي اجمل هي مسويها طبقات المكياج الي حاطته والا علقي ع الوزن وبكذا يقارن بينها وبين اختة ويلفت النظر عنها استخدمي مدحها لغيرك قدام زوجك سلاح ضدها 

موضوع قهرني واستفزني اول ايام زواجي اما الحين جعلهم في حريقه مااهتميت انا من يمدحون صديقته زمان ومن الي يمدحها اخت زوجي بس الايام بتدور تجيها مواقف تعلمها وبعد تزوجت زوجي كرهته تخيلو وصف كل بنت عنده 😤😫قلت له محسسني انك مو رجال بس تدور لعلوم النسوان 😝😝😝بعدها انفسخ وقلت الرجال الي يخاف على عورت عياله ومحارمه الناس مايتعدونها بس الي يتتبع اشكال عورات الناس ربي يكشف عورته اي نعم المراءه كلها عوره تغطت منك واهلك كشفوها لك والحين خف الموضوع فباقولك البلا بزوجك يوقفهم