بشرى لنا..نلنا المنى.التجــ4ــمع لتباشير مواليد يوليو واغسطس// قديم

ماشاء الله...الف الللف مبرووووك حبيبتي🌸❤️🎇🎉🍼🐣الحمدلله على سلامتك و سلامة البيبي

الحمدلله على سلامتك وسلامة البيبي والله يرزقك بره ويجعله من اهل الصلاح والتقى

مشاء الله الف مبروك نسيم
الله يهون على الباقين
انا باقي لي تسع ايام واكمل التاسع
وملاحظه ان معاي اسهال من البارح
تتوقعون بوادر ولاده ولا عشان اكلت من برا💔
مع انه مامعاي مغص مدري ايش السبب الله يعين بس
فيوليت هانت ان شاء الله تتسهل وتقومين بالسلامه

نسيم
الحمدلله ع سلامتك ومبروووك ماجاكي 🌷💕


فيوليت
الله يسهل عليك 💕

سلااااام
و ح ش ت و ن ي ي ي
الف الف الف مبروووووك للي ولدوا وعقبال بقية الكروشات ام روضه وفايلوت والكل
الله يرزقكم ساعه سهله وميسره وتشوفون مواليدكم على الصحه والثبات🌹
طبعا اللي مايعرفوني انا ام راكان اللي يكمل سنه بعد خمسه ايام 😍
و والده بنوته من 21 يوم
يعني عيالي فوق راس بعض
وهذا الشي كفيل بأني اودع النوم 😭
ابقولكم اكشن ولادتي السهل الحمد لله ابيكم تتفاءلون بالولاده السهله ولافي شي صعب على رب العالمين
بالبدايه كان عندي موعد في شهري الثامن برمضان و كنا مواصلين انا وزوجي ف سحبنا على الموعد لان ركوني ماخلانا ننام الله يصلحه وكان في ذلك خيره بعدين بتعرفون ليش
طبعا زوجي جدد لي الموعد وكنت حريصه اروح موعدي لاني من زمان ماتطمنت على البيبي مع اني رحت خاص بس اكيد مو مثل الحكومي
المهم رحت الموعد انا وركوني وطلع رقمي 115 تخيلو قلت اكيد ابجلس للعصر
لما اخذو الوزن والضغط سألت مين الدكاترة الموجودين وعرفت ان دكتورتي السودانيه العسل رزان موجوده قلت حطوني عندها
وجلست انتظر
جا دوري
لما دخلت عند د رزان وشافت ملفي قالت انتي لازم يشوفك استشاري او اخصائي وانا لا ذا ولا ذا قلت لها انا ما ارضى يكشف علي دكتور بس ياليت تكشفين علي وتبلغين الدكتور بوضعي
و وافقت
وقبل تروح تتناقش مع الاستشاري سوت لي موعد بعد اسبوع لاني كنت في الاسبوع الثاني من التاسع
وطلعت وانا جلست بمكتبها انتظرها
اتصل زوجي يطمن وقلت له كل شي تمام وسويت الموعد والى اخره
دخلت الدكتوره بوجه غير اللي طلعت فيه
قالت عندك ارتفاع حاد في انزيمات الكبد
انا سمعت الكلمه هذي من قبل
وايش السبب يادكتوره
قالت الحكه والحساسيه
للمعلوميه انا جتني حساسيه شديده في كل جسميتنومت بسببها في حملي الاول وماباقي منها الا اكزيما في اصابعي واذا توترت او صابها جفاف احكها بعنف ما اقدر اسيطر على نفسي
بعدها دخل الاستشاري وجلسوا قدام الكمبيوتر وقالوا لي
لازم نولدك اليووووووم
انصدمت صدمه
ليش؟؟
قالوا ارتفاع الانزيمات خطير على الجنين وانتي متأخره ماجيتي بموعدك اللي قبل كان ولدناك في الثامن على مسؤوليتنا(علشان كذا خيره اني مارحت كان رجعت للمعاناة مع طفل خديج 😩)
طلبو مني اسوي التراساوند واخذت الاوراق وانا مغيبه عن الواقع
شطحه: ولدي بدأ يقول بابا تتا له فتره
و طول الوقت احاول فيه يقول ماما بدون فايده
وفجأه بعد ماقالوا لي عن الولاده قام يقول مماااه مماااه عاد انا الا ركوني
من يوم جبته وانا قلبي معاه مو معاي
وكمل الناقص بذي الحركه قلت شكله يودعني والا ايش..يارب رحمتك
رحت اسوي الالتراساوند وعقلي مو معاي ودموعي تنزل بدون صوت ودي بوقت مستقطع ارتب افكاري
رحت للممرضه واعطيتها الاوراق قالت تخلص الحاله اللي عندها بالاول
اخذت ولدي ورحت اغير له وانتو بكرامه وهو يبكي وانا ابكي
جتني حالة دراما مدري شلون
المهم نادتني سويت كل شي واعطتني الاوراق ورجعت للدكتوره
وانا في الطريق قلت ليش ما اطلب منها تأجل ولادتي لبكره منها اهدا شوي واستقر نفسيا ومنها اطمن على ولدي واخذ اغراضي واشوف اذا فيها شي ناقص
واجهز نفسي جسديا اخذ شاور والى اخره
دخلت عندها وقلت لها اعطيني لبكره قالت نو واي
لان بنعطيك كيسين دم قبل الولاده
طلع الدم عندي 7 😂 بجد شي مضحك مبكي
حاولت فيها قالت الحين الساعه 12 اعطيك الى 4 بس لا تتاخرين
