شاركي في النقاش

سجلي الدخول لإضافة تعليق.

التعليقات

1,114
  1. @mymo_alsghnnh

    صبحكم بالخير ياجميلات 😭❤❤
    وحشتووووني
    مبروووك اللي ولدو والله يطلعني واياكم من تالي الشر


    الحمدلله بعد ما ريحت جيت بقولكم اكشني ❤


    هذا سلمكم الله قبل ولادتي بيومين شديت على نفسي بالمشي صرت امشي ساعتين باليوم
    وملزمه اني اولد لاني تعبت وكنت مخلصه 38 اسبوع بالضبط وداخله ع 39
    بيوم 10 اغسطس تعشيت وكثرت فلفل اسود مع الشوربه اللي كنت اشربها وقلت لزوجي ابي اطلع امشي قال زين نخلص عشاء ونروح
    الحمدلله خلصت و قمت لبست و طلعنا وحنا رايحين الممشى قلت لزوجي وقف عند عطارة ابي حلتيت 🙄
    قال ناويه تخيسين السياره ؟؟ قلت عاد جاك العلم انا تعبت ابي اولد 😂
    للعلم من اول اسبوع بالتاسع رحمي مفتوح 2 ونص
    جاب لي حلتيت و شميتها بس و نزلت امشي ساعتين متواصله و ركبت السياره وانا منصرعه من التعب 😂😂
    وكملت شم لين وصلت البيت
    نزلت وتروشت بموية دافيه و انسدحت على اساس بنام
    واحس ب الم بظهري زي السيخ الحار يروح ويجي 😭
    مو الم طلق الم غررريب و خفت لايصير جنيني فيه شي
    غيرت سدحتي ونفس الالم يجيني
    كانت الساعه 3 ونص الفجر
    نزلت للمطبخ سويت لي بابونج شربت كوب ورجعت فراشي و يمسكني اسهال الله يكرمكم 😭
    و اقعد لكم كل ربع ساعه بالحمام الله يكرمكم
    لين 5 الفجر وانا تعباااااانه حدي
    وكان عندي موعد الساعه 8 الصباح
    يادوب غفيت ساعتين صحاني زوجي الساعه 7 ونص للموعد قمت و قلبي يقول انتي بتولدين اليوم مع ان ماكان فيني طلق يسوى
    شي خفيييف يروح ويجي
    واحط بشنطتي شراب و ربطة شعر كبيره و شاحني المتنقل و فقس و مره 😂😂 طبعا هذولي كلهم بشنطة اليد
    واسكر شنطة المستفى و اخليها بالصاله
    و زوجي طايره عيونه قال شعندك ضفيتي قشك تراك رايحه موعد قلت ادري بس احتياااط


