مرحبا بنات..
أخباركم؟؟
أنا مابعد ولدت..والحمدلله على كل حــــــال..كل يوم يعدّي أتعب زيادة بس أقول الحمدلله اللي قدرت أصوم زيادة يوم..
بس وين قوارير..أنا دخلت جو مع قصتها وتفاعلت مررررة..بغيت أصيح من القهر,,وينها نشوف وش صار عليها..
ودي اروح لمجرة الزمرد أكيد كاتبة قصتها هناك بعد..بس فيني ثقل ومافيني حيل أتحرك بين هالملفات
<==مصدقة عمرها:)
اليوم أبشركم حسيت بألم جديد,, وأقوى من الأيام اللي راحت <==يالبي قلوبنا..من متى الألم صار بشارة!! بس الله يهونها وييسر علينا..
عاد أختي اللي بالثانوي دقت علي أمس وقالت لي شوفي يا بنت الناس..تراي حلمت إنك بتولدين يوم الاثنين,, وبتجيبين ولد!!يعني استعدي ولادتك بكره:)...قلت ياحليلك حليلاه..تحسبين الولادة طقها والحقها؟وأنا بيني وبين نفسي أقول آمين يارب الله يحقق حلمك..
واليوم ولدي عنده موعد,,هو وأبوه..الأبو يده ملتوي العصب فيها من فهارة الرياضة والنوادي,, والولد ياقلبي طالع له زي الثالول بظهره وله جلسة كي بالتبريد ..وماودي أروح لأني رحت هذيك المرة وقطّع قلبي بصياحه..
تخيلو الدكتورة قاعدة تكوي البثور بالآلة,, وهو نايم على بطنه ويصيح:ياماما خليها توقف..ياماما خلاص ما آكل آيسكريم أتوب..والله إني صحت معه..أقول له يا ماما هذا مو عقاب..هذا دوا..وهو يتلوّى قطّع قلبي لين خلصت..
واليوم عنده موعد..وأشوف كم حبة طالعين جدد,,شكل الدكتورة بتكويه اليوم بعد..وأقول لزوجي رح أنت واياه أنا أعصابي ما تتحمل..وهو معنّــد يقول أنتي تعرفين له أنا ماعرف أتفاهم مع ولدك<==تحسونهم ضراير :)
وبس..هذي أخباري..
لاجديد..اللهم تنميل برجولي وشوي دوخة مدري وش جايبها بعد الهانم..ما فكتني أول الحمل وتبي تنشب لي بعد في آخره<==أقصد فيها الدوخة:)
عاد يالله كل وحدة تضف بقشتها وخلونا نقوم ما بعد بقى على أذان المغرب إلا شوي..إلا مير بسألكم..إذا بغيتو تدعون لبعض وش تقولون؟؟
أمس على الفطور أدعي لنفسي ولكم..زوجي شرق بالقهوة من الضحك يوم سمعني أدعي..
قلت: يارب ياكريم تهون علي وعلى مالقيت إسم وعلى تشيز كيك والرياض عالية وراعية مبدأ..وهو صرات عيونه @@ يقول من هذولي؟
قلت رفيقاتي بعالم حواء..أبدعي لهم وهم بيدعون لي وقت الفطور عشان تصير الاستجابة أحرى..
قال: وهذي اساميكم؟؟؟
عاد أنا مدري وش أقول له,,قلت :أشوا إن ربي عارف النية وكل وحدة بتوصلها دعوتها..ياحبك للتعقيد والتنقّــد!!
المهم لاتنسوني..ادعو لي..وانا والله أدعي لكم ودايم على بالي..والله يستجيب لنا جميع..
مع السلامة حتى وقت قريب إن شاءالله
*_* رمضان بعد ايام قليله نستقبله باخبار سعيده*_* الله يهون علينا ويقومنا بالسلامه
متابعة النقاش، صفحة 118
