تباشير يوليو ⛅️ و اغسطس ☀️ 2016 -الملف السابع ☀️..

ههههههههههههههههه
كل هذا خوف .. صدقيني زي ماقالت ميمو ريحي نفسك بالكشف ولاتشدين وماراح تحسين بشي
قوي قلبك شوي💪🔥.

ياعمري عليك شيفون والده الله يقوم الباقين بالسلامه يارب 😘

انا بعد التحجر زايد ومدته تطول شوي الله يسهل من عنده وحده قالت لي اشربي دارسين ثقيل وبيض كثري عليه فلفل اسود ومدري

الله يهون عليكم كروشات توكلوا على الله وثقوا انه التيسير من عنده وحده سبحانه والاطباء والمستشفيات ماهي الا اسباب مساعده




اكشني / انا لي يومين قبل الولاده يجيني تحجر مستمر وواضح طبعاً انا بالعادة يجيني هالتحجر مع الجماع واخر مره جاني فيها استمر اكثر من 24 ساعه تحجر وبطلت يصير جماع لانه يتعبني وفي نفس الوقت اذا راحت الالام اتحطم


المهم يومين يجيني تحجر بدون سبب ومستمر مابين 5 و7 دقايق ومخرب علي النوم كل شوي اصحى واروح دورة المياة وانتظره يفك وارجع انام
يوم الخميس قمت الصبح والتحجر اقوى شوي من العادة بس محتمل يعني مافيه الام بس يضايقني قمت افطرت وخلصت كم شغله في بيتي لاني ماقدرت انام بسببه وجلست لين الظهر ونمت بعدها للعصر وقمت ع نفس الالم
صليت وتسبحت بمويه حاره ع ظهري وطلعت سخنت لي زيت زيتون وحبة سوداء ودهنت بطني وظهري وفخوذي ع اساس لو فيه طلق يشد واكلت ملعقتين عسل وحبة سوداء
طلعت العصر السوق اقضي كم شغله ومازال التحجر يمسكني بشكل اقوى ومنتظم
رجعت البيت ع المغرب وطلعت السوق مره ثانيه ع الساعه 9 اخذت حاجه بسرعه وخرجت وكنت ناويه اروح امشي ونيتي امشي اكثر من ساعه وانا راجعه البيت ببدل ملابسي وكذا فجأة الا فيه الم اسفل بطني نفس الم الدورة ويمسكني كل دقيقتين بالضبط ويفك
ألم محتمل لكنه متقارب استغربت وماعرفت اروح المستشفى ولالا وهو طلق اساساً ولالا


رحت تسبحت بمويه حارة وخرج مني افرازات وفيها خيوط دم وانتم بكرامه هنا بس عرفت انها علامة ولادة والالم هذا طلق
جهزت نفسي وشيكت ع شنطتي واغراضي واكلت رطب 7 حبات وجلست ادور شوي بالبيت وارتب ماودي اروح المسستشفى واستعجل لكن زوجي نشب لي الا نروح نشبك خاف من الزحمه والمستشفى يبعد نص ساعه عن بيتي بدون الزحمه
توكلت ع الله ورحت المستشفى وصلت ع 11 ونص تقريباً وركبولي التخطيط وظهر عندهم طلق قوي طلق ولادة
جاني الدكتور وكشف ( ولأول مره اتعرض للكشف ) وكان سهل سهل سهل مدري ليه يقولون يخوف ومدري ايش
ابداً مافيه ألم وبما اننا بكريات ف ألم الجماع أقوى 😁
حسيت بيده وكنت شاده نفسي يوم شفت ان مافيه ألم ريحت حالي واخذت نفس وعطيته مجال اكثر يكشف ومن هنا اقولكم الكشف ابداً ماكان مؤلم او عائق وكنت معطيته بالخوف اكبر من حجمه وعدت مرحلة الكشف طلع الرحم مفتوح 5 سم
يعلمني وانا مكذبه مو مستوعبه كنت اقول بالكثير بيكون 2 سم لكن رحمة الله فوق كل شيء


قالي خلاص كم ساعه ان شاء الله وتولدين
جهزوني ودوني غرفة الولادة الطاقم كان مره كويس ومتعاون
ركبولي تخطيط بغرفة الولادة وحطولي محلول في فتحة الشرج سببت لي اسهال وانتم بكرامه وع طول ع الحمام فرغت بطني
جلست للساعه 1 ونص ورجع الدكتور قالي بفك موية الجنين عشان تولدين خلاص وكشف لقى الرحم واصل 8 الى 9 سم وفك المويه وكان الجنين متبرز وخوفني شوي قال انه مطول والبراز كثير
وجلست ادعي ربي يسهل لي ويحفظ جنيني وبدأ الالم يشد
طبعاً طلبت ابرة ظهر لكن كان فيه عمليتين قيصريتين ورا بعض وطبيب التخدير معاهم وقالي حرام خلاص انتي 5 سم ماراح تطولين ان شاء الله ماتحتاجينها لكن رح نعطيك ابرة عضل مسكنه
وعطوني الابرة وانا في عز الالم ودي افكك اسلاكم واجهزتهم واهرب خلاص حسيت بالموت وان مافيه مفر ولاني قادرة اتحمل الالم لانه حار ورا بعض ماعطاني فرصه ارتاح


ريحتني شىوي الابرة وخدرتني بين كل طلقه والثانيه اغفي شوي غفوة حلوووه وفجأة يصحيني الطلق والدفع
وتقول لي الممرضه دفي اذا حسيتي شكيت من كلامها ان الراس بعيد باقي لانها جالسه بعيد وانا ع جنبي منسدحه وتقول دفي وخذي نفس وهي مكانها فاحسها تبي انزل الجنين مع الدف
الدف يخفف صراحه من ألم الطلق انشغلت بشعور الدفع عن شعور الالم
وشوي جاتني طبيبه سعودية وعدلوني وقالت دفي وقت ماتحسي بالطلقه وخليها دفه طويله


دفه دفتين ثلاث وخرج حبيبي ع الدنيا وكان متبرز وموسخ نفسه لكن لحظتها كان اجمل شعور وماني مصدقه اني خلاص خلصت شعور جميل
الولادة نفسها مش مؤلمه الحمدلله الالم كان بالطلق اما الولاده فقط شعور يضايق كذا كأن المكان مشدود وخروج الرأس يضغط ع الاعضاء الخلفية ويضايقني لكنه اهون من الطلق الحمدلله
خلصت ولاده بالضبط الساعه 2:45 الفجر والحمدلله من قبل ومن بعد
ماطولت بالطلق ولاتعبت فيه كثير لكن كان حار وماعطاني فرصه ارتاح واتوقع انه افضل لأني توترت من الطلق وماتخيلت اني ممكن اجلس كم ساعه بهالالم


وزن البيبي 2 كيلو و900 مع انهم باخر سونار قبل اكثر من اسبوعين قالوا 2 كيلو و800


وسلامتكم هذا اكشني بالتفصيل

❤️❤️
حبايب قلبي
الله يرزقكم الولادة السهله
اديم الكشف لا بد منه قوي قلبك و استرخي
هو يوجع بس مو ذاك الالم !!
و انا شخصييا كل ما فتح الرحم ما احس بيدها
لان الم الطلق مغطي على اي شيء وراه
لا تخافين لا من الكشف ولا حتى الم الطلق
اذكر وحده قالت لي
مع كل طلقه راح تقربين خطوه للراحه
و تنزلين حمل 9شهور
ولازم نصبر ما قدامنا حل !!
وانتي بكريه بيهتمون فيك يا قلبي