شاركي في النقاش

سجلي الدخول لإضافة تعليق.

التعليقات

2,056
  1. لآفندرة
    يااقلبي الله يسهل لك ويكتب لكم يالتواسع ولاده سهله هينه ذكرتيني بنفسي قبل اروح اولد استشورت قصتي قلت عشان يطلع شكلي هه مرتب شوي بعد الولاده 😂😂😂😂 لو تشوفيني بعد الولاده كني طالعه من القبر راح الاستشوار كله وقت الولاده من الطلق والتعب…
    😂😂😂😂😂😂
  2. @gory_36_2

    صاحبة الموضوع
    يوم الاربعاء الساعة 8 في الليل كنت نايمة وقمت من بطني فيه ألم زي الدورة بس قلت عادي يمكن نومتي غلط
    وقمت ورحت الحمام الله يكرمكم ويوم خلصت وقمت وينزل زي الدم بني وانا اشهق بقوة وخفت 😭😭 وجلست في الحمام من الخوف مدري وش اسوي حسيت ان الولادة قربت 😭😭
    طلعت ورحت انسدحت عند التلفزيون وانا سااااكتة وافكر والالم يجي كل شوي قلت لا اكيد اتوهم.
    ودخلت هنا وكتبت لكم وكلكم قلتوا ولادة ان شاءالله وخوفتوني زيادة 😭😂 زوجي شك في الموضوع قال وش فيك قلت مافيه شي بس نزل معي دم
    قال نزل دم وساكتة يالله قومي المستشفى
    قلت لالا انت ماتعرف شي تو الناس انا بكرية ومايصلح اروح بدري 😅😂 قال والله مدري عنك طيب كلمي اهلك سوي شي >> ابتلش فيني 😂
    كنت بكلم اختي وخفت تعلم امي وتشيل همي 😭
    سكت وجلست اتلوى من الالم لين الساعة 5 ونص وحسيت كل ماله يزيد وبين كل طلق والثاني اقل من 3 دقايق
    قمت وتسبحت وكلت تمر واكل واكل مدري ليش من الخوف الظاهر 😭😂 قلت يالله مشينا
    في السيارة الالم زاااد والحمدلله الطريق فاااضي
    دخلت الطوارئ وسوينا اجراءات الدخول وقالت يالله فوق غرفة ولادة قلت طيب اكشفوا شوفوا اي شي 😭 قالت ايه نكشف فوق رحت فوق وقالت روحي الحمام وفصخي كل ملابسك والبسي هذا وعطتني اللبس المفتوح من ورا وحسيت ان الموضوع جد خلاص 😭😭😂
    وتحط جهاز الطلق وبعد نص ساعة جت الدكتورة تكشف ولاول مره في حياتي اكشف من تحت 😢😢 والله يوجع 😢 بس اللي خوفني اكثر يوم صرخت وقال مااااااشاءالله 5 سم 😱 قلت وشووو يعني قالت ولادة خلاص وانا اصيييييح 😭 توقعت تقول 1 سم بس 5 مره وحده قوية حسيت اني صبوووورة ماجيتهم الا وانا مستوية مره 😂😂
    المهم قلت ابي ابرة ظهررر قالت طيب لازم تحليل وجوا واخذوا مني دم قالت بعد ساعة النتيجة ونركبها لك قلت اخاف ماينفع يروح وقتها قالت لاعادي انتي بكرية توووك بتطووولين لاتخافين
    في الساعة هذي الالم كل ماله يزيييييد وانا ساكتة ومحترمة نفسي ابي اصارخ بس اقول لا اصبري خليك قوية مابعد جاك الوجع صدق 😭
    بعد ساعة جت كشفت قالت 6 سم 😖 وجا الدكتور وعطاني الابرة وقال بعد عشر دقايق بيخف الطلق قلت طيب بشوف
    راح نص ساعة والطلق ماخف قلت زيدووووها للحين احس بالالم
    زادوها وكل شوي يلمسون رجولي يقولون تحسين ? قلت ايه ويستغربون
    المهم الدكتورة كشفت قالت 8 ولادة خلاص ماشاءالله قلت وش ولادة زيدووووا ابرة الظهر والله احس بكل شي وين كلام الناس عنها 😭😭
    كل شوي يطقون رجولي يشوفون بدا مفعولها ولالا وللاسف مفعولها مافاد الا في الطلق نفسه خف ولا من اسفل البطن وتحت ماجابت اي مفعول 😢 اتوقع لانهم حطوها والرحم فاتح 6 ومايمديهم يزيدون لانه ماشاءالله فتح 8 وشكلهم ماتوقعوا
    والله مدري وش السالفة
    خلاصة الموضوع ان ابرة الظهر للاسف مافادتني مره 😭 بس ان شاءالله انها خيرة
    جت الدكتورة قالت خلاص ولادة ويرفعون رجولي وتجيب كرسي وتحطه وممرضتين يميني ويساري
    واتذكر كلام طينة يوم تقول بتجربين هالموقف وتعرفين وشلون تستحين 😭😂 بس وقتها ماهموووني ابي اخلص وبس 😭😂 والله طولت وانا ادفع وتعبببت وكل شوي يعطوني الكمام المخدر لانهم عرفوا ان ابرة الظهر ماجابت نتيجة
    المهم انا ادفع كل ماحسيت بالطلق لين جا لحظة وفقدت فيها الاحساس بكل شي والله مدري وش صار احس اني مت وحييت وفتحت عيوني والقى ولدي قدامي والممرضة تقول خلاص مدام ولادة وتضحك واشوف بطني فاضي واصيييح 😭😭😂 الحمدلله ❤
    وتبدا معاناة الخياطة اشد من الولادة كلها 😢 والدكتورة تهاوشني اذا قلت اه 😢 تقول انتي ماخذة ابرة ظهر لاتتكلمين 💔 اقولها ااااه والله يوووجع قسم بالله احس بصوت الخيط براسي 😭😭😭 وعصببت مني مره ماصدقتني حسبي الله عليها اكرهها هي واسلوبها 💔😢 في الاخير صدقت وحطت بنج موضعي 💔
    والحمدلله في السراء والضراء❤
    طبعا عطوني استبيان عن ابرة الظهر وقلت لا كانت تجربة فاااشلة وحاولوا يقنعوني اغيره ماغيرته يقولون لا هي جابت نتيجة بس اصلا هي ماتخدر الخياطة ومالها اي دخل بالجزء اللي تحت ، طبعا هذا كلام ممرضة مرسلينها لي تقنعني 😂قلت لا انا اعرف من حملت وانا اقرا عنها وما غيرت كلامي في الاستبيان
    ويوم جيت اطلع رجعوا لي 1000 ريال من قيمة ابرة الظهر بدون ما اقول لهم شي وللحين مدري ليش رجعوها شكلهم حسوا بتانيب الضمير 😂 طبعا هي ب1500


    وبس
    عارفه كلامي كثير بس اللي فاضية تقراه 😛😂

تابعي تجارب أخرى من هذا القسم.