ليش حياة الأولين أحسن وأحلى من حياتنا الحين؟؟

السلام عليكم ورحمة الله وبركاته..صبــاحكم أحلى من العسل..أتمنى الجميع حياة سعيده جدآ..
عندي موضوع وكثير أفكر فيه بأستمرار ليش الناس الأولين مع أن حياتهم كانت بسيطة بس كانوا سعداء أكثر منا الحين برغم من التطور ألي أحنا عايشين فيه
أذكر أبــوي الله يرحمه ويغفر له كان يعامل أمـي أحسن معامله وعمره ماأنتقدها أو جرحها بكلمه وكان معطي أمي الضوء الأخضر تطلع وتسير على جارتها من غير ماتستأذن كل شوي..
أنا ماأقول أن ماكانت تصير شوية مشاكل بس كانت بسيطة ماتوصل أنه أذا زعل أبوي خلاص يمنعها من الطلعه بالعكس كان يقضي لها ولنا كل ألي نحتاجه ويرجع من براء وكأنه ماصار شي،وماكانت عندهم هاالتعقيدات ألي عندنا الحين تلقين الوحده ذابحه عمرها بين البيت والأطفال والزوج..ومع هذا يروح يتزوج عليها مع أنها تكون مش مقصره عليه في شي مهتمه بنفسها وقايمه فيه ومع هذا يدور غيرها،،أذكر قبل ماكنا نسمع أن فـلان تزوج على زوجته كان شي نادر وحتى العيال كانت تربيتهم سهلة،الحين تسوين كل شي لهم وبعد مش عاجب والتربية صارت صعبه.
وأناأستغرب من بعض الأخوات ألي تكون ردودها كله مع الزوج وأسمعي كلامه ولاتزعلينه ولازم يعرف كل صغيرة وكبيرة ويصير الزوج محور حياتي كلها.زين ونا وين رحت وش موقعي من الأعراب في حياته الله خلق الزوجة عشان تكون سكن للزوج.قال الله تعالى
(وَمِنْ آَيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً)
صحيح أن طاعة الزوج واجبه بس بحدود،مدام أنا ماسويت شي يغضب الله ليش أصير تابعه له في كل شي..
وش رأيـكم نتكلم ونفيد بعض ونستفيد وبالعكس ألي عندها كلام حلو ومفيد تقوله وبليز من غير تجريح نبي نرتقي في النقاش.