زوجي وأختي وطلاقها

السلام عليكم ورحمة الله وبركاته


أنا دايم اتصفح هالمنتدى الجميل وأقرا مشاكل أخواتي والردود عليها منها استفيد ومنها ادعي لهم بأن الله يفرجها عليهم ،،
المهم بدخل بالموضوع .. أنا متزوجه من سبع سنوات تقريبا وعندي ولدين وبنت وحالي مع زوجي مثل كل زوجين مرات مشاكل ومرات سلام ، المهم عندي اختي الأكبر مني متزوجه من 11 سنه ولا رزقها ربي عيال وزوجي دايم يسأل عنها وشصار عليها حملت او لا وليش ماتعالج يسافرون برا او ليش ما يسوون أطفال أنابيب ويقول انه يغليها لأنه تهتم في عيالي و حريصه عليهم اذا كنا مسافرين أو طالعين مكان يقول أنا ارتاح واطمأن اذا فلانه في بيت أهلك لأنها بتكون حريصه على عيالنا وهي تحبهم وما ترفض لهم طلب ،،
المهم أمس كنت طالعه انا وزوجي نتعشى برا وقعدنا نسولف وقلت يا فلان ما قلت لك ترا اختي بتنفصل عن زوجها هو انصدم وقال ليه ما يسوون اطفال انابيب او يسافرون للعلاج قلت مادري عنهم وقلت له هي تحاتي ما تبي يتقدم لها واحد متزوج ما تبي مشاكل قال اكيد بيجيها واحد معدد اهم شي يجيها ضنى وفجأه قال والله لو الشرع يسمح وحلل الجمع بين اختين اني اتزوجها انا انصدمت وقلت عشان ابي اتأكد هي زلة لسان منه او غلطان قلت له وليه انت وليه ما رشحت لها واخد من اخوانك فلان او فلان قال لا اخواني ما يقدرون وقال كلمه بما معناه انهم مو كفو او يخافون من زوجاتهم انا بعدها ما تمالكت نفسي وقلت انت ما تستحي على وجهك وانت مو كفو ولا تستاهلني وانا اصلا كثير عليك هو اخترع وقال تكفين صوتك لا يطلع الناس حوالينا وانا والله موقصدي وانتي فهمتيني غلط انا قمت وخليته
وقام يلحقني ورحت السياره وهو دفع الحساب وجاني وقعد يحلف وبأغلظ الايمان انه نيتي ما هي شينه ولا ني طمعان في اختك وانا من باب انها كاسره خاطري ويحلف كثير ويقول عساني فقد امي وابوي وعيالي ان نيتي انها سليمه وانك انتي غاليه عندي وانتي تعرفيني ماني راعي ردى و لاراعي هالسوالف ولا لي حاجه بأختك وتعرفين اني احبك واموت فيك وادري اني غلطت بهاالكلمه وطول الطريق يحلف واني ابي لأختك الزوج الصالح الله يرزقها وانا ما اشوفها الا مثل اختي وبعدها مر البنك وسحب فلوس وعطاني ياها وقال هذا عشان ترضين علي ولو تبين اي شي انا مستعد فيه قلت مالي حاجه بفلوسك وانا طول الطريق ساكته وربي يا بنات اني انجرحت حييل حيييل ما توقعت يقول هالكلمه وهو يقول ردي علي تكلمي وانا مابي اتكلم وأسبه
وادري انه مقهور لاني ساكته وهو متندم كثير ، الحين يا بنات تكفون وش اسوي التفكير ذبحني هل هو معقول يفكر بأختي ؟؟ ما ابي الشيطان يلعب بأفكاري أو هل هي زلة لسان ؟؟ وش اسوي عشان كيف اتعامل معه بعد هالمصيبه ووش القرار اللي اتخذه يالحكيمات وينكم وين آرائكم السديده ؟؟ الله يجزاكم خير