ارتحت شوي وقلت لها ممكن تكونين معاي بالولاده
لاني جربتها في الكشف يدها خفيييفه
قالت مناوبتي بالليل عساني اجي بكره القاكي ولدتي واخلص منك طبعا تمزح
قلت صدقيني انا لا اصرخ ولا شي بس وجود احد اعرفه يحسسني بالامان
قالت ان شاء الله
رجعت بيتي حممت ولدي وانا بعد تحممت وجهزت نفسي من والى و زوجي جايب غدا لاني رحت لهم صايمه
لكن وين الشهيه ذهبت مع الريح
ورجعت المستشفى على 5 تقريبا
اخذوا تحاليل وحطو لي الدم ومن 6 المغرب الى 5 الفجر تقريبا خلصت كيسين دم
( اللي اخذو دم يعرفون الغثيان والصداع اللي يجيبه )
قالوا ننتظر تطلع تحاليلك بعد ما اخذتي الدم
طبعا كان يوم الجمعه وعلى 10 جتني الدكتوره تشيك كشفت قالت مفتوح 2 سم تفاءلت قلت يعني مابتعطوني طلق قالت نعطيك نص تحميله
جا الدكتور وشرح لي ليش مضطرين يولدوني قال انزيمات الكبد اذا ارتفعت يموت الجنين فجأة
يارب سترك نشف الدم بعروقي
اعطوني النص تحميله تبع الطلق و ضليت في السرير ساعه وقمت بعدها امشي
اخذت معاي علبة مويه ام نص ريال فيها يمكن اقل من النص مويه وطلعت ورد الولاده وقرأته كاملا ماعدا سورة مريم ويس
ونفثت وشربته
طبعا بطني صغير بعض الحريم على بالهم اني والده
وبطني منتفخه 😅
قابلت وحده قالت انهم اعطوها 5 تحاميل وماجاها طلق
قلت ماشاء الله عز الله طمنتيني
رجعت غرفتي وبدا يحمى الطلق من الساعه 12
طبعا يوم الجمعه تبدأ الزياره 2 الظهر
كلمني زوجي يسالني اذا احتاج شي يجيبه معاه قلت ركوووووني
لما جا زوجي وجاب معاه امي و ركون كان الطلق في عزه صارت تجي الطلقه اتلوى تروح اقول هات ركوني تجي اقول خذوه خذوه هههههههه
الحمد لله حاله مدري شلون
على الساعه 4جت د رزان كشفت قالت مفتوح 3 عاد جلست تحرك يدها عورتني شوي قلت عورتيني قالت سويت لك تحريض
قلت بخاطري وهذا هو التحريض الحمد لله مو مؤلم حسب ماسمعت ناديتهم على 5 قلت خلاص خذوني غرفة الولاده كان مفتوح 4 سم
لما دخلت لقيت القابله بريطانيه كبيره شوي بالسن
حطوني على السرير وللحظه قلت بس ابقولهم ابي عمليه
بس ابعدت الخاطر هذا فورا وقمت اتنفس
بالمناسبه تقنيه شمي ورده وطفي شمعه اللي هو النفس الطويل هذا يكون بين الطلقات لكن اثناء الطلقه خذي انفاس خفيفه ومتسارعه وسطحيه من الفم واول ماتروح الطلقه شمي الورده وطفي الشمعه
بيخف الالم بشكل محتمل جدا
قالو لي لاتدفي الا لما نقول لك وطبعا ما احتاج توسيع لان ولادتي السابقه ما مر عليها سنه
هم يكلموني وانا مركزه في ولادتي وطلقي والتنفس كانت د رزان تقول خليني اشوف اللي تقول ما اصارخ وتحاول تهديني حسيت شي مثل الفقاعه انفتح داخلي ارتحت بشكل بجد ريحني كثير شعوري بالمويه وهي تنزل
بعدها حسيت بالراس وهو ينزل يبي يطلع ودفعت قالوا لا لا تدفي لما دخلت يدها وحست الراس انهبلت طبعا ماقلت لها المويه انفتحت ولا شي على بالها باقي ما انفتح الرحم الا 5 او 6 😆
قامت تقول اذا حسيتي البيبي يدف دفي
وعرفت اني يبي لي دفتين او ثلاث بضمير ويطلع البيبي ابي قدر الإمكان ما يتعب
وفعلا اللهم لك الحمد دفتين وشافت الحلوة النور وحطوها على صدري اااااخ شعور ولا احلى
لا يوووصف
دفيت بعدها شوي علشان المشيمه تكرمون
وكانت ولادتي الساعه 6 يوم الجمعه بتوقيتنا تعتبر ساعه الاستجابه
طبعا طوال الوقت احاول اذكر الله وادعي لنفسي بالولاده السهله والتسخير
د رزان تقول تفاجأت تقول الحمد لله تيسرت ولادتك ماكملتي ساعه من يوم دخلتي الغرفه
اللهم لك الحمد كما ينبغي لجلال وجهك وعظيم سلطانك
ادعوا بالولاده السهله يا بنات طول الوقت و ان ربي يسخر لكم
ارتحت شوي بعد الخياطه طبعا خياطه بسيطه جدا لان بنتي صغيره 2400 وزنها فقط
وما سوو توسيع بس البنت يوم طلعت
ولا قدرت انام صدقوني كأني بحلم ودوني غرفتي الساعه 8 بعد ما تنظفت وغيرت
وهذي قصه ولادتي السهله السريعه اللي ماحسبت لها وجت فجأه
اسأل الله بحوله وقوته برحمته وحلمه انه يكتب لكم ولاده اسهل وايسر من ولادتي انه قادر على ذلك سبحانه