زوجي والتقصير لي

السلام عليكم
سجلت هنا لاني في حيرة
بعطيكم ملخص عن حياتي عشان تفهمو وضعي
تزوجت من 11 سنه وبدايات زواجنا
كانت الديون تاكل كل راتب زوجي
وماالله كتب لي وظيفه فكان يجي اول الشهر مامعنا الا 100 ريال وكنا نعيش من بيع
ذهبي من ابوي لانه جاب لي شبكة بسيطة مرة بس ذهبي كان كثير وياما فك ازمتنا
مع السنين الله رزقني ببنت وولد مابينهم الا سنة والله رزقه واغناه
بس بين معدنه لما صارت الفلوس في ايده
الرجال يستكثر علي اي شي
فلوس صالون ماله داعي كسوة شتا او صيف برضو ماله داعي جزمه وانتو بكرامه ماله داعي ولما يعطيني يعطيني محاضرة
انتو ماتحسو ماصين دمي ** كل فلوسي تاخذوها جاهزة مجهزة ويخليني اندم اني اخذت اي شي منه
بس بالمقابل اي شي له ولاولادنا مسموح
ملابس اجهزة غالية كله مايغلى عليهم كله حق من حقوقهم وانا افرح بانه مومقصر معاهم الحمد لله
المهم خلال السنتين اللي راحت الرجال تعرف ع بنت في دوامه وجاني يبي يخطبها
ويسكنها معي بنفس البيت في شقة (ساكنين ببيت اهله وبيبني لها فوق )طيب شنو السبب قال مامنك قصور بس انا حبيتها وابيها في الحلال وانتي ام العيال وووو
انا اعترضت وبينت له عدم رضاي بس هو مشى بالخطبة وهي رفضته ومع ذلك للان متواصل معاها مسجات صباح ومساء خير
وادعية وكلام من هالقبيل يعني ماقطع والفكرة لساتها بباله
انا اتابع من بعيد ولا فاتحته في شي عشان لا اعكر حياة اولادي في هالفترة بدى يزن احملي وابي عيال
وانا اخذت حبوب من وراه بسشاء ربي احمل الحمد لله الله يرزق كل محروم بس مع هالحمل زاد همي
اهلي يوم عرفو بحملي يمزحو معي الا تقول خله يجيب لك هدية سنعة واللي تقول ساعه ماركة واللي تقول شنطة غالية مايدروا انه اول ماخبرته قال لي ماعندي فلوس مستشفيات بوديك حكومي تولدي
انا اعرف الولادة سهالة من رب العالمين ولا عاد جبت خبر حكومي ولا خاص بس طريقته في الكلام كاني عبء وثقل مو مسؤولية عليه وهو كان يحتري احمل
يحسسني بالذل ع لقمتي وشربي :(
ليش جاية لكم ؟
انا قربت اولد وهو مكبر راسه ماجهز للمولود ولا شي ولا عندي شي من اخوانه لان اخر ولادة قبل 5سنوات ومحتاجه كم لبسة جديدة استقبل فيها الناس غير سرير للبيبي
وهو ولاهامه كل ماكلمته قال السوق موجود مابيطير لسه بدري فسؤالي
هل اخذ من اهلي واجهز واطنشه؟
لان سواها في قبل وولدت وبدون مبالغه ماعندي ولا شي للمولود حتى لفة وخلاني افتشل قدام اهلي وقت النفاس
استغفر الله مغبونه منه غبن


حسيت حالي اله تفريغ وتفريخ طول هالسنين مع ان أخلاقه كويسة بس المادة واقفة بيننا من اول ماالله غناه
انا تعبت تفكير في هالموضوع
اي شي لي اخر همه
واي احد ثاني حلو وبارد
كلمته بالذوق وبالدلع
واذا قلت له انا مالي غيرك وانت تاج راسي
ومن هالكلام يقول وانا بشنو مقصر كل شي
عندك ويقلبها علي
فطنشت قلت يمكن يجي من نفسه وهذاني قريب بولد ولا جاب خبر
شوروو علي اخذ من اهلي واجهز ع الاقل لي كم لبسة
ولا اطنشه واتورط بعد الولادة