ملابسنا السوداء انقلبت حمرا.. ياليت تساعدوني جزاكم الله خير

السلام عليكم
في مشكلة كبيرة تواجهني مؤخرا
كل ما اغسل ثياب لونها أسود أو كحلي ينقلب لونها أحمر كأن صابين فوقها كلوركس !!!
انا سنين طووويلة اغسل ثياب ما صادتني هاي المشكلة
بس من انتقلت للمنطقة اللي انا فيها الحين من فترة بسيطة وهالشي يتكرر كل مرة
قللت كمية الشامبو قلت يمكن الكمية وايد ولا زالت نفس المشكلة
قلت يمكن الشامبو مخربينه بغسل بالصابون، وانصدمت ان الثياب كلها حمرا :(
المشكلة ثيابنا اكثرها سودا وكحلية وكلها اختربت علينا وصادتني خسارة كبيرة كلش كلش
مو عارفة شالسبب صرت اقول من الغسالة رغم اني قبل كم سنة استخدمت مثلها ما صادتني مشكلة
احيانا اقول يمكن هاي المشكلة من مايهم وسخ ويخرب الثياب لان عندهم مشاكل وايد ومجاري مياه توى مسوين لهم من اشهر بس
واكتشفت المنطقة فيها مشاكل وايد كأنهم عايشين في عصر ثاني

محتااااارة حدي ما اعرف شنو سبب المشكلة واول مرة تصير لي هاي الحالة مو توني جديدة في غسيل الثياب
ياليت تساعدوني الله يرحم والديكم لاني متوهقة لان صادتني خساير وايد وما اقدر اواجه خساير اكبر نفسيتي وايد تعبت

4 تعليق 1,288 مشاهدة

شاركي في النقاش

سجلي الدخول لإضافة تعليق.

التعليقات

4
  1. @ykyny_ballh_22

    يمكن نسبة الكلور بالموية تبع منطقتكم كثيرة جربي اغسلي قطعة ملابس بموية صحة من الماركت اذا ماقلب لونها معناها من نسبة الكلور مثل ما قل لك
  2. @mys_1

    يقيني بالله 22
    يمكن نسبة الكلور بالموية تبع منطقتكم كثيرة جربي اغسلي قطعة ملابس بموية صحة من الماركت اذا ماقلب لونها معناها من نسبة الكلور مثل ما قل لك
    يمكن من الماء فعلا .. جربي تركبين فلتر يمكن تحل المشكلة
    بالنسبة للملابس اللي تغير لونها جربي على قطعة وحدة اول انك تغسلينها بماي فيه خل مخفف .. اكر قريت هالكلام من زمان و الله يوفقك
  3. @hoooor_4

    والله يااختي نفس معاناتي من شريت الغساله الاوتماتيك الغساله العاديه اللي قبل ماكانت تخرب الملابس
    الملابس الغامقه والكحليه تقلبها مبقعه باللون الوردي مثل ماذكرتي ولاعرفت من ايش
    ولاحضت اني لمن احط ملابس بيضا بدون كلوركس يطلع بقع صدا بالملابس يعني المويا ينزل معاها صدأ
    تتوقعون منها؟؟الصدأ يغير لون الملابس
  4. @ana_ndmanh

    هذا صدأ في الغساله نفسها مو من المويه ولا من الصابون
    الغساله نفسها خربانه ولازم تغيريها حصلت المشكله هذه مع عمتي واكتشفت ان الغساله خربانه وتنزل صدأ

تابعي تجارب أخرى من هذا القسم.