    وصلت المستشفى ونزلت وتاخرت الدكتوره ماوصلت وصارت خيره لي جلست امشي بالممرات و صار يجيني تحجر كل 3 دقايق
    تعبت وجلست بالانتظار مع زوجي الا احس ببلل ينزل مني
    استغربت لان مامعي افرازات الحمدلله .. قلت لزوجي في شي نزل قال اتركي عنك الوسوسه قلت والله مو وسوسه في شي قال قومي للحمام شوفي قمت للحمام الا اشوف الفوطه نظيفه مافي اي دم ولا افراز بس مبلوله وهنا عرفت انها الموية
    جت الدكتورة و دخلت عليها وعلمتها قالت كذا تحتاجين كشف نسائي قلت اوكي كشفت علي قالت تبين تروحين البيت قلت اكيد اذا خلصت بروح قالت لا ياحبيبتي انتي ولادة الحين تروحين فوق قسم الولادة وهذي مية الراس طلعت .. تتكلم ويدها جوا تسوي لي تحريض 😭😭 بس طلعت يدها انكبت الموية طلعت لي كوتكس قالت البسيه وارقي فوق مفتوح 4 ونص
    طلعت لزوجي قال هاه نمشي ؟؟؟ قلت وين تمشي حبيبي 😂ولااااادة
    انهبل قال لا تمزحين 😳 قلت والله ولادة
    اخذتنا النيرس ودخلنا قسم الولادة و غيرت ملابسي وجلست امشي بالممرات على امل يجيني طلق زيادة وكانت الساعه 9 ونص قالو بنستنى لين 12 اذا مازاد طلقك بنحط لك صناعي و فعلا جات 12 طلقي بارد ركبو لي صناعي
    وجلست افحط عالسرير لين 2 ونص الظهر جت كشفت قالت 6
    قلت كل هالالم و 6 😭😭😭
    طلبت ابرة الظهر و جاء ركبها لي طبيب التخدير الساعه 3 وزيادة
    وانا كنت اتعصر من الطللللق كان كل دقيقه يجي
    وكل ماجاء يثبت الابرة اقوله اصبر جاني طلللق 😭
    ركبها لي والحمدلله يده خفيفه .. وبدا مفعولها بعد 20 دقيقه يعني على 4 بدا يخف الالم معاي
    الحمدلله قدرت ادعي و اتنفس واتكلم مع زوجي وبالتدريج بدا يخف الالم لين اختفى
    جاتني القابله اللي بتولدني وجلست تسوي لي مساج لفتحة المهبل علشان ترخي العضله ومااحتاج توسيع
    مسجتني لين صارت تقول اذا قلت لك ادفعي ادفعي الراس بدا يطلع
    وانا مو مصدددقه احسبها تلعب علي قالت يالله ادفعييي
    وانا ادفع والحمدلله 5 مرات دفعت دفعات طووويله و طلعت بنتي واول ماسمعت صياحها جلست اصيح معها 😭
    طلعت المشيمه وحسيت بالمشيمه اكثر من احساسي ببنتي
    طبعا كنت احس بخروج البيبي بس ماكان في الم بس كان شعور الضغط هو اللي ساعدني
    الحمدلله ولدت بدون توسيع وقالت بشوف اذا في جروح تحتاجين خياطة بخيطك الحمدلله صار مافي جروح
    وهذا كله بسبب المساج اللي عمل على ارتخا العضله
    انا ولدت بمستشفى ارامكو وكان الطاقم اجنبي
    و ولادتهم نفس ولادة الاجانب بكللل شي حتى وقت الدفع ماكنت على ظهري كنت على جنب و ثانيه رجلي على فخذي وضعية مريحة واسهل بخروج الجنين


    الحمدلله تجربة حلوووه وهذي اول ولادة لي عندهم
  2. @r_o_m

    ام فجوره انا مثلك فخذي برجل وحذه بس متعبني
    اذا مشيت ورقيت درج تتخدر ع طول
    وبدورة المياه وانتي بكرامه احس زي الكهرب ينفضني اقوم على طول


    انتي قد جاك عرق النسا قبل ؟ بحملك
  3. @fajoory66

    ماشاءالله تبارك الله ميمو حلو العمل بالاسباب انا المشي مااقدر اكثر من ساعه احس اني مفككه الله يعين وياجر
    والحلتيت عندي اشمها عالسريع واحطها مااكمل شم
    عطوني مهله الى السبت
    خلصت التاسع لي 4 ايام
    ام فجورا وام جوري الليبيه وضحكته واللي بالتاسع الله يفرج لنا ولكم ويخلصنا على خيير وتصير ذكريات
  4. @fajoory66

    ر و م
    ام فجوره انا مثلك فخذي برجل وحذه بس متعبني اذا مشيت ورقيت درج تتخدر ع طول وبدورة المياه وانتي بكرامه احس زي الكهرب ينفضني اقوم على طول انتي قد جاك عرق النسا قبل ؟ بحملك
    انا بعد احيانا احسها بتنفك قالت الدكتوره احيانا مايكون الدفع على تحت يصير على جنب وفعلا دايم احس بدفع جهة فخذي اليسار على ان راسه تحت قالت الدكتوره هذا اللي يأخر الطلق

تابعي تجارب أخرى من هذا القسم.