التباشير السادسه لمواليد (يوليو &اغسطس)🌾

كنت حاجزة 66 وراح علي..
خيرة ان شاءالله

سلملم حبيباتي الف مبروك لكل اللي ولدو ومبروك التباشير السادس ماامداني اقراء ولا شيء ، الحمدلله بفضل من الله رجعت لبيت اهلي يوم الجمعة بالليل وارتحت ودحين جيتكم اكتب الاكشن
اولا ولادتي حددتها في مستشفى الحرس وقولت مكان اعرفو احسن من مكان مااعرفو الاستشارية والطاقم الطبي كلهم اعرفهم بحكم المهنة
من حوالي يوم الثلوث من اسبوع ونص بديت اتالم بس الم يجي فتره ويروح يعني احس بشد وتحجر مع حرارة جاني برضو نهاية رمضان بس يقعد دقيقة ويروح ومايتكرر كثير المهم ويجيكم يوم الخميس وانا في الدوام استلم من شفت النايت وابداء احس بمغص مع الم في ظهري وكمان احس بدفع على تحت وكانو شيء يبا يطلع ومع الالام وجهي احسو نار حررراررة مرا عالية وسرت اغطي وجهي بورقة التسليم ماابغى زميلاتي وزملائي يحسو احس فشلة ، شوية المدير لقيتو في وجهي يسالني انتي بخير ايش تحسي وقولت له تعبانه بس شوي ورحت الحمام احاول استحمل مرا مو قادرة شوي اخذت ورقي اللي المفروض اسلمو عشان انتهت اول ثلاث شهور ولازم اقدم اوراقي رحت للمدير اعطيتو الورق وقولت له رايحة الولادة ، رحت اول شي الطواري ومن هناك حولوني ع الولادة استقبلوني الحمدلله وحطو جهاز التخطيط وقالولي طلقك منتظم وان شاءالله اليوم بالليل تولدين وكشفو كان البيبي راسو تحت ومتقدم والرحم مفتوح من واحد الى اثنين ، قعدت من ثمنية الصبح الين العصر وللأسف مافتح اكتر ، قالولي اذا حابة اولد اليوم يدوني طلق صناعي وانا رفضت وقولت حطلع وامشي واشرب عسل وان شاءالله ارجع لهم ، رحت بيتي جهزت شنطتي وشنطة المستشفى قشيت عفشي ورحت لبيت اهلي وقعدت الجمعة والسبت والاحد امشي واسوي سكوات واشرب حليب بالزنجبيل واكل تمر وبدأت تنزل عليا افرازات مخلوطة بدم ،يوم الاحد بالليل رحت الممشى ومشيت اثنين كيلومتر وصبح الاثنين شربت كاسة موية دافية مع عسل واكلت تمر وقعدت امتر البيت امشي ، المهم نومت الظهر احس باارهاق وتعب صحيت العصر الم بسيط في ظهري قىلت خليني اتروش وارجع انام يمكن ارتاح حاولت انام مو قادة وفجاءة الساعه سبعه ونص جاني الم مختلف حسيت جسمي كلو انتفض من قوته ظهري مع بطني شي انعصر جوته واحس بدفع والالم يقعد لدقيقة وبين كل انقباضه والثانيه 6 دقايق بس طبعا صرخت لأمي وابويا وانا ماسكة المخدة اشهق مفجوعة من الالم معليش بكرية وانفجعت والله ، شويه ثالث انقباضه وحسيت بشي حار ينزل من تحت عرفت انها موية الراس طبعا رحنا ع المستشفى ودخلت الطواريء وياسلام لقيت في وجهي الممرض اللي استقبل حالتي يوم الخميس ، قعد يضحك ويقول ايمان تمزحي لسا ماولدتي وانا فيني صرخة من الالم وكمان الموية تنزل قمت قولت موية الراس نزلت خلاص ، المهم يسعدو ربي ع طول وداني للولادة واشوف الكارثه هناك وربي القسم فل وكمان مافي غير دكتورة وحدة ودكتور واحد تخدير ، حطوني مع قابلة ممتازة ياربي لك الحمد ، كشفو وقالولي لسا بس اثنين بس اللي نزلت موية الراس ولازم تولدي في خلال اربع وعشرين ساعه ، حطوني ع جهاز الطلق والطلق شديد ومنتظم ادوني ابرة بيثادين عشان بس انام بس نبهتهم اني ابغى ابرة الظهر ، ابرة البيثادين تدوخ الراس بس تحسو بكل طلقة وكل شي المهم فجاءة اشتد الالم وسرت ابكي واصرخ ولاشعوريا اضرب بيدي في الحديد حق السرير وينادو الدكتورة الكل مشغول ، حتى دكتور التخدير في العمليات ، كشفت القابله ولقيتني 6 سم ، راحت تنادي الدكتور والدكتوره محد فاضي ، قامت ونادت ممرضتين وجهزت الغرفة وحتى جهزت اغراض التخدير ، الالم زاد وسرت في وضع ربي العالم فيه حسيت اني اشوف الموت ، جاء الدكتور وسرت انا اصرخ في وجهو مااقدر في شي يطلع كشفو الممرضات قالتلي وحدة فيهم ايمان الراس قاعد يطلع وانتي فتحتي فل يعني عشرة قمت طالعت في الدكتور وقولت اطلع ماعاد ابغى الابرة ، لانو خطرها دحين اكبر من نفعها، وسارو حولي القابلات الله يسعدهم وامي ويقولون ليا يالله دوفي وجت الدكتورة كمان وسارت تقولي ايمان انا حساعدك واوسع وانتي تدفي ، جت كمان ادارية القسم وحدة اعرفها وقعدت عند راسي ، دقيقه ، ثنتين ، ثلاث ، حسيت بلحظة اني حموت مسكت امي بقوة وقولت لها بنتي ، وربي جاني الم مااقدر اوصفو ودفيت وغمضت عيوني ع بالي متت ، ثواني وتقولي القابله ايمان افتحي عيونك بس انا ماقدرت افتحها ، الا سمعت صوت بيبي يبكي وفتحتها لقيت بنتي قدامي وقمت بكييييت مو مصدقة اني ولدت وسرت اردد الحمدلله بعدها بدقايق بديت اشوف كل شي اثنين واحاول اتكلم بس لساني ثقيل ، للاسف جاني تسمم حمل مباشرة بعد الولادة الضغط اقل شي كان 155/95 يعني جدا خطير شالو البيبي للحضانه ولدت فجر الثلاثاء الساعه 2:22 صباحا قعدوني في الولادة لين الظهر الساعه 2 حتى يستقر وضعي والحمدلله استقر ، ربي لطف انو البيبي انولدت وبعدين جاني تسمم الحمل ولا كان الخطر مضاعف ، تنومت لين يوم الجمعة والحمدلله وضعي تحسن والضغط انخفض والبيبي بخير

شكلي بانظم للأغسطيات
الحمدلله علئ كل حال كله بأجر ان شاء الله

اشبكم على اسمي ماصرتو تحطوه بالقائمه 💔

نبغاك تولدين ههههههههه
انا ضايفتك بس ما نزلت القائمة اللي عندي