السلام عليكم ورحمة الله وبركاته
هلا وغلا بأخواتي الحبيبات :27:
انا الصراحه عندي مشكله وابيكم تساعدوني فيها وتقولولي شلون اتصرف :(
المشكله تتعلق بأم زوجي وخواته انا الحمدالله انسانه متدينه ماسمع اغاني ولا احب النميمه ولا الغيبه وام زوجي وخواته الامور هاذي عاديه بالنسبه لهم علشان جذيه مافي بيني وبينهم انسجام .
المهم من فتره رحت مع زوجي للعمره وكانت من احلى ايام عمري ونحن رايحين اتفقنا مافي روحه للسوق الا قبل لا نرجع بيوم او يومين علشان نتفرغ للعباده وكانت ايامنا كلها عباده وقراءة قرآن ومن اجمل ايام حياتي لحد الحين والامور ماشيه تمام .
ام زوجي شبت فيها الغيره انقهرت حيل لان نحن رحنا العمره مع انها كانت توها جايه من الحج وانا رحت وزرتها بس اهي طبعها جذيه اذا زوجي اخذني اي مكان تغار مووووت المهم وهو يكلمها بالتيلفون قالتله المره الجايه انا بروح معاك للعمره قالها طيب بعد سنه تقريبا او سنتين قررنا انا وزوجي نروح للعمره فقال زوجي امي قايله اذا رحنا العمره تبي تروح معانا وطبعا اذا راحت لازم تروح معاها بنتها علشان تقعد معاها بالغرفه فقلت له طيب لانها امه ومن حقها عليه ان يوديها بس ها المره الروحه كانت بالنسبه لي اتعس مايكون :44:
اولا ازعجتنا مع السوق كل يوم تبي تروح للسوق وحنا رايحين للعباده مب رايحين للاسواق السوق لاحقين عليه والله انها ازعجتنا واشغلتنا مع السوق ثاني شي كل ما قعدنا طاحت تمدح في زوج بنتها زوجي بنتي اشترى لبنتي طقم وساعه مادري بكم وزوج بنتي جاب وزوج بنتي سوى ومن ها الكلام اللي ماله داعي هذا غير النغزات اللي كانت تقطها علي مع اني والله العظيم اعاملها بطيب وانا اصلا طبيعي هاديه ومب من البنات اللي لسانهم طويل ومره ونحن قاعدين قعدت تقولي جدام ولدها اللي اهو زوجي شفتي المضيفه اللي بالطياره شلون عيونها حلوه مادري شنو قصدها وانا الحمدالله مو ناقصني شي جمال واخلاق والحمدالله واخت زوجي نفس الشي قاعده وتمدح في البنات جدام زوجي بدون لا تراعي مشاعري هذا غير الحش في الناس وهذا حرام خاصه ان نحن في بيت الله اطهر مكان على وجه الارض والله اني كنت شابه نار من كلامهم وتصرفاتهم بس مب بيدي شي :(:44:
حتى اني ماحسيت بالراحه معاهم بالمره على عكس لما كنت رايحه مع زوجي كانت ايامنا وايد حلوه كلها عباده وبس .
والمشكله الحين ان ام زوجي قايله حق زوجي اذا رحتوا للعمره ابي اروح معاكم :06:
تكفون قولولي شسوي لانها الصراحه تنرفز اللي ما يتنرفز وتصرفاتها تحرق الاعصاب ومزاجيه يعني ساعات تبتسم بوجهي وساعات مبوزه بدون اي سبب هذا غير الغيره اي تشوفه عندي تسألني عنه من وين شارتنه وبكم :06:
انا لما قالي زوجي قلت له اذا رحنا للعمره قول لامك اني ما بروح معاك وانك بتروح مع ربعك لان اذا قال جذ يه ما راح تقول شي اما اذا قال اني بروح معاه بتعصب وبتلزم الا ياخذها قالي زوجي طيب بس اخافها تعرف اني اخذتج معاي حتى زوجي والله يتضايق من تصرفات امه معاي وكم مره ينصحها بس مافيها فايده قووووووووووولولي شسوي انا قلبي متعلق بمكه وابي اذا رحت اروح وانا مرتاحه بدون مضايقات وحرقة اعصاب :44:
شاركي في النقاش
سجلي الدخول لإضافة تعليق.
