السلام عليكم ورحمة الله وبركاته
يا اخوات انا احس بتغير كبييييييييييير فيني مع الاسف مو للاحسن التغير الي فيني صار للأسوء وهالشي مضايقني كثييير
انا كتبت موضوع قبل فتره طويله عن ظروفي وزوجي الي صار مقعد
الحين يابنات اتغيرت ماعاد انا الانسانه الاوليه احس اني صرت انسانه سيئه والعياذ بالله
اول شي تغير فيني عبادتي قلت صلاتي صرت أاخرها واتكاسل عنها كثيييير كنت دايم اسبح و استغفر وادعي وهالشي على لساني على طول الحين نااااااادرا لو استغفرت او سبحت او هللت وكبرت والقران صرت اهجره
صرت انسانه عصبيه بشكل مو طبيعي مع زوجي فقط صرت ماعاد اتحمله ولا اتحمل كلامه وتصرفاته وهو بعد صاير جدااا عصبي ويتنرفز من اتفه الاسباب سواء مني او من بناتي او اي احد
صايره اشك بالناس كثير و احس انهم مايتمنون لي الخير
صرت اكره الطلعات وبنفس الوقت اتضايق من قعدتي بالبيت ودي اسافر ودي اتمشى ودي اسوي كل شي صحيح زوجي مو مانعني ابد الحمدلله ويقول روحي واطلعي محل ماتبين بس ماعاد فيني طاقه وبس خمول وتعب
كنت افكر اني اسوي مشروع عشان اساعد نفسي وبناتي وزوجي وبيتي بسبب الضيق المادي الي عايشه فيه من بعد السعه والنعيم بس مع الاسف مجرد تفكير بدون تطبيق يعني كل يوم اقول بكره اسوي وافعل ولاكن ماعندي اراده ولا عزيمه ولا الاقي تشجيع من احد ودايم محبطه مع اني زمان ماكنت كذا ابدا والله العظيم
صرت اغار كثير من الناس الي احسن مني سواء في البس او الاثاث او الطلعات والسفريات صرت اغار حتى من اقرب الناس لي والله العظيم
اشوف الناس احسن مني في كل شي وحظي دايم للاسوء الله المستعان وظروفي كل مالها للاسوء سواء الظروف الماديه او علاقتي مع زوجي لدرجة اني لو حسيت اني مختنقه وبنفجر واتهاوش معاه على اي شي اعايره باعاقته وهذا اكبرررر غلط ارتكبته في حياتي و اندم عليه لاكن ارجع كل ماضايقني اعايره و اقوله احمد ربك اني متحملتك لا وظيفه ولا عيشه زي الاوادم و سفر ولا طلعات ولا شي المفروض تسلم على يديني وجه وقفا اني متحملتك
ادري ان هالاسلوب جداااا غلط مع زوجي بس لا شعوريا والله العظيم اقول كذا ولمن اهدا اندم وابكي من قهري على زوجي وعلى كلامي معاه واتاسف منه وهو يسامحني يعني صايره سليطة لسان حتى زوجي ماعاد احترمه واشتمه واتطاول عليه والله بعد ما اهدأ احتقر نفسي كثيررر :(
ماعرف انا ليش تغيرت وصرت انسانه سيئه لهذه الدرجه هل هو بسبب الضغوط النفسيه وان حياتي اختلفت عن زمان مع زوجي كنت عايشه برفاهيه ودلع ولا اتحمل مسئولية شي ابد والحين اتبدل الحال للاسوء وصرت اتحمل حتى مسئوليه زوجي وبيتي و بناتي وفواتير ومقاضي البيت ومشاوير وكل شي احس تعبت انهد حيلي والله العظيم ولا ادري كيف اتصرف وكيف اتغير للافضل مثل قبل
حتى شغل البيت اهملته صحيح انظف واحب النظافه لاكن صرت ما ارتب ولا لي خلق ارتب شي كل البيت صحيح نظيف الحمدلله لاكن مو مرتب
دايم احس بضيقه وخنقه بصدري وودي ابكي وا نفجر
ابي اغير من نفسي ابي ارجع مثل قبل انسانه نشيطه ومتفائله ابي يكون عندي اراده وعزيمه للحياه وابي اسوي مشروع لو منزلي واكسب منه رزق حلال لاكن مب عارفه شلون اتصرف و وش اسوي
ياليت تنصحوني وتدلوني على الخير
شاركي في النقاش
سجلي الدخول لإضافة تعليق.
التعليقات
20- لا تنسوني من دعواتكم ان الله يرزقني الرزق الحلال انا وزوجي وبناتي ويبدل حالي الى افضل حال وان ربي ييسر امورنا ويسهل علينا عيشتنا :(
- اولااذكري الله واقرى سورة البقرة عليكي وعلى البيت والله يحفظك من كل شر
- امين يارب ويحفظك حبيبتي
دايم اشغل البقره باستمرار في البيت الحمدلله وبحاول اني اقرأها و ربي يساعدني - اتوقع من كثر الضغوط النفسية عليك ماعد اتحملتي واصبتي بالاكتئاب وماوصفتي حالتك هو اعراضه انصحك تروحين عند طبيب نفسي يعطيك علاج للاكتئاب ولزيادة قدرتك على التحمل لو انتي في الرياض يوجد دكتور ممتاز لحالات الاكتئاب اتمنى لك التوفيق وربي يكون في عونك
- الي انتي فيه اكتئاب مش مرضي لكن من الضغوط النفسية ، وعشان ماتتأثر حياتك بهالتفكير السوداوي اطلبي المساعدة الطبية
زوجك من كلامك كان انسان صالح وقايم فيك ومدلعك لما كان بصحته وهذا وقت اختبار لك
تخلصي من التعلق بالماديات من سفر ولبس واثاث لانها امور سطحية لاتعلي من الانسان
الله يساعدك ويخفف عنك ويطمن قلبك ويريحك
مواضيع مشابهة
تابعي تجارب أخرى من هذا القسم.