🎀🎉***التجمع الثامن عشر للقيصريات***🎉🎀

السلام عليكم ..
الله يرضى عليكم مضيعه حسبت حملي كنت ماشيه تمااام مع دكتورتي ف الخاص و رحت العسكري خربت عليه الحسبة بحكم اني بولد قيصري تقول لي 30 اسبوع وفي الخاص يقولوا باقي ع دخولي التاسع اسبوعين ف الله يرضى عليكم كيف احسب حملي بالشهر و الاسبوع .. طبعاً آخر دورة
يوم 1436/12/19
وجزاكم الله خير ❤

طبعا الكلام هذا على موعدي الي طاف يوم 8/3 قبل 12 يوم تقريباً

والله ما اعرف احسب دايم امشي ع حساب المشفى
اختي ليليانا انا اخذت نصفي اخر مره زي الولاده الطبيعيه بس بدون الم كانهم يولدون وحده جنبك مو انتي ثم تاخذين ست ساعات ماتحسين بطنك الم مافيه
مو زي الكامل تصحين ع الالم الله يعظم الاجر يارب

اختى حنو انا جربت الكامل وهالحمل يمكن نصفى ومررررره متخوفه الله يسعدك قوليلي تجربتك هل فعلا ماتحسين بالم وقت العمليه وكيف اشغلتي نفسك وهم يشتغلون فالبطن والله احسه شعور صعب يارب ييسرها

اختي بحر العيون الله يسهل علينا جميعا
انا جربت الكامل مرتين اصحى ع الم ماينطاق ابدا
وحلقي تقولين مجروح اخذ ثلاث ساعات اتكلم بالاشاره واذا طرا علي الكلام جت قبله الكحه ثم تعالي شوفي الخوف من الكلام
واخر مره اقتعني الدكتور الاستشاري وزوجي قالو
خذي نصفي والله اني ع باب العمليات وهم يقنعون في وانا لافه غترة زوجي ع كفي واقول خلهم يحطون لي كامل وهو يقول توكلي ع الله.
وخذي نصفي الاطباء ينصحون فيه ويقول الطبيب تطلعين من العمليات تشربين وتاكلين ولاتحسين بالم ابدا
وسبحان الله في اللحظه الاخيره قلت خلاص توكلت ع الله ثم دخلت وقالت اجلسي ع طرف السرير كنك بتنزلين
قالت اركعي شوي وحطي يدينك ع ركبك ثم حسيت ببروده في اسفل ظهري ثم بعد شوي قالت نامي قلت خلاص قالت انا ماقلت لك ابرة المغذي اقوى من ابرة الظهر ثم نمت ع ظهري وحطت بيني وبين الطبيب ستاره طويله ثم جت وحده جلست عند راسي كني ضاع نفسي شوي من الخوف اتوقع وعلمتها ثم حطت اكسجين ع انفي ثم ارتحت في التنفس ثم جلست ادعي سبحان الله تكه والبنت تصيح نظفوها وحطوها ع خدي وقمت احمد
ربي واستغفر ومررررررره مافلت لساني من الذكر
ثم اخذت نص ساعه بعد طلوع الطفله ثم قالت خلاص خلصنا ما صدقت والله العظيم يوم قالت خلاص ثم ودوني غرفة الافاقه ثم جلست فيها ساعه يمكن ثم ودوني غرفتي ما احس بشي ابدا ابدا ابدا يعني كن الوالد وحده غيري يوم جيت الغرفه جابو لي نسكافيه
وماء كثير قالو كثري ماء واشربي نسكافيه علشان الصداع والله العظيم الحمدلله ماحسيت بشي ابدا
الا يوم جت تقومني من السرير عاد احس بالجرح فقط وبعد اربع ساعات من الولاده شالت القصدره مادريت عنها يوم شالتها وبعد ست ساعات قمت مشيت الحمدلله والمره ذي ابي اخذ نصفي ان كتب ربي
النصفي نعمه نعمه ربي وهبها للناس سبحانه جل شانه
واي استفسار انا حاضره حبيبتي