بسم الله ابدا اكشني
صحيت الجمعه كالمعتاد الظهر مافيه بوادر مغص ولا شي جلست حتى بعد العشا قلت لزوجي يالله نطلع نمشي طفشانه قلي مشينا رحنا الممشى وامشي يابنات ساعه وجبت لي قهوه معي هيل وبن عاديه حتى بدون زنجبيل وقرفه وتمر وجلست نريح واتقهوى ورجعنا على 11 مافي مغص بس ظهري احسه يوجعني والحوض وهذي علامه اول مره تجيني أحس الحوض بينخلع وظهري زي الضرب المهم أقوم على 12 اشرب حليب سخنت مويا واحط حليب نيدو وملعقه عسل وشوي زعفران واشرب واروح انسدح على 1 حسيت بدف من تحت زي الي ابغى اسوي براز الله يكرمكم قلت هذا امساك اروح دوره المياه وخلصت قلت أي إمساك منه الألم شوي إلا جاني إسهال وغثيان مرتين رحت دوره المياه بسبب الإسهال ودف وتحجر اطلع من دوره المياه اكتب لكم في التجمع وبسرعة قعدت افكر هل هو ولاده واصحي زوجي ولا أصبر لغاية ماحسمت الأمر الدف قوي واركض لزوجي أفك الباب واقوله ولاده فز بسرعه قلي لاوالله قلت يب جهز عيالك قام ساعدني وانا قبلها بيوم الحمدلله نظفت المنطقه وتنظفت خشيت بس تروشت وإني أركض أخذت الشاحن حطيت مويا لي فطيرة جبن وماحطيت لي روب ولا عبايا احتياط هذي نقطه غلط ارتكبتها جهزنا عيالي وهم النونو جايه قلت اي جايه قامو ياخذو الشنطه معي ويساعدوني وفي السياره وش نسميها وانا اسمعهم زي الحلم مو طايقه نفسي من الألم مابي ولا اسم في هذا الوقت😁 المهم مشينا جلست ساعه اتجهز والبيت قريب من المستشفى اصلا ووصلنا على 3 الفجر وانا خلاص في السياره اه اوه اصيح أحس الرأس يدف وصلنا زوجي نزل معي بسرعه للطوارئ وصلت الممرضات طوالي سوا لي ميزان حراره سكر تحليل إلا البول الله يكرمكم مايمدي قلت لهم مغص ودف قالوا تبرز قلت ايه وهم يالله لغرفة الكشف حق النبض خشيت إلا بسرعه نام نام وانا اه اوه بدون صياح وهم نفس عميق وانسدح بس يابنات إلا المويا انفكت 😢لأول مره تفك المويا انا عيالي كلهم هم يفكوها بحديده إلا هالمره أتخيل لو انفكت وانا بالسياره اكيد زوجي بيخلع أبو الكرسي بعدين ويرميه😂😁 واصرخ المويا انفكت والدكتورة السعوديه تجي تهاوشني ليه ماجيتي بدري قلت والله بدري والطلق اشتد فجأه المهم عباتي وملابسي توسخت كأني مسويه دش غرقانه وتكشف من تحت إلا هو 5 ونص وتصرخ بسرعه فوق ولاده وانا بس على لساني رأسها تحت بتطلع بتطلع وهم نفس نفس والسعودية والفلبينيه يشيلوني للعربيه واطالع في السرير موسخ مويا ودم 😥تشيلني السعوديه واه يابنات سباق مع الريح تركض فيني والناس يبعدو من طريقنا وزوجي وعيالي شافونا وجو مسرعين وراي وانا بس اصيح حق الألم بس مو صراخ وهم نفس نفس عميق لاتدفي أي لا ادف قسما حسيت الأكسجين كله خلص ذيك اللحظه😧والبنت طايره فيني كسرت عظامي هي والفلبينيه وطلعنا فوق ويقولوا لاتدفي قلت طلعت طلعت ماصدقوني بسرعه نزلوني وسدحوني القابلات ويلبسو القلفز وبيلبسوني حق النبض الحبال ويقولوا لاتدفي وانا ادف تلقائي مو بيدي قلت طلعااااااااات وهم يرمو الحبال ويستقبلو الرأس اول دفع مسكت يد الزنجيه وهي دونت تاتش مي تقولي لاتلمسيني فكيني 😂من الخضه مادري أمسك مين وافكها طلع الرأس والدف الثاني طلع الجسم كله على قولهم زحلطت وعلى راسي ثنتين فلبينيات والسعوديه والهندية هذي معصبه تبغى تقيس النبض مافي وقت اصلا هههه والزنجيه يارب لك الحمد طيبه معي بس خيطت لي يوه مره تشد بالخياطه قتلتني حطت مخدر بس كنت أحس وأخيرا جت أحلى كتكوته نتفه صغيره 2 كيلو و700 جرام الساعه 4 الفجر السبت واللكل اول ماطلعت قالوا الحمدلله ولاده سريعه قلت الحمدلله لاني ماتعبتهم طوالي تمددت دفيت طلعت وماكنت اصرخ والغرف الثانيه كانو فيها بنات يصرخو مساكين شفقت عليهم والله ودعيت لكم ودعيت لهم والله يابنات كأنه حلم
اغلاطي ماجبت عبايا احتياط عباتي انعدمت هي ولبسي حطوها لي في كيس ويوم جيت باطلع من الولاده للتنويم غطوني بشرشف كامل جسمي وغيرت بلبسهم ووصلت التنويم اخش طوالي دوره المياه اغسل جسمي على خفيف واتنظف بسرعه خفت أخذ برد المكان بارد مره والبس واريح على السرير وخلاص انتهى اكشني وهذي انا منسدحه ودي الصباح يجي واروح بيتي انام لي شوووي نوم المستشفى إزعاج مافي راحه وبس وعقبالكم بالولاده السهله الميسره انا مااخذت غير ساعه وولدت الحمدلله ونصيحة الي تحس بدف قوي زي الله يكرمكم تتتبرز ومغص يمسك الحوض والبطن والظهر واسهال وغثيان تعرف أنه ولاده مؤكدة
واخيراشوفكم على خير يارب بدأت التجمع معكم وأذكر يوم فتحت التجمع الأول والآن ولدت مرحله اشوفها قصيره طويله سبحان الله عقبالكم يارب😍😍😍
°?~*¤طيـر الفرح غنا وبديارنا عـلا..ملف التباشير الثالث مواليد نوفمبر وديسمبر2015~
متابعة النقاش، صفحة 190