الحنا واختلافه 💔

السلام عليكم ورحمة الله وبركاته
بدخل على الموضوع على طول
انا يابنات لي سنوات استخدم الحنا يعطي لون فقط وفائدته مره قليله ولايستاهل احصره بنسبة
ومع ذلك كنت أشتريه عشان يعطي لون طبيعي
كنت أنوع يعني مرات حنا وشاهي ولون طعام احمر ومره أغير اللون لبرتقالي ومره أحط نسكافيه وهكذا
وقبل ما أحطه على شعري اخلطه بزيت زيتون او سمسم او جوز الهند
وماشاءالله تبارك الرحمن اللون جدًا جدًا جميل يجي على عنااابي
لكن ك فائدة شئ لا يذكر
قبل فترة فتحت عطاره جديدة بالقرب من البيت فشريت منهم مرتين المره الاولى مثل اي حنا عادية جدًا المره الثانيه والمره الوحيده اصلًا الي اشتري فيها نص كيلو بالعادة اشتري كيلو كيلوين عشان يطولون عندي
والله يابنات اني بس حطيتي حنا ومويه وزيت لاني كنت مستعجله وساعة على راسي وتروشت بشامبو بالعادة اتروش بمويه وازيته فتره ثم استخدم الشامبو
اول مره في حياتي يصير لي كذا
شعر ناععم مفرووود حتى التساقط وقف بشكل صدمني يعني لو اتكلم من اليوم لين شهر ماقدر اوفيه حقه
شئ خييييالي
اختي ماتحب ريحته ولكن شافت النتائج ماصبرت على طول استخدمته بس حنا ومويه بس ونفس النتائج متخيلين شهر يوميًا نقوم مومصدقين شهر مافكرنا حتى نمشط شعرنا واستخدمناه للمره الثانيه بعد شهر من التجربة الاولى ونفس النتائج تبارك الرحمن شئ خرافي
بعد ٣ أشهر فكرت احني شعري للمره الثالثه ولكن هالمره كان الحنا مثل كل مره بس لون وانصدمت؟ يعني الحين الحنا اذا طول تروح فائدته؟؟ ولا ايش؟
اول ما خلص رحت شريت من نفس العطارة لكن رجع مثل اول يعني نفس الي كنت أشتريه بالعادة
الي لاحظته ان الحنا الي أدهشتني كان لونها غامق بالاضافة الى كأنها جديده يعني مطحونة قريب
فرحت لكذا محل وسألت وكلهم نفوا كلامي ونفس العطارة قلت لها اول ماتنزلون دفعه جديدة علموني لأنهم الأرخص والأقرب
وسالت كبيرات السنه الموجودات في طيبه قالوا الحنا ماتتغير حتى لوبعد سنه بس مدري ياناس يعني مومعقوله ذيك الحنا كانت غير ونظيفه بالعاده يجي شكلها قديم وأشهب
ودايم اسمع جادتنا يمدحون الحنا وكنت اقول في نفسي على ايش هي كلها لون يعني ماعندي مكان اشتريها منه مره من طيبه ومره من العويس ومره من عطارات على الطريق وهكذا بس هذيك فيها سر وابي اعرفه
انا ما اتوقع فيها أعشاب بس ما ادري 🤔 يعني مالاحظت انها مخلوطة بس اللهم انها أغمق من العادة
طبعًا انتظر دفعة العطارة الجديدة اول ماتنزل بشتريها واشوف ان شاءالله
بس هالتجربة علمتني انه فعلًا الحنا الأصلية مو الي يحطونها لنا
انا مره قد شريت حنا مومطحونه وكان معها اغصان تتوقعون انهم يطحنونها مع الأغصان؟ ولا يشيلونها ويتركون الأوراق؟
يعني احتمال انها اذا انخلطت مع الأغصان يقل مفعوله ولا؟