تجمع التباشير الثاني عشر لمواليد ( يناير - فبراير)

كيييييييييييفكن كروشات ونفوسات .....وحشتوووني...طفشني المنتدى اخر مره ولي مده ما ادخل. ....كان نفسي ادخل وابشركم بولادتي بس للاسف للحين مقاومه

الله يفرجها عليكم ياااااارب

اكشن ولادتي..
اول شي كان مكتوب لي تنويم من الاحد الليل ورحت على 9 وانا متعشيه وشبعانه عشان من 12 الليل لازم اصوم
دخلت وعملنا اجرائات الدخول كانت معايا ماما وزوجي ودخلت الغرفه حقتي
عمليتي كانت محدده انها الصباح بس دكتوري كان عنده 5 عمليات وكنت انا الرابعه للأسف
اتخيلوا من الصباح وانا مستعده للولاده ولابسه الروب حقهم وحطولي المغذي والمحاليل والقسطره ولسه مانزلوني😓
العمليات الين 4 العصر وصارت الساعه 3 ونص وصرت ابكي مو عارفه مصيري خفت تتأجل كمان يوم وانا من غير اكل وجسمي مغزغز ابر وقسطره عالفاضي
المهم نزلوني على 4 والدكتور حقي كان حقيقي مشغول ويبغى يأجل بس لما شافني ابكي وافق يعمل العمليه
نزلت غرفة العمليات وصاروا يجهزوني للعمليه وفجأه يتصلوا عليهم من الطوارئ فيه حاله ولاده ومفتوح عندها 8 سانتي والبيبي مقعدي ولازم تدخل عمليه الان
جاني الدكتور يعتذرلي انه ربنا مو رايد اليوم اعمل العمليه وفيه ظرف طارئ خارج عن ارادته وهوا مضطر يمشي خلص دوامه وبكره يولدني وقالهم يطلعوني الغرفه تاني
قلتله معليش اي احد موجود في الطوارئ يولدني وماحنتظر اكتر من كدا😭
دخلت والله العمليات وولدني دكتور الطوارئ والحمدلله كانت سهله وخفيفه وصورولي بنتي وهيا خارجه من بطني
وطلعت غرفتي وكل اموري تمام طبعاً ولدت عالمغرب يوم الاثنين
واعطوني ابره مسكنه من اروع الابر في الحياه ماحسيت بشي وفوق هذا الابره منومه ونمت براحه
تاني يوم شالوا القسطره وبدأت امشي شويه شويه وكمان عدت على خير
ومستشفى العسكري صار عندهم قرار جديد اي وحده تبغى النونو حقها تروح للحضانه وترضعه هناك لانه ممنوع يجيبوه للغرف
وانا والده عمليه ومو قادره امشي الين الحضانه لأنه كان في القسم الثاني ومشوار عليا
رحتلها يوم الربوع الصبح ورضعتها وعلى الساعه 9 الصبح رجعت غرفتي جاتني الممرضه تقولي الدكتور يبغى يشوفك
طبعاً الدكتور المناوب مو دكتوري
جاني وشاف العمليه وقاللي تشتكي من شي قلتله الغازات بموت منها ابغى دواء يفتتها وابغى ملين لاني مادخلت الحمام لسه
قاللي طيب بس انتي المفروض تقعدي معانا يومين بس حكتبلك خروج الان لأنه عندنا حاله طارئه للجنود المصابين من الحرب ويبغونا نخلي المستشفى ونفضي سرر لهم
قلتله بس انا لسه تعبانه وماكملت يوم ونص كيف اخرج قاللي معليش مضطرين
والدواء حقك حتصرفيه بكره اليوم مررره مايمدي يادوب اتصلي على زوجك يجيكي
طبعاً الكل استغرب امي جاتني بسرعه وزوجي كمان كلهم مفجوعين كيف كدا
ومنظر المستشفى وقتها كان كأننا في حرب الكل يخرج ويجري واللي يجيب كرسي متحرك وانا مو قادره امشي ولا اتسند
حتى زوجي لما راح ياخد بنتي من الحضانه يقولي كأنهم يبيعوا عيش بيشوفوا الرقم التسلسلي حق الاسوره حقتي ويعطوه البيبي
طبعاً من الزحمه والتوتر صاروا يقصوا الاساور من الامهات ويعطوها لرجالهم يطلعوا البيبهات وممكن كان هناك اكتر من 30 رجال يبغى الطفل حقه
والحمدلله زوجي كان في البدايه واخد بنتي صرت اقوله ابغى اشوفها لايكون لخبطوها مع الاطفال والحوسه
بس الحمدلله طلعت بنتي😅 حتى تبليغ ولاده قالوا بكره مو اليوم من الطوارئ اللي عندهم
ونزلنا تحت وانا يادوب امشي وركبت السياره وانا ميته تعب اتخيلوا كان ليا بالزبط يوم ونص من ولادتي😭
ومع المطبات والطريق ابكي من الالم
ورجعت بيت ماما طبعاً البيت اريح بس مافي زي المستشفى مساعدات للسرير لما اقوم وانام والحمام كان مشكله عندي
الحمدلله اليوم كملت اسبوع والده عدت على خير
وحقيقي منظر خروجنا من المستشفى والوضع اللي صارلنا ماعمري حنساه

ربي يهًوون عليك ويقومك بالسلامه وتشوفين البيبي بعافيته يارب❤

الحمدلله مايشووف شرر يارب
سميتيه ولالسى😍