مع اﻷسف صديقتي !!

السلام عليكم وأسعد الله مساءكن ياالغاليات ..
أنا بطرح عليكم مشكلتي اللي حيرتني مع صديقتي او اللي كانت صديقتي ..
أنا موظفة من سنين وكانت علاقاتي الاجتماعية محدودة جدا وخاصة علاقات العمل كانت مجرد زمالة مقتصرة على وقت العمل وكان وقتي في المنزل لعائلتي فقط .. وقبل أربع سنوات انتقلت لقسم ثاني وكالعادة كانت علاقتي رسمية بجميع الزميلات وبعد فترة لاحظت واحدة من زميلاتي تتقرب لي وتجي تسولف معاي بين وقت والثاني وأخذت علاقتنا تقوى يوم بعد يوم حتى صارت صداقتنا مضرب المثل .. جذبتني لها بتعاملها الرائع واهتمامها فيني ووجدت عندها أشياء أنا كنت فاقدتها بحكم ان طبيعتي خجولة وغير اجتماعية وهي كانت عكسي تماما اجتماعية جدا وعلاقاتها كثيرة .. كنت سعيدة جدا معاها وكان بيننا زيارات ونطلع سوى للسوق والمنتزه وووو
بعد فترة مرضت هي وطولت وهي مريضة وأنا وقفت معاها في مرضها وماتركتها لين تعافت وكنت اساعدها في عملها ودراستها .. المهم هي أول ماعرفتها كان تعاملها زين معاي لكن بعد فترة بدأت تضايقني بالكلام وإذا زعلت تقول امزح وانت حساسة ... وراح اذكر لكم كلامها وتصرفاتها معاي واحكموا انتم اذا كانت تزعل ولا لا ..
أول مرة تجيني في بيتي سويت لها عزيمة كبيرة ولما جبت الضيافة قالت ايش هذا ؟ اجل ايش قاعدة تسوين طول اليوم !! قصدها اني جايبة جاهز مع اني جايبة افخر شي في السوق ومسويه ذبيحة ومتكلفة المهم اني تفشلت وانحرجت ..
دايما تتريق علي عشان لوني حنطي وهي بيضاء وتحط يدها جنب يدي وتتريق ومرة سوتها قدام اهلها .. تتريق على قبيلتي أحيانا وتسب عاداتهم وبرضه في مجلس فيه حريم ..
تتصل علي تقول بجيك واستعد واجهز نفسي وماتجي أو تجي وماتجلس .. مرة اتصلت قالت انا جايتك سوي لي شاهي راسي يوجعني جات ودخلت المجلس ويوم ماشافت الشاهي في المجلس زعلت ومشت على طول !!
احيانا اكون اسولف معها في التلفون فجأة تقفل الخط في وجهي !! فجأة كذا بدون سبب !!
احيان احكي لها عن مشاكلي مع زوجي بالواتس واكتشف انها توري رسايلي لصديقاتها واهلها !!
مرة طلبت مني اكلم اختي عشان تبغى منها خدمة وانا اعتذرت منها وقلت اختي مايمديها عشان عندها كذا وكذا وشرحت لها ظروفها .. وهنا انقلبت علي مية وثمانين درجة وجلست فترة اتصل عليها وماترد وبعد كم يوم هي كان عندها مناسبة وكانت عازمتني قبل المشكلة وانا رحت بحسن نية واخذت هدايا ذهب وفلوس وكذا ويوم جيت اعطيها الهدية فشلتني قدام الحريم وتقول احنا مانوجب في الملكة ولايكون جايبة طفسة ميتين ريال !!! مع اني حاطة في الظرف لها الف وخمسمية ..طبعا انا انقهرت وحاولت ما ابين وجلست شويه ومشيت قبل العشاء والله حسيت اني ببكي من الفشلة ..
هي كانت زمان اذا غلطت تعتذر وكانت تقول لي عمري ماانسى وقفتك معاي في مرضي ..
لكن صار لها فترة تغلط واذا عاتبتها تقلب الطاولة علي وتطلعني انا الغلطانة !!
المهم بعد كل المواقف هذي انا صرت متضايقة منها وتغيرت عليها وماصرت اتصل فيها لكن اذا اتصلت عادي ارد عليها ، واذا عزمتني عندها اتعذر بأي شي وما اروح .. هي حست اني متغيرة وسألتني وقلت لها ان احنا لازم نبعد عن بعض ﻷننا مانتفق وقلت لها على تصرفاتها معاي وهي بدل ماتعتذر قامت ترفع صوتها وتبرر وتقول انهاماغلطت واني خسرتها ووو
أنا الصراحة فاقدتها والله لأني تعودت عليها وكانت اقرب لي من اخواتي وهي الوحيدة اللي كنت افضفض لها لكني تعبت من تصرفاتها وجرحتني كثير .. الحين ابغى رايكم المواقف هذي تزعل ولا أنا حساسة مثل ماتقول ؟ ولو كنتم مكاني تستمرون معاها ولا لا ؟