التعليقات
16- السلام عليكي يا حبيبة الرحمن
الحل بسيط جدا ( اذا تبين تروحين للعمرة مرة ثانيه لا تقولين لام زوجج لانها باتضايقكم وقولي انكم
بتتمشون بالطايف وجدة ولا تجيبين طاري العمره وانتي بنيتج هالمناطق مع العمره )
هذا اولا اما انها تمدح الحريم جدام زوجج واخته تفعل الشي نفسه فهذا اكبر غلط ليش زوجج ما تكلم وقال لاتوصفون احد ؟؟ او على الاقل قال ( ام فلان تارسه علي حياتي) اللي هو انتي علشان يكفون مدح للحريم
وهذا والله يوفقج ويعينج على ام زوجج ... - مشكووووره حبيبتي ام شيوخه على مرورج وعلى النصيحه :24:
وبالنسبه لزوجي اذا تكلموا عن البنات مايعطيهم ويه يعني يطنشهم ولا تهمه الامور هاذي لانه يحبني وبعدين اهم هذا اسلوبهم يعني عادي خواته وامه يتكلمون عن البنات حتى جدام ابوه مثلا اذا طلعت وحده حلوه ولا شينه بالتلفزيون وبوهم قاعد عادي يعلقون عليها ومثل ما قلت لكم زوجي دايما يحاول ينصح امه بس مافيها فايده راعي الطبع مايوز عن طبعه والله يصبرني .
الصراحه فكرتج حلووووه بس مانقدر انطبقها يعني اذا قلنا حق ام زوجي بنروح جده ولا الطايف بتلصق فينا وبتقول بروح معاكم لان نحن مب من السعوديه فبتقول عادي بروح اغير جو معاكم وشوف مناطق السعوديه:06: - الله يعينك بس احسن شي اتصلوا عليها قبل ما تطلعون بوقت قصير وقولوا نحن مسافرين الحين تامرين على شي
واذا تقدر تطلع مع زوجها وعيالها ليش لا
الله يسهل عليك بس لا تحاولي تبيني قدام زوجك انك متضايقه - والله من رأيي انكم ما تقولون لها على السفره واذا رحتوا هناك كلموها وقولوا لها كنا مستعجلين وجت السفره سريعه
ويعدين اذا مرررره مافيه فكه اذا سافرت معكم ممكن هي تطلع مع بنتها للسوق وانتي مو شرط تتقيدين فيها خذي راحتك وروحي للحرم مع زوجك وقولي انب جايه عشات العباده ومو للاسواق - ام الحلوتين مشكووووووره حبيبتي على الرد بس ما نقدر نتصل لها قبل السفر بوقت قصير لانها بتزعل وبتقولنا ليش ماعلمتوني انكم بتروحون العمره لانها قايله حق ولدها اذا رحتوا ابي اروح معاكم وانا الصراحه ابي اخذ راحتي مع زوجي وهي راحت معانا العمره اللي قبل اعتقد كفايه والله العظيم لو تغير من اسلوبها شوي جان عادي بالنسبه لي لكنها تدخل بكل كبيره وصغيره والله كرهتني حياتي لما راحت معانا العمره بقولكم بعض المواقف اللي صارتلي معاها بس علشان ما تلوموني مره من المرات يوم اذن العشاء ونحن بالفندق قالت يصير نصلي وحنا اهنيه بالفندق مو لازم نروح للحرم قلت لها اي عادي مافيها شي بس ماقلت لها اني انا بعد مابروح اصلا انا من اروح لمكه ما اقدر الا اصلي بالحرم المهم قمت ولبست عباتي وانا البس سمعتهم اقاموا الصلاه وجيت ركضه اقول حق زوجي قاموا الصلاه بسرعه ومن شافتني لابسه وبروح قالتلي بتصلين بالحرم قلت لها اي قالتلي ما قلتينا وانا كنت مستعجله ابي اروح وبوزت ولفت بويها صوب بنتها طيب انا بكيفي اصلي بالمكان اللي يريحني صح ولا لا وبعدين انا ما قلت لهم اني بصلي بالفندق ومره من المرات زوجي تأخر برع بالليل وكانت تبيه ضروري المهم لما رجع قالت له وينك ليش متأخر كنت ابيك قالها طيب جان قلتي حق زوجتي تتصلي على الموبايل جان تقوله وحنا وين نشوف زوجتك شفتوا القهر مع ان الغرفتين لاصقات في بعض وانا ما طلع الا وقت الصلاه لا وتقولها بصوت عالي :( :44:
هذا غير الحركات اللي تسويها مره تبتسم بويهي ومحد احسن عنها ومره تبوز بويهي بدون اي سبب :44:
الفيلسوووفه مشكووووره حبيبتي وشكلي بسوي بنصيحتج احسن مانعلمها الا بعد مانروح ساعتها ماتقدر تسوي شي
بس اخافها تسمع زوجي كلام يضايقه وتقوله انا قايله لك انكم اذا رحتوا بروح معاكم :06:
ياربي والله محتاره ولا شرايكم اقول حق زوجي قولها انك بتروح مع ربعك لانه اذا قالها جذ يه ما بتقوله شي وبتسكت لان اذا قالها انا معاه بتعصب وبتقوله ليش تاخذ زوجتك وما تاخذني :44:
مواضيع مشابهة
تابعي تجارب أخرى من هذا القسم.