سلفتي وطلباتها .. كيف اتعامل معها !!

ما احلل نقل موضوعي للإنستقرام او غيره .. الله لا يوفقها اللي تنسخه وتنقله وتترزق من مواضيعنا ... في بيت اهل زوجي فقط ساكن فيه أم زوجي وأبو زوجي مع شغالتهم ... وهم كبار بالسن اعمارهم بالسبعينات الله يحفظهم ويطول بعمرهم ويعافيهم .. المهم لما نجتمع عندهم انا وسلفاتي ويمتلي البيت .. تطنقر شغالتهم وماتشتغل وتعاند بعذر ان اللي جو كثار وماتقدر عليهم .. وتترك المطبخ ماتنظف الكاسة .. وخوات زوجي المتزوجات بعد كبار وما يهاوشون الشغالة عشان ماتهرب بحكم انها تشتغل زين اذا مافي زوارة للبيت .. فأنا من كنت في بيت اهلي احب اشتغل واعاون ما احب القعدة .. فصرت أنا ووحدة من سلفاتي ندخل المطبخ ونشتغل وننظف ومبسوطات والحمدلله ونضيع الوقت بالسوالف والضحك .. المهم وحدة من سلفاتي كل شوي تجي المطبخ وتقول لي بالله اغسلي لي الصحن لان مسويه اظافري وما أبي اخربهم بالماء .. وبالفعل اغسل لها الصحن وعادي جدا .. لكن بديت اتضايق كل شوي جايه واحسها تتأمر علي .. مره تبي اغسل لها كوب واعبيه ماء ومره تبي صحن نظيف ومره تبي اغرف لبنتها من الرز ومره اغسل رضاعة ولدها .. واحيانا ترسل لي بنتها تقول ماما تقول بقوا لنا عشا وحطوه بحافظة نظيفة عشان ناخذه للبيت معنا ! لو انها كبيرة بالسن عادي بس هي من عمري ... واذا هي تتعذر بأظافرها حتى انا مسويه اظافري ومع هذا احب اشتغل بالمطبخ واغسل واطبخ .. يا بنات لا تظنون ما ابي اتعاون كلها صحن وكاسة ما ضرتني بس حسيتها تتأمر علي وكأني اصغر بناتها .. واكثر من مرة لما تشوفني جايه من المطبخ وخلصت غسل مواعين تقول من طول انك واقفه بالله جيبي فناجين زياده !! المهم قلت لها قدام الجميع قولي لبنتك تجيب لك او انتي قومي تدلين مكانهم .. وحسيتها زعلت بس ضحكت ومشت الموقف .. وارسلت بنتها وقالت اسفين ثقلنا عليك .. عاد ليتها عقلت .. بكل جمعة عند اهل زوجي تسوي نفس الحركة .. تبي الكل يخدمها وهي ماتقوم .. ولاحظت ان كل سلفاتي مستحيل تطلب منهن إلا انا .. يمكن لاني جديدة عليهم مدري ... والله يا بنات احرجتني قدام الناس تطلب مني مسويه تحرجني عشان ما ارفض لها وبناتها اثنين جالسات ماتقول لهم شيء وعذرها عشان مايتبللن ماء فساتينهن من المطبخ .. اعمار بناتها 7 و 5 سنوات .. صرت ما اجي لجمعات اهل زوجي احس اني شغالتها .. اكثر من مره ارفض طلباتها وقدام الجميع لكن ما تفهم تعيد وتكرر بالأوامر قسم بالله طفشتني .. ابي رد عليها يخليها تحرم تطلب مني وتتأمر .. خلص خدمناها مره مرتين لكن مو كل شوي وكل زواره ...